¿Keyej semi onkak netauelitalis?

Itech taltikpak semi onkak netauelitalis tein amo keman tami. ¿Keyej ijkon panoua? Tikmatiskej tanankilil komo tikajsikamatij toni netauelitalis, keyej peuaj miakej motauelitaj uan keniuj momoyaua.

¿Toni netauelitalis?

Netauelitalis se taman tein semi chikauak tein se kimachilia tein kichiua maj se kichikoita oso maj se kiixtopeua aksa oso miakej. Uan okachi chikauak ke sayoj se kualantos iuan aksa seki tonalmej.

¿KEYEJ PEUAJ MIAKEJ MOTAUELITAJ?

Onkak miak taman tein kichiua maj motauelitakan. Miakpa kintauelitaj oksekin amo ika tein kichiuaj, ta porin kemej tamatij. Xa kinitaj ke amo yolkualmej uan kinemiliaj ke amo keman mopataskej. Oso xa kinitaj ke amo teyi chiuanimej, ke uelis teijtakoskej oso ke yejuan kipeualtiaj miak kuejmolmej. Uan no, miakej tetauelitaj porin sekin kintajyouiltijkej, kinchiuilijkej tein amo kuali oso okseki taman.

¿KENIUJ MOMOYAUA NETAUELITALIS?

Kemansa, miakej kitauelitaj aksa maski amo kiixmatij. Kemej neskayot, sekin kiseliaj tein kinijtouiliaj oksekin porin akin kijtoj se akin kitasojtaj oso kipoujkaitaj. Yejua ika, keman nochin peuaj ijkon tanemiliaj, ijsiujka momoyaua netauelitalis.

Keman tikmatij keniuj ijsiujka momoyaua netauelitalis, tikajsikamatij keyej miakej tetauelitaj. Sayoj ke uelis tiktsakuiliskej netauelitalis komo tikmatij kani peua. Biblia kijtoua keniuj peuak netauelitalis.

BIBLIA KIJTOUA KENIUJ PEUAK NETAUELITALIS

Se diagrama youaltik ika flechas tein kinextia keniuj mochiujtiuj netauelitalis. 1. Takajkayaualis ualeua itech redes sociales, kampa kitematiltiaj tanauatilmej uan keman techchikaujkauiaj oksekin. 2. Amo tikmatij keniuj nemij, tein kichiuaj uan tein kineltokaj. 3. Tikmouiliaj maj mopata teisa, maj tikpolokan teisa, tein amo tikixmatij. 4. Netauelitalis kichiua maj onka tachikoitalis, maj amo kinyekitakan oksekin uan tateuilis.

TALTIKPAKNEMINIJ AMO YEJUAN AKIN YEKINIKA PEUAK TETAUELITAJ. Ta peuak ompa iluikak keman se ángel akin moixmati kemej Amokuali Satanás kiixnamikik Dios. Keman peuak taixnamiki, mochiuak se temiktijkej. Kemej “yejua se takajkayaujkej uan yejua inintat akin takajkayauaj”, kisentoka kichiua maj onka netauelitalis uan neteuilis (Juan 8:44; 1 Juan 3:11, 12). Biblia tamachtia ke tateuia, tetajyouiltia uan ke semi kualantok (Job 2:7; Apocalipsis 12:9, 12, 17).

KEMEJ TITAJTAKOUANIJ, AMO OUIJ TECHKISA TITETAUELITASKEJ. Yekinika takat, Adán, kichiuak ijkon kemej Satanás, yejua ika tinochin tikpiaj tajtakol (Romanos 5:12). Caín, itayekankakoneuj Adán, kitauelitaya Abel uan maski katka iikniuj, kimiktij (1 Juan 3:12). Tein melauj, maski titetasojtaj uan titeikneliaj, kemej tinochin titajtakouanij, okachi ijsiujka miakej mochiuaj xijxikuimej, nexikolmej uan moueyinekij tein kichiua maj okachi onka netauelitalis (2 Timoteo 3:1-5).

AKIN AMO KIUELITA MAJ OKSEKIN TATAMAMEJ OKACHI IJSIUJKA TETAUELITA. Nejin taltikpak kimoyaua amo kuali tachiualismej tein tetajyouiltiaj, tein kichiua maj titetauelitakan. Kemej “nochi taltikpak moajsi imako Amokuali” oso Satanás, miakej kintauelitaj akin tatamamej, techikoitaj, teuijuikaltiaj, tekuejmolouaj uan kichiuaj tein amo kuali (1 Juan 5:19).

Biblia amo sayoj kijtoua keniuj peuak netauelitalis, ta no kijtoua keniuj moyektalis.