Tein mokui keman tikitaj Tein timomachtiaj itech nechikol Tonemilis uan toTanojnotsalis
4-10 METSTI MAYO
TAMACHTILIS TEIN KIPIA BIBLIA | GÉNESIS 36, 37
Maj tiktemokan tamachtilis ika nejmachkayot
it-1 pág. 735
Edom
(Chichiltik), IKONEUAN EDOM.
Esaú uan Jacob katkaj iknimej. Yejuan senyolkaj. Esaú kitokaytijkej Edom porin kinamakak tein kinamikia kiselis kemej tayekankakonet ika sentapalkat takual chichiltik (Gé 36:1; 25:30-34). Esaú no katka semi tsonej uan itson katka chichiltik keman yolik (Gé 25:25). Itech altepemej kampa yejua uan ikoneuan mokaltalijkej kinixmatkej porin akin ompa nemiaj katka chichiltik inintson.
it-1 pág. 618 § 1, 2
Akin tayekpia
Keman se takat akin kinyekpiaya borregos kijtouaya ke kinyekpiaskia inintapialuan oksekin, kinextiaya ke senkis kinyekpiaskia ijkon kemej kijtouaya tanauatil. Akin ininaxkauan katkaj tapialmej kimatiaj ke kintamakaskiaj uan amo kinichtekiliskiaj. Komo tajpixkej kiichtekiliayaj tapialmej monekia taxtauas. Sayoj ke, tanauatil kijtouaya ke amo monekia taxtauas komo amo uelik kinpaleuij. Xa komo se tekuani kinkuaj tapialmej. Yejua kinextiliskia iteko tapial ke amo itajtakol katka komo kinextiliaya tein panok. Ueliskia kinextilis tapial tein miket. Keman iteko tapial kiitaskia ke yekmelauj panok nejon, kijtoskia ke amo itajtakol katka tajpixkej.
No ijkon mochiuaya ika tein yeski taman tein kiniluiayaj sekin maj kiyekpiakan. No mochiuaya keman sekin monekia kinyekpiaskej ininchankauan. Ne uejkauj, akin tayekanaya monekia kinyekpias iikniuan akin okachi nojnelmej. Yejua ika tikmatij ke Rubén, akin tayekanaya, semi motekipachoj keman iikniuan kijtojkej keniuj kimiktiskiaj José. Génesis 37:18-30, kijtoua: “Yejua ika kiniluij: ‘Maj amo tikmiktikan’. [...] ‘Amo xikmiktikan [...] uan amo teyi xikchiuilikan’. Yejua kinekia kipaleuis porin kinekia kiuikas iuan itat”. Keman Rubén kiitak ke José amo yetoyaok, semi motekipachoj uan hasta “kitsayanak itaken” uan kijtoj: “¡Okichpil amo yetokok! ¿Toni nikchiuati?”. Rubén kimatia ke yejua itajtakol yeskia komo José teisa kipanouaya. Iikniuan kitemojkej kipaleuiskej Rubén. Yejua ika, kinemilijkej takajkayauaskej ke se tapial kimiktijka ininikniuj. Kikalakijkej itaken José itech iesyo se cabra uan kinextilijkej Jacob, akin katka inintat uan tamelaujkej. Jacob kijtoj ke amo katka itajtakol Rubén porin nesia ke se tapial kimiktijka José (Gé 37:31-33).
