Amo uejkaua amo kanaj moteuiskejok nion takuejmolchiuaskejok

DIOS KINIXPOLOS NOCHIN AKIN TAIXYEKANAJ NIKAN TALTIKPAK

Dios kinixpolos nochin akin taixyekanaj nikan taltikpak keman iniuan moteuis. Nejon keman moteuiskej, Biblia kitokaytia Armagedón (Apocalipsis 16:16).a Keman ejkos nejon tonal, “akin tekiuajtij itech nochi taltikpak [...] kinsentiliskej para maj moteuikan itech iueyi tonal Dios, akin kipia nochi chikaualis” (Apocalipsis 16:14). Amo kanaj moteuiskejok satepan ke panos Armagedón.

Dios kinixpolos tekiuanij de nikan taltikpak, uan mokauas yejua iTaixyekanalis tein desde ne iluikak, ualtaixyekantos, uan amo keman ixpoliuis (Daniel 2:44). Dios kiixtalijya akoni yeski tekiuaj uan yejua ikoneuj, Jesucristo (Isaías 9:​6, 7; Mateo 28:18). Yejua nejin Taixyekanalisb tein Jesús ika tajtoj keman kinmachtij imomachtijkauan keniuj motataujtiskej (Mateo 6:​9, 10). Nochin akin nemiskej nikan taltikpak sayoj kipiaskej se taixyekanalis, uan Jesús kiixyekanas.

Axkan tekiuanij kikuij tanauatil tein kipiaj para ika mopaleuiskej, sayoj ke Jesús amo ijkon kichiuas. Kemej Jesús se kuali Tekiuaj, yejua kichiua tein kuali yetok uan amo techikoita, yejua ika nochin kinpaleuis uan amo akin tajyouis porin seseko kayomej oso porin tataman ixtamatij (Isaías 11:​3, 4). Amo akin tajyouis porin Jesús kiitas maj nochin kuali yetokan. “Yejua kimakixtis pobre akin tsajtsi maj kipaleuikan, no akin tajyouijtok uan akin amo kipia akoni kipaleuis […]. Kinmakixtis de akin kintajyouiltia uan kinkojkokoua” (Salmo 72:​12-14).

Itaixyekanalis Dios kiixpolos nochi teposmej tein ika tateuiaj tein ika miakej kinmiktiaj (Miqueas 4:3). Uan no kinixpolos akin amo yolkualmej akin kisentokaj tateuiaj oso kintajyouiltiaj oksekin (Salmo 37:​9, 10). Takamej, siuamej uan konemej amo mouiskej maski kampa yeski yaskej (Ezequiel 34:28).

Keman itaixyekanalis Dios taixyekantos, nochin tel kuali nemiskej. Tamis mayan, amo akin kaltaneujtos uan tamis tatasojtilis uan okseki taman tein techtajyouiltia. Ijkuak nochipa onkas miak takual para nochin uan no, nochin kipiaskej se kali kampa kualtsin nemiskej (Salmo 72:16; Isaías 65:​21-23).

Itaixyekanalis Dios kitamis nochi tein techtajyouiltia porin moteuiaj. Ijkuak akin kinkokojkej oksepa kuali yetoskej. Uan akin moteltekipachouaj uan tel tayokoyaj, amo ijkon momachiliskejok. Uan akin momikilijkej oksepa nemiskej nikan taltikpak (Isaías 25:8; 26:19; 35:​5, 6). Kalyetonij amo oksepa moxexeloskej, uan amo akin kielnamikisok tein amo kuali tein achto panok (Apocalipsis 21:4).

DIOS KICHIUAS MAJ AMO AKIN TAJTAKOLEJOK

Itaixyekanalis Dios kichiuas maj tinochin tiksenueyichiuakan akin yekmelauj Dios, Jehová,c “Dios akin tetasojta uan teyolseuia” (2 Corintios 13:11). Nochin kualtsin mouikaskej (Isaías 2:​3, 4; 11:9). Akin kitakamatiskej Dios, amo kipiaskejok tajtakol (Romanos 8:​20, 21).

DIOS KIIXPOLOS SATANÁS UAN AMO KUALI EJEKAMEJ

Itaixyekanalis Dios kiixpolos Satanás uan amo kuali ejekamej, uan amo uelisok kichiuaskej maj akin nemij nikan taltikpak, moteuikan (Apocalipsis 20:​1-3, 10). Kemej yejuan amo nemiskejok, itech nochi taltikpak yolseujtoskej (Salmo 72:7).

Uelis tikonneltokas ke Dios kichiuas tein motenkaujtok uan kichiuas maj amo kanaj moteuikanok nion maj takuejmolchiuakanok, porin yejua ueli uan kineki kichiuas.

• Dios kipia chikaualis para kichiuas maj amo kanaj moteuikanok nion maj takuejmolchiuakanok, uan kuali kimati keniuj kichiuas (Job 9:4). Yejua nochi ueli kichiua (Job 42:2).

• Dios amo kiuelita kiitas keniuj titajyouiaj (Isaías 63:9). Uan no “senkis kitauelita akin kitasojta tateuilis” (Salmo 11:5).

• Dios nochipa kichiua tein motenkaua, yejua amo ueli takajkayaua (Isaías 55:​10, 11; Tito 1:2).