“Dios semi mitstasojta”

1, 2. ¿Toni techpaleuis maj senkis tikneltokakan ke Jehová semi techpatiuita?

JEHOVÁ semi kinpatiuita nochin itekitikauan. Maski ijkon, sekin kimachiliaj ke amo kintasojta. ¿Keyej? Xa porin miakej kiniluianij miak taman tein ika kinyolkokouanij. Komo no ijkon mitspanouani, ¿toni mitspaleuis senkis xikneltoka ke Jehová mitstasojta?

² Semi mitspaleuis komo tikleroua Biblia kampa kinextia keniuj Jehová kineki maj timouikakan iniuan oksekin. Jesús kuali kinnojnotsaya oksekin uan kinpoujkaitaya. Ijkon kinextij ke yejua uan iTajtsin semi kintasojtaj akin kimachiliaj ke amo teyi chiuanimej uan yolyemankej (Juan 5:19; Heb. 1:3). Itech nejin tamachtilis ika titajtoskej nejin ome taman: 1) keniuj Jesús kinpaleuij oksekin maj kiitakan ke Jehová semi kinpatiuita uan 2) toni uelis tikchiuas para senkis tikneltokas ke tejua no ijkon mitsita (Ageo 2:7).

JESÚS KINPALEUIJ OKSEKIN MAJ KIITAKAN KE JEHOVÁ KINPATIUITA

3. ¿Keniuj Jesús kinpaleuij akin nemiaj Galilea?

³ Keman Jesús tanojnotstoya ompa Galilea, miakej kiitatoj para kikakiskej uan para maj kinpajtiani. Jesús kinitak ke “kinkojkokojkaj uan kinsenkaujkaj kemej ichkamej tein amo kipiaj inintajpixkauj” (Mat. 9:36; xikita notas de estudio). Akin taixyekanayaj itech taneltokalis kinemiliayaj ke akin kiitatoj Jesús amo monekia maj kiniknelikan, hasta kijtouayaj ke ‘amo kinnamikia maj Dios kintasojta’ (Juan 7:​47-49 uan nota de estudio). Sayoj ke Jesús kinnextilij ke kintasojtaya uan kinpoujkaitaya keman kiixtalij kinmachtis uan kinpajtis (Mat. 9:35). Uan para ueliskia kinpaleuis okachi miakej, no kinmachtij itatitaniluan maj tanojnotsakan uan maj ueli kipajtikan miak tataman kokolis (Mat. 10:​5-8).

4. ¿Toni techmachtia tein Jesús kichiuak ininka akin kinixtopeuayaj?

⁴ Kemej Jesús katka yolkuali uan kinpoujkaitaya akin kinixtopeuayaj, kinextij ke yejua uan iTajtsin semi kintasojtaj akin ijkon kinchiuiliaj. Yejua ika, komo tiktekitilijtok Jehová uan tikmachilia ke amo mitstasojta, xikelnamiki keniuj Jesús kinpaleuij akin katkaj yolyemankej uan kinekiaj maj kinmachti. Komo ijkon tikchiua, mitspaleuis xikita keniuj Jehová semi mitstasojta.

5. ¿Toni kipanouaya siuatsin akin Jesús kiixmatik ompa Galilea?

⁵ Jesús amo sayoj kinmachtij uan kinpaleuij miakej, ta no sejsemej. Keman tanojnotstoya ompa Galilea kiixmatik se siuatsin akin 12 xiujmejya estemotoya (Mar. 5:25). Kemej iTanauatil Moisés kijtouaya ke amo chipauak katka, akin iuan motokiskia amo no chipauak yeskia, yejua ika xa nochipa yetoya iselti. Xa amo uelia kiueyichiuaya Jehová iniuan oksekin kampa taueyichiuayaj judíos oso itech iluimej (Lev. 15:​19, 25). Nejin siuatsin amo sayoj tajyouiaya porin mokokouaya, ta no kimachiliaya ke amo kitasojtayaj (Mar. 5:26).

6. ¿Keniuj pajtik siuatsin akin estemotoya?

