2 | “Itajtol Dios techyolseuia”

BIBLIA KIJTOUA: “Nochi tein ne uejkauj moijkuiloj, moijkuiloj para techmachtis. Uan tikchiaj tein kuali porin itajtol Dios techyolseuia uan techpaleuia maj titaxikokan” (ROMANOS 15:4).

¿Toni kijtosneki?

Biblia kipia tanemililmej tein kichiuaj maj kuali timomachilikan, maj titaxikokan uan techpaleuia maj amo tiknemilikan ke amo teyi tichiuanimej. Uan no kijtoua ke amo uejkaua, ixpoliuis tein kichiua maj amo kuali timomachilikan.

¿Keniuj techpaleuia?

Tinochin titayokoyaj uan timotekipachouaj, sayoj ke akin kipiaj depresión oso ansiedad xa mojmostaj moneki kiixnamikiskej nejin. ¿Keniuj uelis kinpaleuis Biblia?

Biblia kipia tanemililmej tein semi teyolchikauaj, tein tapaleuiaj maj amo tiknemilikanok tein kichiua maj amo kuali timomachilikan (Filipenses 4:8). No techpaleuia maj tikpiakan tanemililmej tein kichiuaj maj kuali timomachilikan uan no maj tiktsakuilikan tein amo kuali tein uelis tiknemiliskej (Salmo 94:18, 19).
Biblia techpaleuia maj amo tiknemilikan ke amo teyi tichiuanimej (Lucas 12:6, 7).
Biblia ininka tajtoua miakej, tein kinpanok kinextia ke amo tietokej toselti uan ke Dios akin techchijchiuak kuali kimati keniuj timomachiliaj (Salmo 34:18; 1 Juan 3:19, 20).
Biblia kijtoua ke Dios kichiuas maj amo tikelnamikikanok nochi tein amo kuali tein achto techpanok (Isaías 65:17; Apocalipsis 21:4). Komo tikpiaj tanemililmej tein kichiuaj maj amo kuali timomachilikan, xa tein kijtoua Biblia uelis techpaleuis maj tikixnamikikan.

Keniuj Biblia kipaleuia Jessica

Keniuj nechijtakoua depresión

“Keman nikpiaya 25 xiujmej peuak amo kuali nimomachilia uan nechiluijkej ke nikpiaya depresión grave. Semi nitajyouiaya porin maski amo niknekia, peuaya nikelnamikia tein amo kuali tein achto nechpanok uan amo uelia niktsakuiliaya. Tapajtianij nechiluijkej ke kemej achto nitajyouij nochi nejon kichiuak maj nikpia tanemililmej tein amo tapaleuiaj uan yejua ika nikpiaya depresión. Monekik maj nechmakakan pajti tein nechpaleuiskia uan no nitajtos iuan se tapajtijkej akin nechpaleuiskia maj amo nikpia nejon tanemililmej tein nechijtakojtoyaj”.

Keniuj nechpaleuia Biblia

“Keman okachi chikauak nikmachiliaya depresión, kichiuaya maj niyolmoui, niktelnejnekia nikchiuas teisa uan amo uelia nikochia. Miakpa keman yaya nikochitia semi nimotekipachouaya porin sayoj nitanemilijtoya. Sayoj ke, kemej kijtoua Salmo 94:19, Dios techyolseuia uan kichiua maj kuali timomachilikan keman semi timotekipachojtokej. Yejua ika, itech nocama nikpiaya se Biblia uan se libreta kampa nikijkuilojka seki textos tein semi nechyolchikauayaj. Ijkon keman amo uelia nikochia, nikauaya maj Dios nechyoseuiani ika iTajtol.

”Biblia kijtoua maj tikixtopeuakan tanemililmej tein tikmatij ke Dios amo kiuelita. Nejua achto niknemiliaya ke amo teyi nichiujkej katka uan ke amo nechnamikia maj nechtasojtakan. Sayoj ke nikitak ke nejon amo yejua tein tamachtia Biblia, porin ompa kijtoua ke Dios se tePopaj akin tetasojta, teiknelia uan toka motekipachoua. Ijkon peuak niktsakuilia tein niknemiliaya uan amo niknemiliayaok tein kichiuaya maj amo kuali nimomachili. Axkan nochipa nikelnamiki ke Dios nechpatiuita, nejin semi nechpaleuiani maj amo niknemilijto ke amo teyi nichiujkej.

”Nikneki maj ejkoya tonal keman amo nikelnamikisok tein achto nechtajyouiltij nion tanemililmej tein kichiuaj maj amo kuali nimomachili. Nikmati ke amo uejkaua, kokolis tein nikpia ixpoliuis uan nejon nechpaleuia maj ueli nikxiko, hasta keman ejkos tonal keman amo nikpiasok depresión”.