KAMPA TECHTAPOUIAJ ININNEMILIS
Sayoj nikchiuak tein monekia nikchiuas
DONALD RIDLEY katka se abogado akin kintajtouij itaixpantijkauan Jiova ininixpan tekiuanij panoua treinta xiujmej. Semi tapaleuij maj tapajtianij uan tekiuanij kiajsikamatinij ke komo akin mokokouaj amo kinekij maj kintalilikan esti, moneki kintakamatiskej. No kinpaleuij itaixpantijkauan Jiova maj tataninij ininixpan uejueyi tamelauanij itech tataman xolalmej ompa Estados Unidos. Don, kemej kiixmatiaj akin kuali iuan mouikayaj, semi tekitia, amo moueyimatia uan amo kitayekanaltiaya itanejnekilis.
Itech xiuit 2019, tapajtianij kiluijkej ke kipiaya se kokolis itech itsontekon tein amo miakej kinkui uan amo se pajtiok. Don okachi tanauik uan momikilij itech tonal 16 metsti agosto xiuit 2019. Maj tikitakan tein kipanok itech inemilis.
Niyolik itech xiuit 1954 itech xolal Saint Paul (Minnesota) ompa Estados Unidos. Notatuan katkaj católicos uan maski amo tominpiayaj, amo no kipanouayaj tatasojtilis. Nikinpia naui nokniuan uan nejua niktojtoka akin tayekana. Keman katka niokichpilok nimomachtij kampa tamachtiayaj tiopixkamej uan nikinpaleuiaya keman kichiuayaj misa, sayoj ke amo semi nikixmatia tein tamachtia Biblia. Maski nikneltokaya ke moajsia se Dios akin kichijchiujka nochi tein onkak, amo nikneltokayaok tein tamachtiayaj tiopan.
NIKIXMATI TAMACHTILIS TEIN MELAUAK
Itech yekinika xiuit keman niyajtoya kampa momachtiaj akin kinekij yeskij abogados, tanotskej nochan se takat iuan inamik akin katkaj itaixpantijkauan Jiova. Kemej nitapaktoya, kijtojkej ke ualaskiaj satepan. Keman oksepa ualajkej, nikinchiuilij ome netajtanilmej: “¿Keyej okachi kuali nemij akin amo yolkualmej ke akin yolkualmej?” uan “¿Keniuj uelis tiyolpakiskej?”. Nechmakakej amatajkuilol La verdad que lleva a vida eterna uan Traducción del Nuevo Mundo de las Santas Escrituras, tein xoxoktik katka. No nikiniluij ke kemaj niknekia maj nechmachtikan ika Biblia. Semi nikuelitak tein nechmachtijkej. Nechyolpaktij nikmatis ke iTekiuajyo Dios yejua tekiuajyot tein yekmelauj techpaleuis uan taixyekanas nikan taltikpak. Nikajsikamatik ke inintekiuajyo taltikpakneminij senkis amo tapaleuiani uan kichiuani maj taltikpakneminij kipanokan tein amo kuali uan maj semi tajyouikan.
Nimotemaktij iuan Jiova ipeujyan xiuit 1982, uan no itech nejon xiuit nimoauij itech ueyi nechikol tein uejkaua eyi tonal tein motokaytij “Verdad del Reino” itech estadio St. Paul Civic Center. Se semana satepan, oksepa niyajki ompa porin nikchiuato se examen tein kinextiskia ox ueliskia nimochiuas abogado. Uan ipeujyan metsti octubre nikmatik ke nipanoka.
Itech nejon ueyi nechikol, nikixmatik Mike Richardson, akin tapaleuiaya Betel ompa Brooklyn (Nueva York), uan nechiluij ke ompa Betel moixtalijka se yankuik tekit kampa moajsiskiaj tokniuan akin kintajtouiskiaj itaixpantijkauan Jiova ininixpan tekiuanij. Nikelnamikik tein kijtoj ueyichiujkej etíope itech Hechos 8:36 uan nimotajtanij: “¿Uelis nitapaleuis kampa kintajtouiskej tokniuan ininixpan tekiuanij?”. Yejua ika niktitanik amat tein ika nitajtanik nitekitis Betel.
Notatuan amo kinyolpaktij maj nimochiuani itaixpantijkauj Jiova. Nopopaj nechtajtanij keniuj nechpaleuiskia nitekitis Betel itech tekit tein nikpiaya kemej abogado. Niknankilij ke sayoj nitapaleuiskia uan mejmetstika nechmakaskiaj tepitsin tomin, kemej nochin oksekin akin ompa tapaleuiayaj.
