3 | Biblia ika tajtoua seki itekitikauan Dios

BIBLIA ININKA TAJTOUA SEKI ITEKITIKAUAN DIOS: Akin katkaj “kemej tejuan” (SANTIAGO 5:17).

¿Toni kijtosneki?

Biblia ininka tajtoua miakej takamej uan siuamej, akin tataman kemej momachiliayaj. Komo timomachtiaj tein kinpanok, xa tikajsiskej aksa akin momachiliaya kemej tejuan.

¿Keniuj techpaleuia?

Tinochin tiknekij maj oksekin kimatikan keniuj timomachiliaj, uan okachiok keman tikpiaj se kokolis itech totanemilil, xa keman tikleroskej tein sekin kipanokej tikitaskej ke yejuan momachiliayaj kemej tejuan. Nejin techpaleuis maj tikitakan ke amo sayoj tejuan ijkon timomachiliaj, keman semi timotekipachouaj uan tiknemiliaj ke amo teyi tichiuanimej.

Biblia ininka tajtoua seki takamej, akin kimachiliayaj ke amo ueliajok ika tein kipanouayaj. Xa kemansa tikonijtouani: “Amo nitaxikouaok, nikuelitaskia maj amo kisentokaok nejin kuejmol”. Ijkon momachilijkej Moisés, Elías uan David (Números 11:14; 1 Reyes 19:4; Salmo 55:4).
Biblia ika tajtoua Ana, se siuat akin semi tayokoxtoya porin amo uelia kinpiaya konemej, uan no, se siuat akin kitauelitaya semi kikejkelouaya (1 Samuel 1:6, 10).
Biblia no ika tajtoua Job uan xa no tionmomachilis kemej yejua. Maski semi takuaujtamatia iuan Dios, yejua amo kuali momachiliaya uan kijtoj: “Niktauelita nonemilis uan amo nikneki niksentokas ninemisok” (Job 7:16).

Sayoj ke yejuan uelik kuali momachilijkej. Tejuan no uelis kuali timomachiliskej komo tikchiuaj kemej yejuan.

Keniuj Biblia kipaleuia Kevin

Keniuj nechijtakoua trastorno bipolar

“Keman yaya nikajxititia 50 xiujmej nechiluijkej ke nikpiaya nejin kokolis. Kemansa nikmachilia ke nochi ueli nikchiua, sayoj ke kemansa niknemilia ke nenkaj ninemi”.

Keniuj nechpaleuia Biblia

“Nimomachilia kemej tatitanil Pedro. Yejua kemansa kinemiliaya ke nenkajsaj nemia porin miakpa mopolojka. Sayoj ke amo ijkon mokauak, ta kitemoj maj kipaleuikan akin iniuan kuali mouikaya. Nejin kokolis kemansa kichiua maj semi nitajyoui, ijkuak semi nikita nonepololuan uan niknemilia ke nenkajsaj ninemi. Sayoj ke, ijkon kemej kichiuak Pedro, nejua no niktemoua ininnepaleuil akin kuali iniuan nimouika, yejuan semi nechyolchikauaj uan ijkon kuali nimomachilia.

”No nitanemilia itech tein kipanok tekiuaj David. Kuejmolmej tein kipiaya kichiuaya maj semi tayokoya uan no motayokoltiaya porin mopolojka. Kemansa no ijkon nimomachilia, nimotayokoltia porin nikchiuak oso nikijtoj se taman tein amo monekia. Tein kijkuiloj David itech Salmo 51 kichiua maj kuali nimomachili. Itech versículo 3, kijtoj: ‘kuali nikmati ke nitajtakolchiuak uan notajtakol nochipa nikelnamiktok’. Ijkon nimomachilia keman nitayokoxtok, sayoj nikitstok nepololmej tein nikpia. Sayoj ke ijkuak niknemilia itech tein kijtoua versículo 10: ‘Xinechmaka se yolo chipauak, noDios, uan xikchiua maj niknejneki nikchiuas tein kuali, maj amo keman nimitskaua’. No nejon niktajtania Dios, maj nechpaleui maj niyolpaki. Uan versículo 17 no semi nechyolchikaua, ompa kijtoua: ‘se yolo tein tayokoxtok uan motekipachojtok, noDios, amo tikixtopeuas’. Nochipa keman nikleroua nikelnamiki ke Jehová nechtasojta.

”Keman nikita itech Biblia tein kinpanok akin nenkej ne uejkauaj uan nochi tein Dios nechmakani, okachi nitakuaujtamati iuan. Nejin nechpaleuia maj niksentoka nitaxikojto porin nikita ke yekmelauj mochiuas tein kijtoua Biblia”.