Jehová “namechchikauas”

1. ¿Keyej semi chikaujkej katkaj itekitikauan Dios ne uejkauj?

BIBLIA miakpa kijtoua ke itekitikauan Dios katkaj chikaujkej uan yolchikaujkej. Sayoj ke hasta akin okachi chikaujkej katkaj amo nochipa ijkon momachilijkej. Kemansa tekiuaj David katka yolchikauak uan kimachiliaya ke chikauak katka “kemej se tepet”. Sayoj ke kemansa no semi mouia (Sal. 30:7). Uan Sansón semi chikauak katka keman Jehová kimakaya ichikaualis, sayoj ke kimatia ke komo Dios amo kipaleuiskia ‘tamiskia ichikaualis’ (Juec. 14:​5, 6; 16:17). ¿Keyej nejin takamej semi chikaujkej katkaj? Porin Jehová kinpaleuiaya.

2. ¿Keyej tatitanil Pablo kijtoj ke keman kuetaujtoya no katka chikauak? (2 Corintios 12:​9, 10).

² Tatitanil Pablo kimatia ke yejua no monekia maj Jehová kipaleui (xikonixtajtolti 2 Corintios 12:​9, 10). Pablo kemansa kokolispeuaya ijkon kemej tejuan techpanoua (Gál. 4:​13, 14). Uan no, semi ouij kikisaya kichiuas tein kuali (Rom. 7:​18, 19). Uan kemansa motekipachouaya uan mouia maj kimiktikan (2 Cor. 1:​8, 9). Maski ijkon yejua kijtoj: “Keman nikuetaujtok, nichikauak”. ¿Keyej? Jehová kimakaya chikaualis tein monekia para kixikos ouijkayomej.

3. ¿Katiyejua netajtanilmej tiknankiliskej itech nejin tamachtilis?

³ Jehová motenkaua ke no techchikauas tejuan (1 Ped. 5:10). Sayoj ke komo tiknekij maj techpaleui, tejuan no moneki tikchiuaskej teisa. Ijkon kemej se carro. Para tsikuinis moneki maj kipia se kuali motor. Sayoj ke akin tanejnemiltia moneki kitsoniksas tein ika tsikuinis carro, porin motor amo uelis iselti kitsikuinaltis. Ijkon kemej nejon motor, Jehová techpaleuis maj tichikaujkej. Sayoj ke tejuan no moneki timochikauaskej. ¿Toni techmakani Jehová tein ika techpaleuia maj tichikaujkej? ¿Uan toni moneki tikchiuaskej para maj techpaleui tein techmaka? Maj tikitakan keniuj Jehová kiyolchikauak tanauatijkej Jonás, María akin katka imomaj Jesús uan tatitanil Pablo. No tikitaskej ke Jehová no ijkon kinpaleuia itekitikauan axkan.

KOMO TIMOTATAUJTIAJ UAN TIMOMACHTIAJ TECHPALEUIS MAJ TITAXIKOKAN

4. ¿Toni uelis tikchiuaskej para maj Jehová techmaka ichikaualis?

⁴ Jehová uelis techchikauas komo tiktataujtiaj. Yejuatsin technankilia keman techmaka “chikaualis tein toselti amo ueli tikpiaj” (2 Cor. 4:7). No techmaka ichikaualis keman tikixtajtoltiaj Biblia uan itech titanemiliaj (Sal. 86:11). Tein yejuatsin techiluia itech iTajtol “semi chikauak” uan tein kijtoua techpaleuia (Heb. 4:12). Yeua ika komo tikontataujtia Jehová uan tikonixtajtoltia iTajtol, mitsonpaleuis xiontaxiko, xionyolpaki keman tikontekitilis oso ueli xikonchiua se tekit tein ouij. Maj tikitakan keniuj Jehová kiyolchikauak tanauatijkej Jonás.

5. ¿Keyej Jonás monekia maj yolchikauak?

