KENIUJ TIKCHIUASKEJ MAJ MOTSAKUILI NETAUELITALIS

1 | Amo xiontechikoita

Biblia kijtoua:

“Dios amo techichikotasojta, ta kintasojta akin kimoujkatokaj uan kichiuaj tein kuali yetok maski kampa yeski kayomej” (HECHOS 10:34, 35, TNM).

¿Toni kijtosneki?

Jiovaa amo techchichikotasojta maski kampa yeski tikayomej, tataman kemej tiixtamatij, tichijchipaujkej, titiltikej oso kemej tinemij. Ta kiita tein yekmelauj moneki, tein kijtosneki tein tiknemiliaj uan tikmachiliaj. Biblia kijtoua: “Taltikpaknenkej kiita sayoj tein moita tapani, sayoj ke Jiova kiita iyolo taltikpaknenkej” (1 Samuel 16:7).

Uelis tikonchiuas nejin:

Maski amo senkis ueli tikinixmatij taltikpakneminij no uelis amo tikinchikoitaskej kemej Jiova kichiua. Xionmochikaua amo tikinitas oksekin kemej miakej kinitaj ta kemej tanemiliaj sejsemej. Komo tikonita ke tikinchikoita oksekin, xa porin taman ixtamatij oso okseko kayomej, xikontajtani Dios maj mitsonpaleui amo xikinchikoitaok (Salmo 139:23, 24). Xiontakuaujtamati ke yejuatsin mitsonpaleuis (1 Pedro 3:12).

a Jiova yejua itokay Dios (Salmo 83:18).

“Amo keman nitajtojtoya iuan aksa akin chijchipauak […]. Axkan nimoajsiaya iniuan miakej tokniuan akin seseko kayomej” (TITUS).

Tein sekin kinpanouani: TITUS

Mochikauak amo tetauelitasok

Titus mouikaya iniuan akin semi tateuiayaj uan amo kiuelitayaj tanauatilmej tein tekiuanij kiixtalijkaj tein ika kinchikoitayaj uan kintajyouiltiayaj akin taman ixtamatij. Yejua kijtoua: “Tiayaj itech hoteles uan kampa ueliskia timoixpetaniskej, sayoj ke kemej titiltikej amo kuali techseliayaj, yejua ika titateuiayaj”. Titus kiajsikamatik ke semi tetauelitaya. Kijtoua: “Nochipa keman nimotajtolteuiaya iuan se siuat oso se takat, nejua achto nikmaaya”.

Keman Titus peuak momachtia Biblia iniuan itaixpantijkauan Jiova, inemilis peuak mopata. Semi kipaleuij kileros Biblia. Se taman tein semi kiyololinij yejua kimatis tein mochiuas itech taltikpak, ke amo uejkaua “amo akin momikilisok, nion tayokoyas nion chokas nion tajyouis” (Apocalipsis 21: 3, 4).

Yekinika semi kiouijmakak amo tetauelitasok. Kijtoua: “Nikpatas tein niknemiliaya uan tein nikchiuaya semi ouij nechkisak”. Sayoj ke semi kipaleuij tein kijtoua Hechos 10:34, 35, ke Dios amo techichikotasojta.

¿Toni panok satepan? Titus techtapouia: “Keman nikitak keniuj motasojtaj itaixpantijkauan Jiova maski ixtatamamej, chijchipaujkej oso tiltikej, senkis nikneltokak ke yejua taneltokalis tein melauak uan ke kichiuaj tein momachtiaj. Uan hasta achto ke nimoauiskia se tokniuj akin chijchipauak nechyoleuak maj nitakuati ichan. Amo uelia nikneltokaya porin amo keman nitajtojtoya iuan aksa akin chijchipauak uan nion no para iuan nitakuas. Axkan nimoajsiaya iniuan miakej tokniuan akin seseko kayomej”.