Tein moixtajtoltia itech Biblia
(GÉNESIS 36:1-19) Yejua nejin tein kipanok Esaú, oso Edom. 2 Esaú monamiktij iniuan seki siuamej kayomej Canaán. Monamiktij iuan Adá. Yejua katka iichpoch Elón. Elón ualeuaya itech ichankauan Het. Esaú no monamiktij iuan Oholibamá. Yejua katka iichpoch Aná. Oholibamá no katka iixuiuj se heveo akin motokaytiaya Zibeón. 3 Esaú no monamiktij iuan Basemat. Yejua katka iichpoch Ismael. Iikniuj Basemat motokaytiaya Nebayot. 4 Esaú uan Adá kipiakej se konet akin motokaytij Elifaz. Esaú no kipiak se konet iuan Basemat akin motokaytij Reuel. 5 Konemej akin Esaú kinpiak iuan Oholibamá motokaytijkej Jeús, Jalam uan Coré. Esaú kinpiak nejin konemej ompa Canaán. 6 Satepan, Esaú kitalkauij iikniuj Jacob uan yajki okse tal tein uejka moajsi. Kinuikak inamikuan, itelpochuan, iichpochuan uan nochin akin nemiaj ichan. No kinuikak nochi itapialuan uan nochi tein kisentilijka ompa Canaán. 7 Kemej Esaú uan Jacob kisentilijkaj miak taman, amo ueliaok senyetoyaj. Yejuan kinpiayaj miak tapialmej kampa nemiaj, uan yejua ika amo kinajsiaok talmej. 8 Yejua ika, Esaú mokaltalito kampa tepeyoj ompa Seír. Esaú yejua Edom. 9 Yejua nejin tein kipanok Esaú, inintat edomitas. Yejuan nemij kampa tepeyoj ompa Seír. 10 Ikoneuan Esaú katkaj Elifaz uan Reuel. Adá, akin katka inamik Esaú, kipiak Elifaz. Basemat, akin katka okse inamik Esaú, kipiak Reuel. 11 Ikoneuan Elifaz katkaj Temán, Omar, Zefó, Gatam uan Quenaz. 12 Elifaz, ikoneuj Esaú, kipiaya se siuat akin motokaytiaya Timná. Satepan, Elifaz uan Timná kipiakej se konet akin motokaytij Amalec. Yejuan nejin konemej akin Adá kinpiak iuan Esaú. 13 Ikoneuan Reuel katkaj Náhat, Zérah, Samá uan Mizá. Yejuan nejin konemej akin Basemat kinpiak iuan Esaú. 14 Oholibamá katka iichpoch Aná uan no katka iixuiuj Zibeón. Oholibamá monamiktij iuan Esaú uan kinpiak nejin konemej: Jeús, Jalam uan Coré. 15 Iixuiuan Esaú mochiujkej taixyekananij. Elifaz katka ikoneuj Esaú akin tayekanaya. Elifaz kinpiak konemej akin mochiujkej taixyekananij. Katkaj taixyekankej Temán, taixyekankej Omar, taixyekankej Zefó, taixyekankej Quenaz, 16 taixyekankej Coré, taixyekankej Gatam uan taixyekankej Amalec. Yejuan nejin taixyekananij akin katkaj ikoneuan Elifaz akin kinpiak ompa Edom. Yejuan katkaj ikoneuan Adá. 17 Reuel katka ikoneuj Esaú. Ikoneuan Reuel katkaj taixyekankej Náhat, taixyekankej Zérah, taixyekankej Samá uan taixyekankej Mizá. Yejuan nejin taixyekananij akin katkaj ikoneuan Reuel akin kinpiak ompa Edom. Yejuan katkaj ikoneuan Basemat, inamik Esaú. 18 Oholibamá katka inamik Esaú. Ikoneuan Oholibamá katkaj taixyekankej Jeús, taixyekankej Jalam uan taixyekankej Coré. Oholibamá kinpiak nejin konemej akin katkaj taixyekananij. Oholibamá katka iichpoch Aná uan no katka inamik Esaú. 19 Nochin nejin katkaj ikoneuan Esaú uan taixyekananij akin inintech ualeujkej. Esaú yejua Edom.
TONEMILIS KEMEJ ITATOJTOKAKAUAN CRISTO
Nemachtil ika Biblia itech nechikol
Tamachtia maj se mochikaua se tekitis keman ika tajtoua talentos
Keman Jesús ika tajtoua talentos, ¿akoni kiixnextia teko, uan akonimej kinixnextiaj takeualmej?
¿Toni kineki Jesús kinmachtis imomachtijkauan?
11-17 METSTI MAYO
TAMACHTILIS TEIN KIPIA BIBLIA | GÉNESIS 38, 39
Maj tiktemokan tamachtilis ika nejmachkayot
it-2 pág. 550
Onán
(ualeua itech se tajtol tein kijtosneki “ueli kinpia konemej, oso chikaualis”).