⁵ Jonás monekia maj yolchikauak. Kemej mouik yas kampa Jehová kititanka, yajki okseko itech se barco. Yejua ika, Jonás uan nochin akin yetoyaj itech barco yaya momikilitijya keman chikaujkakiouik. Keman akin kiuikayaj barco kipankajkaujkej itech ueyiat, se ueyi pescado kitoloj, Jonás yetoya iijtik ueyi pescado kampa tayouayan katka. ¿Keniuj momachilij Jonás? ¿Kinemiliaya ke yaya mikitia? ¿Kinemilij ke Jehová kisenkaujkaya? Jonás xa semi motekipachouaya.

6. ¿Toni kipaleuij Jonás keman yetoya iijtik se ueyi pescado? (Jonás 2:​1, 2, 7).

⁶ ¿Toni kichiuak Jonás para moyolchikauas keman yetoya iselti iijtik ueyi pescado? Kitataujtij Jehová (xikonixtajtolti Jonás 2:​1, 2, 7). Maski Jonás amo kitakamatik Jehová, moyolpatak uan takuaujtamatik ke yejuatsin kikakiskia. Jonás no itech tanemilij tein achto momachtijka itech iTajtol Dios. Tikmatij nejin porin itech inetataujtil tein ijkuiliujtok itech Jonás capítulo 2 kikuik miak tajtolmej uan tanemililmej tein kipia Salmos (xikonita Jonás 2:​2, 5 iuan Salmo 69:1; 86:7). Moyekita ke Jonás kuali kiixmatia iTajtol Dios. Uan kemej itech tanemilij nejon, takuaujtamatik ke Jehová kipaleuiskia keman kipanok tein amo kuali. Jehová kimakixtij Jonás uan satepan kichiuak tein yejuatsin kinauatijka (Jon. 2:10–3:4).

7, 8. ¿Toni kipaleuij se tokniuj maj moyolchikaua keman kipanotoya ouijkayomej?

⁷ Tein kipanok Jonás uelis techpaleuis keman tikpiaskej ouijkayomej. Maj tikitakan tein kipanoua se tokniuj takat de Taiwán akin monotsa Zhiming.b Yejua semi kokoxkej, uan kemej kitekitilia Jehová, ichankauan semi kiixnamikij. ¿Toni kichiua para maj Jehová kipaleui? Motataujtia uan momachtia. Yejua kijtoua: “Kemansa keman nikpia kuejmolmej semi nimotekipachoua uan amo ueli niyolseujtok para nimomachtis”. Sayoj ke yejua amo mosenkaua. Kijtoua: “Achto niktataujtia Jehová. Satepan nimotalilia noaudífonos uan nikaki seki nekuikatilmej tein timokuikatiaj itech nechikol. Kemansa ichtakatsin nimokuikatia hasta maj niyolseui. Uan satepan peua nimomachtia”.

⁸ Tein Zhiming kiajsikamati keman momachtia, kipaleuiani maj moyolchikaua keman okachi moneki. Se tonal keman yankuixtok kitekkaj, se enfermera kiluij ke monekia maj kitalilikan esti porin tel eskiska. Sayoj ke se youak achto ke kitekiskiaj, kiixtajtoltijka tein kipanoka se tokniuj siuat akin no kitekkaj kemej yejua. Maski tokniuj siuat okachi amo kipiaya esti, amo kinekik maj kitalilikan uan kuali pajtik. Tein kipanoka tokniuj, kipaleuij Zhiming maj moyolchikaua uan maj amo kikaua Jehová.

9. ¿Toni uelis tikonchiuas komo tikonpia se ouijkayot uan tikonmachilia ke amo tiontaxikouaok? (No xikonita taixkopimej).

