Okachi momiakilijtokej akin kipiaj se kokolis itech inintanemilil
“Nochipa semi nitanemilijtok uan nikneki nikchiuas miak taman”.
“Keman nesi ke nochi kuali yetok, nimotekipachoua. Porin nikmati ke oksepa nitayokoyas”.
“Nimochikaua amo nimotekipachos ika tein panos mosta, sayoj ke miakpa nechtekipachoua tein panos satepan”.
Akin kijtojkej nejin, kipiaj se kokolis itech inintanemilil. ¿No ijkon tionmomachiliani kemej yejuan oso tikonixmati aksa akin no ijkon kipanoua?
Komo ijkon, ¿tikonmatia ke amo sayoj tejuatsin ijkon tionmomachilia? Noyampa taltikpak miakej kipiaj se kokolis itech inintanemilil oso oksekin tajyouiaj porin semej ininchankauan kipiaj nejin kokolis.
Nochi nejin kinextia ke tinemij itech tonalmej tein semi ouijkej uan tamouililmej, yejua ika onkak miak taman tein kichiua maj semi timotekipachokan uan maj titajyouikan (2 Timoteo 3:1). Organización Mundial de la Salud kijtoua ke 1 de 8 takamej oso siuamej, kipia se kokolis itech itanemilil. Uan no, ika ueyi kokolis COVID-19, itech xiuit 2020 momiakilijkej kemej 26% akin semi motekipachouaj uan akin kipiaj trastornos depresivos graves momiakilijkej 28%.
Sayoj ke, amo tayekantok tikonmatis kanachimej kipiaj nejin kokolis. Ta tein okachi moneki yejua tikonmatis toni uelis tikonchiuas tein kinpaleuis mochankauan uan tejuatsin, para kuali ximomachilikan.
¿Keniuj tikmatij ke amo tikpiaj se kokolis itech totanemilil?
Keman aksa amo kipia se kokolis itech itanemilil, kuali momachilia uan no kuali kichiua itekiuj. Ueli kiixnamiki ouijkayomej tein mojmostaj kipia, kuali tekiti uan kuali momachilia ika nochi tein kichiua.
¿Toni kichiua akin kipia se kokolis itech itanemilil?
Nejin amo kijtosneki ke aksa amo chikauak.
Kemaj se kokolis, tein uelis kichiuas maj aksa semi motekipacho, kipata kemej tanemilia, amo ueli kitsakuilia tein kimachilia uan tein kichiua.
Miakpa kiouijkisa kuali mouikas iniuan oksekin uan no kichiuas ichiualis.
Nejin kokolis uelis kipanos akin yeski, maski tein yeski xiujmej kipias, kampa yeski nemis, kemej ixtamati, itaneltokalis, nemachtil tein kipias oso maski kipias tomin oso amo.
Xikontemo nepaleuil
Kemansa aksa uelis peuas kipatas kemej achto katka, xa amo takuaok nion kochi kemej achto, xa uejkaujya motekipachojtok oso tayokoxtok. Komo mitsonpanoua nejin oso aksa akin tikonixmati, xa monekis yas iuan tapajtijkej para kimatis keyej ijkon momachilia uan maj kimakakan pajti. Sayoj ke ¿kani uelis mitsonpaleuiskej?
Jesucristo akin okachi tamatkej akin nemini nikan taltikpak, kijtoj: “Akin paktokej amo moneki maj kiitatij tapajtijkej, sayoj ke akin mokokouaj kemaj” (Mateo 9:12). Ika inepaleuil se tapajtijkej akin kimati de nejin kokolis, uelis okachi kuali momachilijtias uan yolpakis kemej achto. Komo yankuixtok oso uejkaujya tikonmachiliani ke tikonpia nejin kokolis, okachi kuali niman xionyoui iuan tapajtijkej.a
Biblia amo ika tajtoua tapajtilis, sayoj ke tein kijtoua uelis techpaleuis maj kuali timomachilikan. Okseki tamachtilismej ika tajtouaj keniuj Biblia uelis techpaleuis maj tikixnamikikan se kokolis itech totanemilil. Uelis tikonleros.
a Amaix Tanejmachtijkej amo kijtoua keniuj timopajtiskej. Sejsemej moneki kiitaskej katiyejua okachi kinpaleuis.