Onán yejua ojpatika konet akin Judá kipiak iuan se siuat kayot Canaán. Nejon siuat katka iichpoch Súa (Gé 38:2-4; 1Cr 2:3). Er katka iikniuj Onán. Er tayekanaya. Jiova kichiuak maj Er momikiliani porin kichiuaya tein amo kuali uan amo kinpiak konemej. Yejua ika, Judá kiluij Onán maj monamiktiani iuan Tamar, akin katka inamik iikniuj. Komo Tamar kipiaya se konet, amo yeskia konet akin itech ualeuaskiaj ichankauan Onán. Yejua ika, nejon konet kiseliskia netetayokolil kemej itayekankakoneuj Er. Sayoj ke, komo amo yolia se konet akin ueliskia kiselis nejon netetayokolil, yejua Onán kiseliskia. Keman Onán motekaya iuan Tamar, “kitamotaya talpan isemen”. Nejon amo kijtosneki ke Onán iselti momajmatokaya, porin Biblia kijtoua ke kitamotaya isemen “keman motekaya iuan inamik iikniuj”. Nesi ke Onán kitsakuilij isemen uan amo kikauak maj pano iijtik Tamar. Onán amo kitakamatik itat, kinextij nexikolot uan tajtakoj porin kiixnamikik nenamiktilis tein Dios kiixtalij. Yejua ika, Jiova kichiuak maj Onán momikiliani uan amo porin momajmatokak. Uan amo no kinpiak konemej (Gé 38:6-10; 46:12; Nú 26:19).
w04 15/1 pág. 30 § 4, 5
Tein tajtanij akin taixtajtoltiaj
Judá kichiuak tein amo kuali porin amo kinamiktij ikoneuj Selá iuan Tamar kemej kijtojka. Uan no, Judá motekak iuan se siuat akin kinemilij ke auilnemia uan moajsia itech templo. Nejon kiixnamikia tein Dios kiixtalij porin sayoj uelis motekas se siuat oso se takat iuan inamik (Génesis 2:24). Selá kinamikia monamiktis iuan inamik iikniuj. Sayoj ke, Judá amo motekak iuan se siuaauilnenkej, ta kiixpatak ikoneuj maski amo kimatik uan kinpiak konemej.
Tein kichiuak Tamar amo kinextia ke kinekia auilnemis. Amo moijtoua ke kinpiak ome konemej porin auilnemik. Boaz, akin katka kayot Belén, monamiktij iuan Rut, akin katka kayot Moab. Yejua kinamikia monamiktis iuan Rut. Keman monamiktijkej, tayekananij ompa Belén kuali ika tajtojkej Pérez. Yejua katka ikoneuj Tamar. Nejon tayekananij kiluijkej Boaz: “Maj Jiova kichiua maj nejin ichpoch kinpia konemej, uan maj mochankauan momiakilikan kemej ichankauan Pérez, ininkoneuj Judá uan Tamar” (Rut 4:12). No moijtoua ke Pérez yejua semej iuejkaujtatuan Jesucristo (Mateo 1:1-3, TNM; Lucas 3:23-33; TNM).
Tein moixtajtoltia itech Biblia
(GÉNESIS 38:1-19) Itech nejon tonalmej, Judá kinkauak iikniuan uan mokaltalij kampa ika nemia Hirá. Nejon takat katka kayot Adulam. 2 Itech nejon altepet, Judá kiitak iichpoch se takat akin katka kayot Canaán. Nejon takat motokaytiaya Súa. Judá monamiktij iuan nejon ichpoch uan iuan motekak. 3 Yejua ika, siuat yaya kipiati se konet. Satepan, yolik ikoneuj uan Judá kitokaytij Er. 4 Siuat kipiak okse konet, uan okichpiltsin kitokaytij Onán. 5 Siuat oksepa kipiak se konet uan kitokaytij Selá. Judá moajsia ompa Aczib keman siuat kipiak nejin konet. 6 Satepan, Judá kinamiktij Er, ikoneuj akin tayekanaya, iuan se siuat akin motokaytiaya Tamar. 7 Sayoj ke Jiova amo kiyolpaktiaya tein Er kichiuaya. Er katka ikoneuj Judá akin tayekanaya. Yejua ika, Jiova kimiktij. 