⁹ Keman tikonpia se ouijkayot, ¿semi tionmotekipachoua uan ouij mitsonkisa tionmotataujtis? ¿Oso amo tiontaxikoua para tionmomachtis? Xikonelnamiki ke Jehová kiajsikamati tein mitsonpanotok. Yejua ika maski amo miak taman tikoniluis keman tikontataujtis, xikonmati ke yejuatsin mitsonpaleuis (Efes. 3:20). Komo semi tionmokokoua oso tionmotekipachoua uan amo ueli tionmomachtia oso tiontaixtajtoltia, xa uelis tikonkakis grabaciones den Biblia oso de toamaixuan. Okse taman tein no uelis mitsonpaleuis yejua komo tikonkaki nekuikatilmej oso tikonita se video itech jw.org. Keman tiktataujtiaj Jehová uan keman tiktemouaj keniuj technankilia itech Biblia, amaixmej uan okseki taman, kemej yeskia tikiluiskiaj “Nimitstataujtia, xinechchikaua”.

TOKNIUAN UELIS TECHYOLCHIKAUASKEJ

10. ¿Keniuj tokniuan techpaleuiaj maj tichikaujkej?

¹⁰ Jehová uelis kichiuas maj tokniuan techchikauakan. Yejuan ‘semi techpaleuiaj uan techyolchikauaj’ keman tikpanouaj ouijkayomej, oso keman ouij techkisa tikchiuaskej se tekit itech nechikol (Col. 4:​10, 11). “Keman titajyouiaj” ijkuak keman okachi tikintemouaj akin kuali iniuan timouikaj (Prov. 17:17). Keman tikmachiliskej ke amo tichikaujkej, tokniuan uelis techmakaskej tein techpoloua, techyolseuiskej uan techpaleuiskej maj kuali timouikakan iuan Jehová. Maj tikitakan keniuj kipaleuijkej uan kiyolchikaujkej María, imomaj Jesús.

11. ¿Keyej María monekia moyolchikauas?

¹¹ María monekia moyolchikauas para kichiuas tein Jehová kinauatijka. Xa María semi momoujtij keman ángel Gabriel kiluij ke kipiaskia se konetsin maski ayamo monamiktiaya. Yejua amo kimatia keniuj kiiskaltis se konetsin, sayoj ke yaya kiiskaltiti Mesías. Amo motektoya iuan se takat, sayoj ke monekia kiluis José akin yaya iuan monamiktiti ke kipiaskia se konetsin, xa tel ouij tein monekia kichiuas (Luc. 1:​26-33).

12. Kemej kijtoua Lucas 1:​39-45, ¿keniuj kiyolchikaujkej María?

¹² ¿Keniuj moyolchikauak María para kichiuas se tekit tein amo akin kichiujtoya uan tel ouij? Kitemoj maj oksekin kipaleuikan. Kitajtanij ángel Gabriel toni okseki taman monekia para kichiuas tein Jehová kinauatijka (Luc. 1:34). Satepan uejka yajki uan panok “kampa tepeyoj” para kikalpanotiuj ichankauj Elisabet ompa Judá. Tein kichiuak amo nenkajtik. Elisabet kiluij María ke kuali tein kichiujtoya, ika ichikaualis Dios, yejua kijtoj tein kualtsin tein kipanoskia konetsin tein yaya kipiati María (xikonixtajtolti Lucas 1:​39-45). María kinankilij ke Jehová “ika imay kinextij ke chikauak” (Luc. 1:​46-51). Jehová kichiuak maj ángel Gabriel uan Elisabet kiyolchikauanij María.

13. ¿Toni kichiujkej tokniuan keman Dasurí kintajtanij maj kipaleuikan?

