Tel fiero tein panoua keman moteuiaj
Semi tajyouiaj akin nemij oso yetokej kampa moteuijtokej uan takuejmolchiujtokej. Soldados uan akin nemij kampa moteuijtokej kimatij ke fiero tein se kipanoua.
SOLDADOS
“Nochipa se kiita tein semi fiero. Miakpa se kinita keniuj kinmiktiaj oksekin oso semi kinkokouaj. Nochipa se moujkanemi” (Gary, Gran Bretaña).
“Nechkokojkej ika balas nopanko uan noixko, uan nikitak keniuj miakej kinmiktijkej desde konemej hasta akin xiuejkejya. Keman se yetok kampa moteuiaj, kichiua maj amo teyi se kimachiliok keman aksa tajyouia oso momikilia” (Wilmar, Colombia).
“Amo ueli se kielkaua keman aksa kitatoponiliaj se iixpan. Nochipa se kielnamiktok keniuj tajyouij, kemej yeskia se kiitstok uan se kikaktok” (Zafirah, Estados Unidos).
AKIN NEMIJ KAMPA MOTEUIJTOKEJ
“Niknemiliaya ke amo oksepaok niyolpakiskia. Nimouia maj nechmiktianij, sayoj ke okachi nikmouiliaya maj kimiktianij se nochankauj oso aksa akin kuali iuan nimouikaya” (Olexandra, Ucrania).
“Monekia nikchias maj techmakakan tein tikuaskej desde las dos de kualkan hasta las once de youak. Uan akin ompa tietoyaj timouiaj porin tikmatiaj ke ueliskia techtatoponiliskej” (Daler, Tayikistán).
“Kinmiktijkej notatuan keman moteuijtoyaj kampa nimoskaltij. Nimokauak noselti uan amo akin kiitaya ox kuali nietoya nion nechyolseuiaya” (Marie, Ruanda).
Maski akin ika titajtojkej semi tajyouijkej porin moteuijtoyaj kampa yetoyaj, axkan yolseujtokej. Uan no, kimatij ke amo uejkaua amo kanaj moteuiskejok nion takuejmolchiuaskejok. Itech nejin amaix Tanejmachtijkej tikitaskej keniuj Biblia kijtoua ke uelis mochiuas nejin.