8 Kemej mochiuak nejon, Judá kiluij Onán: “Ximonamikti iuan inamik mokniuj uan xikchiua tein ixyetok. Ximoteka iuan siuat uan ijkon mokniuj uelis kinpias konemej”. 9 Sayoj ke, Onán kimatia ke konemej akin yoliskiaj amo yeskiaj iaxkauan. Yejua ika, keman Onán motekaya iuan inamik iikniuj, kitamotaya talpan isemen porin amo kinekia maj iikniuj kinpiani konemej. 10 Sayoj ke, Jiova amo kuali kiitaya tein yejua kichiuaya. Yejua ika, no kimiktij. 11 Kemej mochiuak nejon, Judá kiluij isiuamon, Tamar: “Xinemiti ichan mopaj uan amo ximonamikti hasta maj moskalti nokoneuj Selá”. Judá kinemiliaya: “Selá xa no momikilis kemej iikniuan”. Yejua ika, Tamar yajki uan mokauak ichan itat. 12 Satepan, inamik Judá momikilij. Yejua katka iichpoch Súa. Keman panok itayokol Judá, yejua kikalpanoto Hirá porin iuan mouikaya. Hirá katka kayot Adulam. Judá kiitato Hirá kampa moajsiaj akin kintekiliayaj inintojmiyo iborregos Judá ompa Timná. 13 Ompa, Tamar kiluijkej: “Momontat youi Timná kintekiliti inintojmiyo iborregos”. 14 Yejua ika, Tamar kipatak itaken tein ika kinextiaya ke momikilijka inamik, moixpikik, motalilij se chal uan motalij ikalakyan tal tein motokaytia Enaim. Nejon tal moajsi itech ojti tein youi Timná. Ijkon kichiuak porin kiitaya ke Selá ueyiya katka uan amo kinamitiktijtoyaj iuan. 15 Keman Judá kiitak Tamar, niman kinemilij ke katka se siuaauilnenkej porin ixpiktoya. 16 Yejua ika kiajsito, uan kemej amo kimatia ke katka isiuamon, kiluij: “Ika kualtakayot, ximoteka nouan”. Tamar kinankilij: “¿Toni tinechmakas komo nimoteka mouan?”. 17 Judá kijtoj: “Nimitstitanilis se cabrajkonet tein nikpia”. Yejua kinankilij: “¿Toni tinechkauilis uan ika nikmatis ke tinechtitanilis?”. 18 Judá kitajtanij: “¿Toni tikneki maj nimitskauili?”. Tamar kiluij: “Xinechkauili moanillo ika imekauj uan motopil tein timaktok”. Judá kimakak, motekak iuan uan yejua ika Tamar yaya kipiati se konet. 19 Satepan, siuat meuak uan yajki, mokixtilij ichal uan motalilij itaken tein ika kinextiaya ke momikilijka inamik.
TONEMILIS KEMEJ ITATOJTOKAKAUAN CRISTO
Nemachtil ika Biblia itech nechikol
Tekiuaj Jesucristo kinmelauas borregos uan cabras
Keman Jesús ika tajtoua borregos uan cabras, ¿akoni kiixnextia Tekiuaj? ¿Kemanian mochiuas tein kijtoua?
¿Keyej akin kemej yeskiaj borregos kiseliskej itatiochiualis Jesús?
¿Keyej moijtos ke seki taltikpakneminij kemej yeskiaj cabras? ¿Toni kiseliskej akin kemej yeskiaj borregos? ¿Toni kinpanos akin kemej yeskiaj cabras?
18-24 METSTI MAYO
TAMACHTILIS TEIN KIPIA BIBLIA | GÉNESIS 40, 41
Maj tiktemokan tamachtilis ika nejmachkayot
¿Tikonmatia?
¿Keyej José kitekik itson achto ke kiitaskia faraón?
Itech amatajkuilol Génesis moijtoua ke José katka se telpoch hebreo akin tsaktoya. Faraón kikochitaka seki taman tein semi kitekipachouaya. Yejua ika, tanauatij maj niman kiuikilianij José porin yejua kiluiskia tein kijtosnekia nejon takochitalis. José tsaktoyaya miak xiujmej. Maski faraón niman kinekia kiitas, José mochipauakok uan kitekikok itson (Génesis 39:20-23; 41:1, 14). Maski nesi ke nejin taman amo semi moneki, akin kijkuiloj nejin amatajkuilol kinextia ke José kuali kiixmatia tein momattoyaj kichiuaskej akin nemiaj Egipto.
