Tein mitsonpaleuis xionyolseujto maski moteuiskej uan takuejmolchiuaskej
Gary, akin achto katka soldado kijtoua: “Keman ayamo nimomachtiaya Biblia, amo nikmatia keyej itech taltikpak onkayaj miak ouijkayomej, kintajyouiltiayaj sekin uan mochiuaya tein amo kuali. Sayoj ke axkan niyolseujtok, uan nikmati ke Jehová kichiuas maj satepan kuali tinemikan”.
Amo sayoj Gary ijkon momachilia. Maj tikitakan keniuj Biblia kinpaleuiani oksekin.
TEIN BIBLIA KIJTOUA: “Tejua, Jehová, tiyolkuali uan tikneki titetapojpoluis” (Salmo 86:5).
KENIUJ TECHPALEUIA: “Nejin tajtolmej nechyolseuiaj porin nechnextiliaj ke Jehová teiknelia. Nikmati ke yejua kineki nechtapojpoluis por nochi tein nikchiuak keman katka nisoldado” (Wilmar, Colombia).
TEIN BIBLIA KIJTOUA: “Nikchijchiuati yankuik iluikak uan yankuik taltikpak; uan tein achto panok amo nankielnamikiskejok, nion yetosok itech namoyolo” (Isaías 65:17).
KENIUJ TECHPALEUIA: “Nikpia estrés postraumático uan depresión porin nikpanok miak taman keman katka nisoldado. Sayoj ke nejin texto nechelnamiktia ke amo uejkaua, Jehová kichiuas maj amo nikelnamikiok tein amo kuali tein nikitak keman katka nisoldado, uan amo nikelnamikisok tein axkan nechyolkokoua. ¡Semi kualtsin yeski nejon!” (Zafirah, Estados Unidos).
TEIN BIBLIA KIJTOUA: “Keman taixyekantos, akin yolkuali kualtsin nemis uan nochin yolseujkanemiskej nochipaya ijkon kemej metsti nochipaya yetos” (Salmo 72:7).
KENIUJ TECHPALEUIA: “Miakpa nitanemilia itech nejon tajtolmej. Amo uejkaua amo kanaj moteuiskejok uan amo akin tajyouisok por nejon, uan amo no titanemilijtoskej ke uelis kinpanos tein amo kuali akin tikintasojtaj” (Olexandra, Ucrania).
TEIN BIBLIA KIJTOUA: “Mikemej nemiskej […]. ¡Akin namokepkej talnex xiijsakan uan semi xiyolpakikan!” (Isaías 26:19).
KENIUJ TECHPALEUIA: “Miakej de nochankauan kinmiktijkej keman kinmiktijtoyaj akin katkaj tutsis. Sayoj ke nejin texto nechelnamiktia ke oksepa nikinitas. Nikneki nikinkakis keniuj ueuetskaskej keman oksepa nemiskej” (Marie, Ruanda).
TEIN BIBLIA KIJTOUA: “Amo uejkaua, akin amo yolkualmej amo nemiskejok […]. Sayoj ke akin yolnejmachmej ininaxkatis taltikpak uan tel kuali nemiskej porin yolseujtoskej” (Salmo 37:10, 11).
KENIUJ TECHPALEUIA: “Maski amo moteuijtokejok nikan kampa ninemi, miakej kisentokaj kintajyouiltiaj uan miakej kichiuaj tein amo kuali. Nejin texto semi nechyolchikauani. Jehová kiitstok nochi uan kimati toni nikpanotok. Uan no, yejua motenkaua ke amo uejkaua, amo akin tajyouisok uan tein panok, amo se kielnamikisok” (Daler, Tayikistán).
Nochin nejin takamej uan siuamej axkan itaixpantijkauan Jehová. Yejuan peuak kuali momachiliaj porin kinyolseuij tein kijtoua Biblia. Yejuan achto xa tetauelitayaj porin amo kuali kinitayaj oksekin, porin seseko kayomej katkaj, kipaleuiayaj ininaltepeuj oso techikoitayaj, sayoj ke amo kichiuajok nejon (Efesios 4:31, 32). Tiitaixpantijkauan Jehová amo timokalakiaj itech política uan amo titapaleuiaj keman oksekin moteuiaj oso takuejmolchiuaj (Juan 18:36).
Akin tiitaixpantijkauan Jehová timotasojtaj uan timosenpaleuiaj kemej yeskia tiiknimej (Juan 13:35). Kemej Olexandra, akin achto ika titajtojkej. Yejua monekik cholos iuan iikniuj uan yas itech okse altepet porin itech ialtepeuj moteuijtoyaj. Yejua kijtoua: “Niman ke tiajsikej itech okse altepet, tikinitakej itaixpantijkauan Jehová. Yejuan techchixtoyaj para kuali techseliskej. Yejuan techpaleuijkej, yejua ika amo semi ouij techkisak timomatiskej tietoskej kampa tinemiskiaj”.
Timitsonyoleuaj xionmosentili touan, ijkon tikonmatis keniuj axkan uelis tionyolseujtos uan no keniuj amo uejkaua itech nochi taltikpak kuali tinemiskej, ijkon kemej kijtoua Biblia. Xikontemo itech jw.org kani uelis tionmosentilis touan oso xiontajtani maj aksa mitsonmachti ika Biblia uan nejin amo moneki tikonixtauas. Se itaixpantijkauj Jehová mitsonmachtis ika amatajkuilol ¡Uelis tiyolpakiskej nochipaya!