Kemej monekiaok niktamichiuas tekit tein nikpiaya kampa moajsij uejueyi tamelauanij, amo uelik niman niyajki Betel ompa Brooklyn. Peuak nitapaleuia ompa itech xiuit 1984. Nechixtalijkej maj nitekiti kampa kintajtouiaj itaixpantijkauan Jiova ininixpan tekiuanij. Tekit tein nikpiaya achto nechpaleuij maj nikmatini keniuj nitapaleuis maj moyektaliani se kuejmol tein panok satepan.
KIYEKCHIJCHIUAJ TEATRO STANLEY
Kemej moitaya Teatro Stanley keman kikoujkej
Itech metsti noviembre xiuit 1983, itaixpantijkauan Jiova kikoujkaj Teatro Stanley, tein moajsi Jersey City (Nueva Jersey). Kemej tokniuan kinekiaj kiyektaliskej kampa panoua at uan luz, kintajtanijkej tekiuanij maj kinkauanij. Keman iniuan tajtojkej, kiniluijkej ke itaixpantijkauan Jiova kinekiaj ompa kichiuaskej ininuejueyi nechikoluan. Sayoj ke panok se taman. Tanauatilmej tein kitalijkaj tekiuanij ompa Jersey City kijtouayaj ke kalmej kampa se taueyichiua sayoj monekia moajsiskej kampa nemiaj taltikpakneminij. Uan kemej Teatro Stanley yetoya kampa tanamakayaj, tekiuanij amo kinkaujkej maj kiyektalikan. Tokniuan tajtankej maj mopatani tein kiixtalijkaj, sayoj ke yejuan amo kinekkej.
Itech yekinika semana keman niajsik Betel, tikinmatiltijkej nejon kuejmol uejueyi tamelauanij. Kemej nitekitik ome xiuit iniuan uejueyi tamelauanij ompa Saint Paul (Minnesota), kuali nikixmatiaya nejon kuejmolmej. Se toabogado kijtoj ke itech Teatro Stanley mochiujka miak taman kampa miakej mosentilijkaj. Ompa kipanoltijkaj películas uan hasta mosentilijkaj akin kitsotsonaj rock. Komo ijkon, ¿keyej kijtouayaj ke amo kuali yetoya maj mochiuani se ueyi nechikol kampa kiueyichiuaskiaj Dios? Uejueyi tamelauanij kiitakej tein kichiujkaj tekiuanij ompa Jersey City uan kijtojkej ke kitapanauilijkaj tanauatil tein kijtoua ke uelis tikixpejpenaskej totaneltokalis, uan kinnauatijkej tekiuanij maj kinkauanij tokniuan maj tayektalikan. Ijkon peuak nikita ke Jiova kinpaleuia itaixpantijkauan keman kitemouaj maj tekiuanij kinpaleuikan maj kisentoka mochiua itekiyo. Semi nechyolpaktiaya tepitsin nitapaleuis.
Tokniuan peuak kiyekchijchiuaj Teatro Stanley, tein moixmatik kemej Kali kampa mochiuaj Uejueyi Nechikolmej ompa Jersey City. Uan itech tonal 8 metsti septiembre xiuit 1985, keman ayamo ajsia se xiuit, ompa mochiuak nechikol satepan ke tamik tamachtilis tapoual 79 tein motemaka Galaad. Nikitak kemej se ueyi tatiochiualis nikpaleuis inechikol Dios kemej abogado, uan nejin okachi nechyolpaktij ke tekit tein nikchiujka achto ke niajsiskia Betel. Amo nikmatia ke Jiova nechmakaskia okseki tatiochiualismej kemej nejin.
NIKINTAJTOUIA AKIN MOKOKOUAJ UAN AMO KINEKIJ MAJ KINTALILIKAN ESTI
Itech xiujmej 1980 hasta 1989, miakej tapajtianij uan itech tapajtiloyamej kintaliliayaj esti itaixpantijkauan Jiova maski yejuan amo kinekiaj. Siuamej akin yaya kipiatij se konetsin okachi ouij kinkisaya motajtouiskej, porin tamelauanij miakpa kijtouayaj ke yejuan amo monekia kijtoskej maj amo kintalilikan esti, porin komo momikiliayaj, ininkonetsin iselti mokauaskia.
