3 Maj mopoujkaitakan

¿TONI KIJTOSNEKI?

Namikuanij akin mopoujkaitaj ininka motekipachouaj ininnamik hasta keman tataman tanemiliaj. Amatajkuilol Diez claves para transformar tu matrimonio kijtoua: “Nejin namikuanij amo kiitaj ke tein sejsemej kinemiliaj okachi tayekantok, ta ika tajtouaj kuejmolmej tein kipiaj. Ika poujkaitalis kikakij tein sejsemej kinemiliaj uan kiixtaliaj kichiuaskej tein omen kiitaj ke kuali yetok”.

BIBLIA KIJTOUA: “Akin tetasojta [...] amo kitemoua tein sayoj yejua kipaleuis” (1 Corintios 13:4, 5).

“Nejua nikpatiuita nosiuatsin ijkon niknextilia ke nikpoujkaita uan amo teyi nikchiua tein uelis kiyolxokolis yejua oso kijtakos tonenamiktilis” (Micah).

¿KEYEJ SEMI MONEKI?

Keman namikuanij amo mopoujkaitaj, keman monojnotsaskej uelis kijtoskej tein ika mopinaujtiskej oso tein ika moyolxokoliskej. Taixmatinij kijtouaj ke keman panoua nejin uelis mokauaskej.

“Komo tikijtouiliaj tein amo kuali tonamik uan tikpinaujtiaj nejon kichiuas maj amo kuali momachili uan amo mouan takuaujtamatisok” (Brian).

¿TONI UELIS TIKONCHIUAS?

XIKONITA TEIN TIKONCHIUA

Xikonnelmamiki keniuj tikonnojnotsani monamik nejin tonalmej uan keniuj timouikani iuan. Satepan xiknankili nejin netajtanilmej:

• ¿Kanachpa tikijijtoj uan kanachpa tikiluij tein kuali tein kichiuak?

• ¿Keniuj tikonnextilij ke tikonpoujkaita?

TEIN IKA UELIS NANTAJTOSKEJ

• ¿Toni tein tikijtouaj uan tikchiuaj kinextia ke timopoujkaitaj?

• ¿Toni tein tikijtouaj uan tikchiuaj kinextia ke amo timopoujkaitaj?

TEIN UELIS TIKONCHIUAS

• Sejsemej xikijkuilokan eyi taman tein nankiuelitaskiaj maj nanmonamik kichiua tein ika nankinextiskej ke nanmopoujkaitaj. Xiksenitakan tein nankijkuilojkej uan ximochikauakan ijkon nankichiuaskej.

• Xikonijkuilo seki taman tein kualtsin tein kinextia monamik uan xikonilui ke semi tikonpatiuita.

“Nejua niknextilia nonamik ke nikpoujkaita ika tein nikchiua uan no nikneki maj yolpaki. Amo nochipa moneki miak taman para se kinextis poujkaitalis ta kemansa sayoj ika tein tikchiuaskej” (Megan).

Tein melauj, amo tejua xiknemili ke titapoujkaita ta maj monamik kiita ke tikpoujkaita.

BIBLIA KIJTOUA: “Xiteyoliknelikan, xiyolkualmej, xiyolyemankej, xiyolnejmachmej uan amo xiyolijsiuikan” (Colosenses 3:12).