⁶ Nejin siuatsin kinekia maj Jesús kipajtiani, sayoj ke amo kiluij. ¿Keyej? Xa semi pinauaya porin kipiaya nejon kokolis. Oso xa mouia maj Jesús kiajuani porin amo chipauak katka uan ompa yetoya iniuan oksekin. Yejua ika sayoj kinalmachilij itasal porin kimatia ke ijkon pajtiskia (Mar. 5:​27, 28). Uan kemaj pajtik. Satepan Jesús tajtanik akoni kikitskijka itasal, uan siuatsin kiluij nochi tein panok. ¿Toni kichiuak Jesús?

7. ¿Keniuj kinojnotsak Jesús nejon siuatsin? (Marcos 5:34).

⁷ Jesús kiitak ke nejon siuatsin “mojkauiuiyokatoya”, yejua ika kualtsin kinojnotsak uan kiyolchikauak (Mar. 5:33). Uan hasta kiluij “nokonetsin”, keman ijkon kinotsak amo sayoj kinextij ke kipoujkaitaya, ta no ke semi kitasojtaya (xiklero Marcos 5:34). Itech Biblia nesi ke sayoj ijkuak Jesús kinotsak se siuat “nokonetsin”. Xa ijkon kinotsak porin kiitak ke semi moujtoya. ¿Keniuj momachilij satepan ke Jesús kiluij nejin? Xa semi yolpakia porin kinextilij ke semi kitasojtaya. Tein kiluij kiyolseuij, uan amo motekipachojok porin kinalmachilijka itasal uan porin yetoya iniuan miakej. Jesús amo sayoj kipajtij, ta no kipaleuij maj kiita ke Jehová semi kitasojtaya.

8. ¿Toni ouijkayomej kipiaya se tokniuj siuat de Brasil?

⁸ Axkan, miakej itekitikauan Dios kipiaj se kokolis tein kichiua maj motayokoltikan oso maj kimachilikan ke amo teyi chiuanimej. Maj tikitakan tein kipanoua Renata,a se precursora regular de Brasil. Desde ke yolik amo kipiani imetsuan nion iopochmay. Yejua kijtoua: “Keman niaya escuela nechkejkelouayaj uan amo kualtsin kemej nechnotsayaj. Uan kemansa hasta nochankauan kichiuayaj maj nikmachili ke amo teyi nichiujkej”.

9. ¿Toni kipaleuij Renata maj kimachiliani ke Jehová semi kitasojta?

⁹ ¿Toni kipaleuij Renata? Keman mochiuak itaixpantijkauj Jehová, tokniuan itech nechikol semi kiyolchikaujkej uan kipaleuijkej maj mopatiuita kemej Jehová kipatiuita. Yejua kijtoua: “Nechpaleuianij tel miakej tokniuan, semi niktasojkamatilia Jehová porin kichiuak maj nipoui iniuan tokniuan itech nechikol akin semi motasojtaj”. Nejon tokniuan semi kipaleuijkej Renata maj kiajsikamati ke Jehová semi kitasojta.

10. ¿Toni kipanouaya María Magdalena, uan keniuj momachiliaya? (No xikita taixkopimej).

¹⁰ Maj tikitakan keniuj Jesús no kipaleuij María Magdalena. Yejua kipiaya chikome amokuali ejekamej (Luc. 8:2). Xa yejuan kichiualtiayaj seki taman tein amo keman kichiuaskia uan yejua ika miakej amo iuan motokiayaj. Xa semi momoujtiaya uan kinemiliaya ke amo akin ueliskia kipaleuis. Nesi ke Jesús kikixtilij María Magdalena nejon amokuali ejekamej uan yejua peuak kitojtoka porin iuan takuaujtamatia. Ijkon kipaleuij maj kiita ke Dios semi kitasojtaya. Sayoj ke Jesús kichiuak okse taman para kipaleuis.

11. ¿Keniuj Jesús kinextilij María Magdalena ke Jehová semi kitasojtaya? (No xikita taixkopimej).