Itech tonal 29 metsti diciembre xiuit 1988, tokniuj siuat Denise Nicoleau semi eskisak satepan ke yolik ikonetsin. Kemej ueliskia momikilis, tapajtijkej kiluij ke kinekia kitalilis esti. Sayoj ke tokniuj amo kinekik. Mostika kualkan, tapajtianij kiluijkej se tamelaujkej maj kinkauani maj kitalilikan esti. Tamelaujkej amo tajtoj achto iuan tokniuj Nicoleau nion inamik, nion kiniluij ke kiixtalijka maj kitalilikan esti.
Viernes 30 metsti diciembre, tapajtianij kitalilijkej esti tokniuj Nicoleau maski inamik uan okseki ichankauan kiniluiayaj maj amo kitalilikan. Uan no, nejon tiotak kintsakkej seki ichankauan uan seki tokniuan tayekananij. Kinpantijkej ke amo kinkauayaj tapajtianij maj ajsinij kampa yetoya tokniuj Nicoleau porin amo kinekiaj maj kitalilikan esti. Mostika kualkan, ompa Nueva York uan itech okseki xolalmej kitematiltijkej itech periódicos, televisión uan radio ke kintsakkaj tokniuan.
Iuan Philip Brumley keman ayamo tikatkaj tixiuejkej
Lunes kualkan nitajtoj iuan Milton Mollen, se okachi ueyi tamelaujkej. Niktapouij tein panoka uan nikiluij ke tamelaujkej akin tanauatijka maj kitalilikan esti tokniuj Nicoleau amo achto tajtoj iuan. Tamelaujkej Mollen nechiluij maj nipanouani tiotakpa kampa tekiti uan ika titajtoskiaj tein panoka uan tikitaskiaj katiyejua tanauatilmej tapaleuiskiaj. Nouan yajki tokniuj Philip Brumley, akin taixyekanaya kampa nitekitia ompa Betel. Tamelaujkej no kiyoleuak abogado akin kintajtouiaya tapajtianij. Semi timotajtolteuijkej, hasta tokniuj Brumley nechijkuilouilij itech icuaderno: “Amo xikualani”. Semi kuali tein nechyolmajxitij, porin kemej niknekia niknextis ke tein kijtouaya okse abogado amo kuali yetoya, peuak nikualani.
Opochmakopa hasta yekmakopa: Richard Moake, Gregory Olds, Paul Polidoro, Philip Brumley, nejua uan Mario Moreno itech tonal keman tiktajtouijkej inechikol Dios ininixpan uejueyi tamelauanij ompa Estados Unidos porin kipiakej se kuejmol iniuan akin taixyekanayaj xolal Stratton (xikonita amaix ¡Despertad! 8 de enero de 2003 página 3, página 4 uan 5, página 6 hasta 8 uan página 9 hasta 11).
Se hora satepan, tamelaujkej Mollen kijtoj ke mostika kualkan tejuan yekinika techkakiskiaj. Keman tikistiyayajya, kijtoj ke ininabogado tapajtianij kipiaskia se ueyi tekit, porin ouij kikisaskia kinextis ke tapajtianij kinnamikia kiixtaliskej keniuj kipajtiskej tokniuj Nicoleau. Nikitak ke Jiova kemej yeskia nechmatiltijtoya ke ueliskia titataniskej. Semi kualtsin katka tikitaskej keniuj Jiova kichiujtoya maj titapaleuikan maj mochiua itanejnekilis.
Semi youakya tikixtalijtoyaj toni tikijtoskiaj mostika. Kemej kampa moajsia Betel ompa Brooklyn amo uejka yetok kali kampa moajsij uejueyi tamelauanij, miakej akin iniuan nitekitia ojtokakej hasta ompa. Satepan ke naui tamelauanij techkakkej, kijtojkej ke amo kuali tein kichiujka tamelaujkej keman tanauatij maj kitalilikan esti tokniuj Nicoleau. Tamelauanij kipaleuijkej tokniuj uan kijtojkej ke komo se tamelaujkej kiixtalia teisa uan amo achto kikaki akin mokokoua kitapanauilia tein yejua kinamiki kiixpejpenas.
