1 | Netataujtil: “Xikauilikan nochi tein namechtekipachoua”

BIBLIA KIJTOUA: “Uan no, xikauilikan nochi tein namechtekipachoua porin yejua kiyolmachilia tein namechpanotok” (1 PEDRO 5:7).

¿Toni kijtosneki?

Jehová techiluia maj tikiluikan tein yeski kuejmol tein tikpiaskej oso nochi tein techtekipachoua (Salmo 55:22). Uelis tikiluiskej Dios tein yeski kuejmol tein tikpiaskej. Komo tejuan techtekipachoua, Jehová no kitekipachoua. Se motataujtis yejua yekinika taman tein techpaleuis maj kuali timomachilikan (Filipenses 4:6, 7).

¿Keniuj techpaleuia?

Keman tikpiaj se kokolis itech totanemilil, xa tikmachiliskej ke tietokej toselti. Porin oksekin amo nochipa kimatij tein tikpanotokej (Proverbios 14:10). Sayoj ke, kemej Dios kemaj kimati tein tikpanotokej uan kuali techkaki, uelis tikiluiskej keniuj timomachiliaj. Jehová techita, kimati toni techyolxokolia, kimati ouijkayomej tein tikixnamikij, uan yejua ika kineki maj tikiluikan tein yeski taman tein techtekipachoua (2 Crónicas 6:29, 30).

Keman tiktataujtiaj Jehová, okachi titakuaujtamatij ke kineki techpaleuis. No uelis tikijtoskej kemej se akin kijkuiloj Biblia, yejua kiluij Dios: “Tikitani notajyouilis, tikita tein semi nechtekipachoua” (Salmo 31:7). Se kimatis ke Jehová kiita tein techtekipachoua, uelis techpaleuis para maj amo timosenkauakan. Yejuatsin amo sayoj kiita ke titajyouiaj, ta kuali kimati tein tikpanotokej uan ika Biblia techpaleuia maj tiyolseujtokan uan techyolchikaua.

Keniuj Biblia kipaleuia Julián

Keniuj nechijtakoua semi nimotekipachos

“Nitajyouia porin semi nimotekipachoua uan nikpia trastorno obsesivo compulsivo (TOC). Keman amo nikchia peua semi nimotekipachoua. Uelis kuali nimomachilis uan sepasaj peua semi nimotekipachoua. Okachi nechpanoua nejin keman nietok iniuan miakej, porin nechtekipachoua tein uelis noka kinemilijtoskej.

”Akin kimatij tein nechpanoua mochikauaj nechpaleuiskej, maski kemansa tein nechiluiaj amo semi nechpaleuia, sayoj ke semi nikintasojkamatilia porin kitemouaj keniuj nechpaleuiskej.

”Kemansa, kemej semi nimotekipachoua uan no nikpia TOC, nechouijkisa nimotataujtis. Moneki nimochikauas nikyektalis notanemilil para uelis niktataujtis Jehová, porin peua nitanemilia itech miak taman. Keman nechpanoua nejin, nechouijkisa nikiluis Jehová tein yekmelauj niknemilia uan nikmachilia”.

Keniuj nechpaleuia Biblia

“Itech Biblia nimomachtij ke Jehová kikaki nonetataujtiluan, maski amo niuejkauas oso amo nikijtos miak tajtolmej. Kemansa, keman amo nikmati keniuj nikijtos tein nikmachilia, sayoj nikiluia: ‘Jehová, xinechpaleui’. Maski sayoj nikijtos nejon, nikmati ke Jehová kimati keniuj nimomachilia uan nechpaleuia. Amo sayoj nimotataujtia, ta no niyani iuan tapajtijkej. Uan semi niyolpaki, porin nejin ome taman semi nechpaleuianij. Maski moneki semi nimochikauas para niktataujtis Dios, nikchiua porin nikmati ke yejua nechtasojta uan kineki nechpaleuis”.