Ne uejkauj, akin nemiaj itech seki xolalmej uan no hebreos kikauayaj maj moskalti inintentson. Sayoj ke, itech amatajkuilol Comentario exegético y explicativo de la Biblia moijtoua ke sayoj akin nemiaj Egipto kiuelitayaj motekiliskej nochi inintentson.
¿Sayoj kitekiaj nochi inintentson? Itech amaix Biblical Archaeology Review moijtoua ke akin nemiaj Egipto, xa momattoyaj kuali mochijchiuaskej achto ke yaskiaj iixpan faraón porin kemej yeskia kalakiskiaj itech se templo. Komo ijkon, José xa kitekik nochi tsonti tein kipiaya imetsko hasta itsontekon.
w09 15/11 pág. 28 § 14
Tiitekitikauan Dios moneki tiknextiskej ke titepoujkaitaj
14 Ne uejkauj, itekitikauan Dios kalijtik kinmachtiayaj ininkoneuan maj kinpoujkaitanij oksekin. Génesis 22:7 kinextia keniuj Abrahán uan Isaac kuali monojnotsayaj uan kinextiayaj ke motasojtayaj. José no kinextij ke itatuan kuali kimachtijkaj maj tepoujkaita, porin keman tsaktoya kinpoujkaitak oksekin akin no tsaktoyaj (Gén. 40:8, 14). No kinextij ke kimattoya tein monekia kichiuas keman moajsiskia iixpan se ueyichiujkej porin kinojnotsak faraón ika poujkaitalis (Gén. 41:16, 33, 34).
Tein moixtajtoltia itech Biblia
(GÉNESIS 40:1-23) Miak tonalmej satepan, takat akin kinixyekanaya akin kitayilmakayaj tekiuaj ompa Egipto uan takat akin kinixyekanaya akin kichijchiuayaj pantsin, tajtakojkej iixpan tekiuaj ompa Egipto. 2 Faraón kiyolkokoj tein kichiujkej akin kinixyekanaya akin kitayilmakayaj uan akin kinixyekanaya akin kichijchiuayaj pantsin. 3 Yejua ika, kintsakuak ichan akin kinixyekanaya tateuianij, kampa tsaktoya José. 4 Akin kinixyekanaya tateuianij kinauatij José maj yetoni iniuan nejon takamej uan maj kinyekpiani, uan yejuan kisentokakej tsaktoyaj seki tonalmej. 5 Se youak, takat akin tetayilmakaya uan takat akin kichijchiuaya pantsin uan kitekitiliayaj tekiuaj ompa Egipto, kikochitakej sejse taman keman tsaktoyaj. Sejse taman tein kikochitakej tataman tein kijtosnekia. 6 Mostika kualkan, keman José kalakik kampa yejuan moajsiaj, kiitak ke tayokoxtoyaj. 7 Yejua ika, kintajtanij nejin ome itekitikauan faraón akin iuan tsaktoyaj ichan iteko José: “¿Keyej nantayokoxtokej?”. 8 Yejuan kiluijkej: “Tiomen titakochitakej, sayoj ke amo akin ueli techiluia tein kijtosneki”. José kiniluij: “Dios kimati tein kijtosneki nochi taman. Ika kualtakayot, xinechiluikan tein nankikochitakej”. 9 Takat akin kinixyekanaya tetayilmakanij kiluij José tein kikochitaka. Yejua kiluij: “Nikochitak ke noixpan moajsia se kouit tein kitemaka uvas 10 uan kipiaya eyi imakoujyo. Nejon kouit xiujyouak, kitemakak xochimej uan peuak takij uvas. 11 Nimaktoya icopa faraón. Yejua ika, nikintekik uvas uan nikinmapatskak itech icopa faraón. Satepan, nikmakak icopa faraón”. 12 José kiluij: “Yejua nejin kijtosneki tein tikochitak. Eyi imakoujyo kouit kijtosneki eyi tonalmej. 13 Itech eyi tonal, faraón mitskixtis uan oksepa mitsmakas tekit tein tikpiaya. Oksepa tiktayilmakas faraón kemej achto tikchiuaya. 