¹¹ Jesús kiyoleuak María Magdalena maj iuan tanojnotsati.b Ijkon yejua uelia kikakia tein tamachtiaya Jesús. Uan no monextij iixpan keman oksepa nemik, uan yejua María Magdalena semej akin yekinika kinojnotsak. No kinauatij maj yani kiniluiti itatitaniluan ke oksepa nemia. Ijkon kinextilij ke Jehová semi kitasojtaya (Juan 20:​11-18).

12. ¿Keyej Lidia kimachiliaya ke amo akin ueliskia kitasojtas?

¹² Ijkon kemej kipanok María Magdalena, axkan miakej no kimachiliaj ke amo akin uelis kintasojtas. Se tokniuj siuat de España akin monotsa Lidia kijtoua ke keman imomaj kipixtoyaok ipoxko amo kinekia maj yolini. Lidia kielnamiki ke keman katka siuapilok, imomaj amo kiyekpiaya uan kiluiaya miak taman para kiyolkokos. Uan no kijtoua: “Kemej nomaj amo keman nechtasojtak, nochipa niknekia maj oksekin nechtasojtanij uan maj mochiuanij notasojikniuan, sayoj ke niknemiliaya ke amo akin nechtasojtaskia porin nomaj nechiluiaya ke amo nechnamikia maj nechtasojtakan”.

13. ¿Toni kipaleuij Lidia maj kimati ke Jehová semi kitasojta?

¹³ Mopatak miak taman keman Lidia peuak momachtia Biblia. Peuak kitataujtia Jehová, kileroua Biblia, tokniuan kipaleuiayaj uan kiyolchikauayaj ika tein kiluiayaj, uan nejin semi kipaleuij maj kimati ke Jehová semi kitasojta. Yejua kijtoua: “Notakatsin nochipa nechiluia ke semi nechtasojta uan nochipa nechelnamiktia tein kuali tein nikchiua. Uan notasojikniuan no semi nechpaleuianij”. Ijkon kemej kipanok Lidia, xa itech monechikol no yetoskej sekin akin moneki maj kinpaleuikan maj kiitakan ke Jehová semi kinpatiuita. Uan tejua uelis tikinpaleuis ika tein tikiniluis uan tein tikchiuas.

¿TONI MITSPALEUIS XIMOPATIUITA KEMEJ JEHOVÁ MITSPATIUITA?

14. Kemej kijtoua 1 Samuel 16:​7, ¿keniuj techita Jehová? (No xikita recuadro “¿Keyej Jehová semi kinpatiuita itekitikauan?”).

¹⁴ Xikelnamiki ke Jehová amo techita kemej techitaj oksekin (xiklero 1 Samuel 16:7). Miakej kipatiuitaj aksa komo kiitaj ke kuakualtsin, kipia tomin oso motelmachtij. Sayoj ke Jehová amo ijkon kichiua (Is. 55:​8, 9). Yejua ika keman tiknemilis ke amo teyi tichiujkej, xiknemili keniuj mitsita Jehová. ¿Toni mitspaleuis? Biblia ininka tajtoua miakej akin kimachiliayaj ke amo teyi chiuanimej katkaj, kemej Elías, Noemí uan Ana. Keman tikleros tein kinpanok, xikita keniuj Jehová kinnextilij ke kintasojtaya. No uelis tikijkuilos seki taman tein mitspanok uan keniuj Jehová mitsnextilij ke mitstasojta uan mitspatiuita. Oso xiktemo tamachtilis itech toamaixuan tein mitspaleuis amo xiknemiliok ke amo akin mitstasojta.c

15. ¿Keyej Jehová kiluij Daniel ke ‘semi kitasojtaya’? (Daniel 9:23).

¹⁵ Nochipa xikelnamiki ke Jehová semi mitspatiuita porin amo tikaua. Se tonal, keman tanauatijkej Daniel kiajxitijtoyaya 100 xiujmej, kimachiliaya ke ‘semi sioujtoya’ uan kinekia mosenkauas (Dan. 9:​20, 21). ¿Toni kichiuak Jehová para kiyolchikauas? Kititanilij ángel Gabriel para kimatiltis ke Dios semi kitasojtaya uan ke kikakilijka inetataujtiluan (xiklero Daniel 9:23). ¿Keyej Jehová semi kitasojtaya Daniel? Porin nochipa kichiuaya tein kuali uan amo keman kikauaya (Ezeq. 14:14). Jehová kichiuak maj moijkuilo nejin para techyolchikauas (Rom. 15:4). Yejua no mitstasojta porin tikchiua tein kuali uan amo tikaua. Uan ijkon kemej kikakik inetataujtiluan Daniel, tejua no mitskaki keman tiktataujtia (Miq. 6:​8, notas; Heb. 6:10).