¹³ Oksekin itekitikauan Dios no uelis mitsonyolchikauaskej ijkon kemej kipanok María. Maj tikitakan tein kipanok se tokniuj siuat de Bolivia akin monotsa Dasurí. Ipopaj kokolispeuak uan amo ueliskia pajtisok. Keman yetoya itech tapajtiloyan yejua kinekia iuan yetos para kiyekpias (1 Tim. 5:4). Sayoj ke monekia maj oksekin kipaleuikan para kichiuas nejin tekit tein semi ouij katka. Yejua kijtoua: “Miakpa nikmachiliaya ke amo nitaxikouayaok”. Sayoj ke tokniuj amo niman tajtanik maj kipaleuikan. ¿Keyej? Dasurí kijtoua: “Amo niknekia nikinouijtis tokniuan. Nimoluiaya: ‘Yejua Jehová akin nechpaleuis’. Sayoj ke nikajsikamatik ke kemej amo nikinitayaok oksekin, noselti nitajyouijtoya” (Prov. 18:1). Dasurí kintajkuilouilij itasojikniuan para kiniluis toni kipanotoya. Yejua no kijtoj: “Tokniuan kichiujkej miak taman para nechpaleuiskej uan nechyolchikauaskej. Yejuan techuikiliayaj tein tikuaskiaj itech tapajtiloyan uan nechyolchikauayaj ika Biblia. ¡Semi kualtsin tikmachiliaj keman tikmatij ke amo tietokej toselti! Tinochin tipouij iniuan ichankauan Jehová, uan tokniuan techpaleuiaj uan techmakaj tein techpoloua, touan chokaj uan techpaleuiaj maj tiksentokakan tiktekitilikan Jehová”.

14. ¿Keyej moneki timokauaskej maj tayekananij techpaleuikan?

¹⁴ Jehová no kichiua maj tokniuan tayekananij techchikauakan. Yejuan kemej yeskia Dios techintayokolij para maj techyolchikauakan uan maj techyolseuikan (Is. 32:​1, 2). Yejua ika keman mitsontekipachos teisa xikonilui tayekananij. Uan komo kitemouaj mitsonpaleuiskej xionmokaua maj mitsonpaleuikan. Jehová kichiua maj nejon tokniuan mitsonchikauakan.

TEIN TIKCHIAJ MAJ MOCHIUA TECHPALEUIA MAJ TICHIKAUJKEJ

15. ¿Toni tikchiaj tinochin akin tiktekitiliaj Dios?

¹⁵ Tein Biblia kijtoua ke mochiuas techyolchikaua uan techpaleuia maj tiksentokakan tiktekitilikan Jehová (Rom. 4:​3, 18-20). Seki tokniuan kichiaj nemiskej nochipaya ompa iluikak uan oksekin itech xochital nikan taltikpak. Kemej tikchiaj tein kuali, techpaleuia maj tikxikokan ouijkayomej, maj titanojnotsakan uan maj tikinpaleuikan tokniuan itech nechikol (1 Tes. 1:3). Maj tikitakan keniuj tein tikchiaj kiyolchikauak tatitanil Pablo.

16. ¿Keyej tatitanil Pablo monekia maj yolchikauak?

¹⁶ Tatitanil Pablo monekia maj yolchikauak. Keman kintajkuilouilij tokniuan de Corinto kijtoj ke katka kemej se tapalkat porin amo chikauak katka. Kijtoj ke kitajyouiltijtoyaj, amo kimatia toni kichiuas uan kemej yeskia kipechijtoyaj uan kiuetsiltiayaj. Uan kemansa hasta kiitaya ke yaya momikilitiya (2 Cor. 4:​8-10). Pablo kijkuiloj nejin keman ika expa yajki tanojnotsato. Xa ijkuak ayamo kimatia ke satepan kipiaskia okachi ouijkayomej. Satepan keman tanojnotstinemiaok, se tonal atojtolojtoyaya, miakej akin amo yolkualmej kiixnamikkej, kikitskijkej uan kitsakkej.