Tepitsin satepan, okachi uejueyi tamelauanij ompa Nueva York kijtojkej ke tokniuj Nicoleau kinamikia kiixtalis maj amo kitalilikan esti. Okachi uejueyi tamelauanij ompa Estados Unidos naujpa techpaleuijkej keman tokniuan kipiakej kuejmol ika esti iniuan tapajtianij uan nejin yejua se kampa nikpiak tatiochiualis nitapaleuis (xikonita recuadro “Keman uejueyi tamelauanij kinpaleuijkej tokniuan”). Ompa Betel no nitekitini iniuan okseki abogados keman tokniuan kinekij kinkuiliskej ininkoneuan, keman akin namikyejkej kinekij maj tekiuanij kiixpolokan amat tein kinextia ke monamiktijkaj uan kuejmolmej tein mouika ika talmej uan kalmej.
KEMAN NIMONAMIKTIJ
Iuan nonamik, Dawn
Keman nikixmatik Dawn, kipiaya eyi ikoneuan uan amo nemiaok iuan inamik porin tekiuanij kiixpolojkajya amat tein kinextiaya ke monamiktijkaj. Tekitia uan katka precursora. Maski kipanoka miak ouijkayomej, kitayekanaltiaya kitekitilis Jiova uan nejon semi nechyolnotsak. Itech xiuit 1992, tiyajkej ueyi nechikol tein uejkaua eyi tonal tein motokaytij “Portadores de Luz” ompa Nueva York uan nikiluij ke niknekia okachi nikixmatis. Se xiuit satepan timonamiktijkej, uan nejua niksentokak nitapaleuij Betel. Nikita kemej se inetetayokolil Jiova maj nonamik kiuelita kitekitilis uan maj semi yolpaki. Kemej kijtoua Proverbios 31:12, Dawn nochipa kichiuani maj niyolpaki.
Keman timonamiktijkej, ikoneuan kipiayaj 11, 13 uan 16 xiujmej. Kemej niknekia niyeski se kuali tepopaj, nikixtajtoltij uan nikchiuak nochi tein nikajsik itech toamaixuan kampa ininka tajtoua tetakpatatmej. Ijkon kemej panouanij xiujmej tikpianij ouijkayomej, sayoj ke nechyolpaktia maj nechitakan kemej ininpopaj uan maj kiitakan ke nikintasojta uan ke ueli nouan takuaujtamatij. Nochipa kuali tikinseliayaj akin kuali iniuan mouikayaj uan techyolpaktiaya maj nochipa moajsinij tochan telpochmej uan ichpochmej akin semi yolpakiaj.
Itech xiuit 2013, Dawn uan nejua timokaltalitoj Wisconsin porin monekia tikinyekpiaskej totatuan. Amo nikchiaya maj nechiluianij maj niksentoka nitapaleui Betel seki tonalmej. Nechyoleujkej maj niksentoka nikintajtoui itaixpantijkauan Jiova ininixpan tekiuanij.
MOPATA NONEMILIS
Itech metsti septiembre xiuit 2018, nikitak ke semi nitoskatsakuia nochipa keman niknekia nitajtos. Totapajtijkauj amo uelik nechiluij keyej nechpanouaya nejon. Satepan, itech metsti enero xiuit 2019, okse tapajtijkej nechiluij ke xa nikpiaya se kokolis tein amo miakej kinkui, tein satepan kichiuaskia maj amo ueli nikchiua miak taman.
Eyi tonal satepan, niuetsik keman ninentinemia ika nopatines itech hielo uan postekik noyekmay. Kuali nikmatia keniuj ninentinemis ika patines porin uejkaujya nikchiuaya. Yejua ika nikitak ke amo semi nikpiayaok chikaualis. Okachi nitanaui uan amo semi ueli nitajtouaok, nimooliniaok nion nitatolouaok.
Se ueyi tatiochiualis maj uelini nikpaleuiani inechikol Jiova kemej abogado. No se ueyi tatiochiualis maj uelini nikijkuilouani miak tamachtilismej tein kiskej itech amaixmej tein kiixtajtoltiaj tapajtianij, abogados uan tamelauanij. No niktemakak tanojnotsmej itech nochi taltikpak kampa niknextij ke itaixpantijkauan Jiova kinnamiki kiixtaliskej keniuj kinekij maj kinpajtikan uan maj amo kintalilikan esti. Maski ijkon, kemej kijtoua Lucas 17:10, sayoj nitakeual uan amo nechnamiki nikselis nion teyi; sayoj nikchiuak tein monekia nikchiuas.