16. ¿Toni mitspaleuis xikita Jehová kemej se tepopaj akin mitstasojta?

¹⁶ Xikita Jehová kemej se tepopaj akin mitstasojta. Yejua kineki mitspaleuis uan amo kitemojtok toni amo kuali tikchiua (Sal. 130:3; Mat. 7:11; Luc. 12:​6, 7). Miakej akin kinekij mosenkauaskej semi kinpaleuia keman itech tanemiliaj nejin. Maj tikitakan tein kipanok Michelle, se tokniuj siuat de España. Yejua kimachiliaya ke amo akin kitasojtaya uan ke amo teyi chiujkej katka porin miak xiujmej itakauj kiluiaya miak taman tein ika kiyolkokouaya. Yejua kijtoua: “Nochipa keman peua nikmachilia ke amo akin nechtasojta uan amo teyi nichiujkej, peua niknemilia ke Jehová kemej yeskia nechnapaloua, ke nechyekpia uan nechtasojta” (Sal. 28:9). Uan Lauren, se tokniuj siuat se Sudáfrica, nochipa moelnamiktia nejin: “Kemej Jehová kichiuak maj kuali iuan nimouika, nechpaleuiani nochi nejin xiujmej maj amo nikaua uan hasta kichiua maj nikinpaleui oksekin, nechpaleuia maj nikita ke semi nechtasojta uan nechpatiuita” (Os. 11:4).

17. ¿Toni mitspaleuis xikneltoka ke tikyolpaktia Jehová? (Salmo 5:12; no xikita taixkopin).

¹⁷ Xikyekneltoka ke tikyolpaktia Jehová (xiklero Salmo 5:12). David kijtoj ke akin yolmelaujkej kiyolpaktiaj Jehová uan yejua kemej yeskia kinyekpia ika se escudo. Komo tikneltoka ke Jehová mitspaleuia uan ke tikyolpaktia mitspaleuis keman tikmachilis ke amo teyi tichiujkej. ¿Keniuj uelis tikmatis ke tikyolpaktia Jehová? Tikitakejya ke itech iTajtol techiluia ke techtasojta. Uan no, kichiua maj tayekananij, motasojikniuan uan oksekin tokniuan mitselnamiktikan ke semi mitspatiuita. ¿Uan toni moneki tikchiuas keman oksekin mitsyolchikauaskej?

18. ¿Keyej moneki tikneltokas tein mitsiluiskej keman mitsyolchikauaskej?

¹⁸ Keman akin tikinixmati uan mitstasojtaj mitsiluiaj tein kuali tein tikchiua uan tein tiknextia, amo xiknemili ke amo melauj tein kijtouaj. Xikelnamiki ke xa Jehová kichiujtok maj mitsmatiltikan ke tikyolpaktia. Michelle, akin ika titajtojkej achto, kijtoua: “Semi nechouijmakaya nimoneltokilis tein nechiluiayaj keman nechyolchikauayaj, sayoj ke peuak nikneltoka porin nikmati ke Jehová kineki maj ijkon nikchiua”. Tayekananij no semi kipaleuianij maj kiita ke Jehová kitasojta, uan axkan precursora uan desde ichan tapaleuia Betel.

19. ¿Keyej uelis tikneltokas ke Jehová semi mitspatiuita?

¹⁹ Semi kualtsin kemej Jesús technextilij ke Jehová semi techtasojta (Luc. 12:24). Yejua ika xikneltoka ke Jehová semi mitspatiuita uan amo keman xikelkaua nejon. Uan no, ximochikaua tikinpaleuis oksekin maj kiitakan ke Jehová semi kinpatiuita.