17. Kemej kijtoua 2 Corintios 4:​16-18, ¿toni kipaleuij Pablo maj kixiko ouijkayomej?

¹⁷ ¿Toni kipaleuij Pablo maj taxiko? Yejua itech tanemilij tein kichiaya (xikonixtajtolti 2 Corintios 4:​16-18). Kiniluij tokniuan de Corinto ke maski “tantiaya ichikaualis” kisentokaya katka yolchikauak. Yejua kinemiliaya keniuj nemiskia satepan. Tatitanil Pablo kiitaya ke se ‘ueyi tatiochiualis’ maj yani nemiti iluikak. Uan kiixtalijka kixikos tein yeski ouijkayot para kiselis tein kichiaya. Tatitanil Pablo itech tanemiliaya tein kichiaya uan yejua ika kimachiliaya ‘ke mojmostaj moyankuiliaya’.

18. ¿Keniuj tein tikchiaj kinyolchikaua Tíjomir uan ichankauan?

¹⁸ Se tokniuj takat de Bulgaria akin monotsa Tíjomir semi kipaleuia maj taxiko keman itech tanemilia tein kichia. Seki xiujmej achto, iikniuj akin okachi nojnel uan monotsaya Zdravko, momikilij keman mocochejuij. Tíjomir semi motayokoltij. ¿Toni kinpaleuiani maj taxikokan yejua uan ichankauan? Kinemiliaj keniuj yeski keman oksepa nemiskej akin momikilijkejya. Tíjomir kijtoua: “Ika titajtouaj kani tikseliskej Zdravko, toni takual tikchijchiuiliskej, akonimej tikinyoleuaskej keman tikseliskej uan toni tiktapouiskej tein mochiuak itech tonalmej keman tatamitiya”. Tíjomir kijtoua ke keman yejua uan ichankauan itech tanemiliaj tein kichiaj, kinpaleuia maj taxikokan uan maj kisentokakan kichiakan tonal keman Jehová kichiuas maj oksepa nemi iikniuj.

19. ¿Toni mitsonpaleuis okachi xikonneltoka tein Jehová motenkaua? (No xikonita taixkopin).

¹⁹ ¿Toni moneki tikonchiuas para okachi tikonneltokas tein tikonchia? Komo tikonchia tionnemis nochipaya nikan taltikpak, xikonixtajtolti kampa Biblia ika tajtoua xochital uan xikonnemili ke ompa tionyetok (Is. 25:8; 32:​16-18). Xikonnemili keniuj tinemiskej itech xochital, akonimej ompa yetoskej, toni tikonkakis uan keniuj tionmomachilis. Xikonita taixkopimej tein nesij itech toamaixuan tein mitsonpaleuis xikonnemili keniuj tinemiskej. No uelis tikonitas videos ika tatsotson, kemej Kualtsin tinemiskej, Amo uejkaua mochiuas oso Nikitstokya tein mochiuas. Komo tikxelouaj tiempo para tiknemiliskej keniuj tinemiskej itech xochital, ouijkayomej tein tikpiaskej ‘panotikisaskej uan amo uejueykej’ yeskij (2 Cor. 4:17). Tein Jehová motenkaua kichiuas mitsonpaleuis xikonxiko ouijkayomej.

20. ¿Keniuj uelis titaxikoskej keman tikmachiliskej ke amo tichikaujkejok?

²⁰ “Dios techpaleuis maj tichikaujkej” hasta keman tikmachiliskej ke tikuetaujtokej (Sal. 108:13). Jehová techmakani nochi tein techpaleuia maj tichikaujkej. Yejua ika keman ouij mitsonkisas nochipa tionyolpakis keman tikontekitilis Jehová, tikonchiuas se tekit itech nechikol oso tikonxikos se ouijkayot, xikontataujti uan xikonilui tein tikonmachilia uan xionmomachti Biblia para maj mitsonixyekana. Uan no, xionmokaua maj tokniuan mitsonpaleuikan uan xikonsentoka xikonneltoka ke mochiuas tein tikonchia. Uan Jehová “ika iueyi chikaualis” mitsonpaleuis ‘xikonxiko nochi ika nejmachkayot uan xionyolpaki’ (Col. 1:11).