14 Sayoj ke, xinechelnamiki keman kuali tiyetos. Ika kualtakayot, xiknexti ke semi tinechtasojta uan xinechtajtoui iuan faraón uan ijkon nechkixtiskej nikan. 15 Nechichtekkej itech ininaltepeuj hebreos, uan nikan nechtsakkej maski amo teyi nikchiuani”. 16 Keman akin kinixyekanaya akin kichijchiuayaj pantsin kikakik ke José kijtojka ke mochiuaskia tein kuali, kiluij: “Nejua no nitakochitak uan nikitak ke nokuako nikpiaya eyi chikiuit ika pantsin tein istak. 17 Chikiuit tein moajsia tapani kipiaya tataman pantsin tein kikuaskia faraón, uan totomej kikuayaj tein kipiaya chikiuit”. 18 José kiluij: “Yejua nejin kijtosneki tein tikochitak. Eyi chikiuit kijtosneki eyi tonalmej. 19 Itech eyi tonal, faraón mitskechkotonas uan mitspilos itech se kouit, uan totomej mitskuaskej”. 20 Eyi tonal satepan faraón xiujajsik. Yejua ika, faraón kichiuak se iluit uan kinyoleuak nochin akin kitekitiliayaj. Uan ininixpan nochin kintatitauij akin kinixyekanaya tetayilmakanij uan akin kinixyekanaya akin kichijchiuayaj pantsin. 21 Ompa, faraón oksepa kimakak tekit tein kipiaya akin kinixyekanaya tetayilmakanij, uan yejua kisentokak kitayilmakak faraón. 22 Sayoj ke, faraón tanauatij maj kipilouanij akin kinixyekanaya akin kichijchiuayaj pantsin, ijkon kemej José kijtojka ke kijtosnekia tein kikochitakaj. 23 Sayoj ke, akin kinixyekanaya tetayilmakanij kielkauak José uan amo kielnamikikok.
TONEMILIS KEMEJ ITATOJTOKAKAUAN CRISTO
Nemachtil ika Biblia itech nechikol
Pascua tein mochiuas achto ke Jesús momikilis
¿Toni xa kichiua Jesús tonal miércoles 12 metsti nisán, uan keyej?
¿Keyej mosentiliaj taixyekananij judíos, uan keyej kinitati Judas?
¿Akonimej kintitani Jesús maj yakan Jerusalén tonal jueves, uan toni kichiuaj keman ajsij?
25-31 METSTI MAYO
TAMACHTILIS TEIN KIPIA BIBLIA | GÉNESIS 42, 43
Maj tiktemokan tamachtilis ika nejmachkayot
it-2 pág. 873 § 5
Rubén
Rubén kinextij seki taman tein kuali. Yejua oksepa kinekia ichtaka kimakixtis José. Yejua ika, semi kiniluij nueve iikniuan maj amo kimiktianij, ta maj kipantamotanij itech se ostok (Gé 37:18-30). Panoua veinte xiujmej satepan, iikniuan José kinemilijkej ke kinpantijkaj ke katkaj tapijpianij ompa Egipto porin amo kiiknelijkaj José. Ijkuak, Rubén kinelnamiktij ke yejua amo kinpaleuijka ika tein kinekiaj kichiuiliskej José (Gé 42:9-14, 21, 22). Satepan, keman Jacob amo kikauak maj Benjamín yani iniuan iikniuan keman mokepaskiaj Egipto, Rubén kintemakak ome ikoneuan uan kijtoj: “Uelis tikinmiktis ome nokoneuan komo amo nimitsualkuilia [Benjamín]” (Gé 42:37).
w04 15/1 pág. 29 § 1
Tein moixtajtoltia itech amatajkuilol Génesis (taxelol 2)
43:32. ¿Keyej akin kayomej Egipto kintajyaltiaya takuaskej iniuan hebreos? Xa porin kinchikoitayaj uan amo kuali kiitayaj inintaneltokalis hebreos. Akin kayomej Egipto no kintajyaltiaya akin kinyekpiayaj borregos (Génesis 46:34). ¿Keyej? Xa porin akin kayomej Egipto kiitayaj ke akin kinyekpiayaj borregos amo teyi chiuanimej katkaj, oso xa kintauelitayaj akin kitemouayaj xiuit tein ika takuaskiaj ininborregos, porin amo semi kipiayaj talmej kampa tatokaskiaj.
Tein moixtajtoltia itech Biblia
(GÉNESIS 42:1-20) Keman Jacob kimatik ke onkaya takual ompa Egipto, kiniluij ikoneuan: “¿Keyej sayoj nanmoitstokej uan amo teyi nankichiuaj?”. 2 Uan no kiniluij: “Nitekakilij ke onkak takual ompa Egipto. Xitemokan ompa uan xikouatij tatet tein ika timoixpanoltiskej uan amo timayanmikiskej”. 3 Yejua ika, majtakti iikniuan José kikouatoj tatet ompa Egipto. 4 Sayoj ke, Jacob amo kikauak maj Benjamín, iikniuj José, kinuikani iikniuan porin kijtouaya: “Xa kipanos teisa uan momikilis”. 5 Ikoneuan Israel kikouatoj tatet ompa Egipto iniuan oksekin akin no takouatoj, porin ompa Canaán amo onkayaok tein kikuaskiaj. 6 José yejua akin kiixyekanaya nochi tein mochiuaya Egipto uan no kinnamakiltiaya tatet akin ualeuayaj itech nochi taltikpak. Yejua ika, iikniuan José yajkej kampa yejua moajsia uan moixpilojkej iixpan hasta talpan. 7 Keman José kinitak, niman kinixmatik iikniuan, uan amo kiniluij ke katka ininikniuj. Ompa, kinchikaujkailuij: “¿Kani nankayomej?”. Yejuan kiluijkej: “Tikayomej Canaán uan tikouakoj takual”. 8 Yejua ika, José kimatik ke katkaj iikniuan, sayoj ke yejuan amo kiixmatkej. 9 José niman kielnamikik keniuj kinkochitaka achto uan kiniluij: “¡Nantapijpianij! ¡Nankiitakoj tein uelis nantechchiuiliskej itech toaltepeuj!”. 10 Yejuan kiluijkej: “Amo noteko. Tejuan timotakeualuan uan tikouakoj takual. 11 Sayoj se topaj. Tejuan timelaujkanemij. Tejuan timotakeualuan uan amo titapijpiakoj”. 12 José kiniluij: “¡Nanechkajkayaujtokej! ¡Nankiitakoj tein uelis nantechchiuiliskej itech toaltepeuj!”. 13 Sayoj ke, yejuan kiluijkej: “Timotakeualuan doce tiiknimej. Sayoj se topaj uan nemi Canaán. Xokoyot mokauak iuan topaj uan okse tokniuj amo yetokok touan”. 14 Sayoj ke, José kiniluij: “Nikijtojya: ‘¡Nantapijpianij!’. 15 Nikitati ox melauak tein nankijtouaj. Nanmechyekiluia itokaykopa faraón ke amo nankisaskej hasta maj uiki nanmokniuj akin xokoyot. 16 Semej namejuan maj kitemoti nanmokniuj uan oksekin maj nikan tsaktokan. Ijkon nikitas ox nannechkajkayaujtokej. Maj momikili faraón komo amo nannechkajkayaujtokej, porin namejuan nantapijpianij”. 17 Keman José kijtoj nejon, kintsakuak eyi tonal. 18 Eyi tonal satepan, José kiniluij: “Nejua nikmoujkatoka Dios. Yejua ika, xikchiuakan tein namechiluia uan nankisentokaskej nannemiskej. 19 Komo amo nantakajkayauaj, semej namejuan maj nikan tsakto uan oksekin uelis yaskej uan kiuikaskej tatet tein ika moixpanoltiskej nanmochankauan. 20 Satepan, xikualuikakan nanmokniuj akin xokoyot uan ijkon nankinextiskej ke amo nantakajkayauaj, uan amo nanmikiskej”. Yejuan kichiujkej tein José kiniluij.
TONEMILIS KEMEJ ITATOJTOKAKAUAN CRISTO
Nemachtil ika Biblia itech nechikol
Kinmachtia maj yolyemankej keman mochiua Pascua achto ke momikilis
Keman Jesús youak takua iniuan itatitaniluan, ¿keniuj kiniluia ke amo uejkaua kimiktiskej?
¿Keyej tetanemililtia maj Jesús kinmetspajpaka itatitaniluan?
¿Toni kinmachtia Jesús itatitaniluan keman kinmetspajpaka?