Keniuj celular uelis kijtakos monenamiktilis

Komo se takat uan se siuat akin monamiktijkejya kikuij celular ika taixejekolis kinpaleuis maj okachi kuali mouikakan. Porin akin monamiktijkejya uelis kikuiskej celular para ika monotsaskej.

Sayoj ke komo amo kuali kikuij uelis kinpanos nejin:

Uelis kinkuilis miak tiempo uan amo senyetoskejok.
Uelis peuas tekitiskej ininchan maski amo moneki.
Uelis kichiuas maj amo moneltokilikanok teisa uan hasta uelis mokajkayauaskej.

TEIN MONEKI TIKONMATIS

Se takat iuan isiuatsin uetstokej youak, uan sejse kiitstokej inincelular.

KEMAN NANSENYETOSKEJ

Se takat akin monotsa Michael kijtoua: “Kemansa keman tisenyetokej, nosiuatsin kemej yeskia amo ompa yetok. Yejua sayoj kiitstok icelular uan nechiluia ‘Xinechtapojpolui, amo uelik nikitak achto tein nechtajkuilouilijkej’”. Jonathan akin no monamiktijya kijtoua ke kemansa “akin monamiktijkejya uelis senyetoskej sayoj ke uelis kimachiliskej ke semi ueuejka yetokej”.

XIKONNEMILI NEJIN: ¿Nochipa nikinnotstok oso nikintajkuilouilijtok oksekin keman moneki nietos iuan notakauj oso nosiuatsin? (EFESIOS 5:33).

TEKIT

Sekin akin tekitij moneki tanotsaskej uan tajkuiloskej maski yetoskej ininchan uan yeski youak. Oksekin kipiaj okse tekit kampa amo kinkuilia miak tiempo, sayoj ke kinouijmaka kikauaskej tekit keman ajsij ininchan. Se takat akin monotsa Lee kijtoua: “Semi ouij nechkisa amo nikitas celular keman nechnotsaj itech tekit uan nechtajkuilouiliaj keman nikixtalij nietos iuan nosiuatsin”. Se siuat akin monotsa Joy kijtoua: “Nitekiti nochan sayoj ke nechouijmaka nimotsakuilis. Moneki nimochikauas nitekitis ika taixejekolis”.

XIKONNEMILI NEJIN: ¿Kuali tikonkaki motakauj oso mosiuatsin keman mitsonnojnotstok? (LUCAS 8:18).

AMO XIONTEKAUA

Keman kinchiuilijkej netajtanilmej akin monamiktijkejya, kiitakej ke miakej motajtolteuiaj porin kinemiliaj ke semej kitejkoltia itech redes sociales tein okse amo kiuelita. Uan 10% akin kinchiuilijkej nejin netajtanilmej kijtojkej ke ichtaka kitejkoltianij teisa itech redes sociales kemej amo kimatis inintakauj oso ininsiuatsin.

Yejua ika miakej kijtouaj ke redes sociales uelis techualkuilis miak kuejmolmej uan hasta uelis techuikas maj se auilnemi. Yejua ika amo tikmoujkaitaj maj seki abogados akin kiixpolouaj amat tein kinextia ke aksa monamiktij, kijtokan ke redes sociales no kichiuaj maj akin monamiktijkej mokauakan.

XIKONNEMILI NEJIN: ¿Tikontatilia motakauj oso mosiuatsin keman tionmonojnotsa iuan aksa? (PROVERBIOS 4:23).

TEIN UELIS TIKONCHIUAS

XIKONITA TEIN OKACHI MONEKI

Aksa akin amo moyektamaka uelis kokolispeuas. No ijkon aksa akin amo yetok iuan itakauj oso isiuatsin kipias kuejmolmej itech inenamiktilis (Efesios 5:28, 29).

TEIN BIBLIA KIJTOUA: “Xikyekitakan toni okachi tayekantok” (FILIPENSES 1:10, TNM).

Xiksenitakan tein nankiuelitaskiaj nankichiuaskej oso xikijkuilokan tein nankinemiliaj para maj celular amo kijtako namonenamiktilis.

Xisentakuakan maski sayoj sepa itech tonal.
Xiktemokan amo nochipa nankikuitoskej namocelular.
Xikixtalikan nankisenchiuaskej teisa tein kualtsin sayoj nanomen.
Youak xikseuikan namocelular uan xiktalikan kampa amo uelis nankikuiskej.
Mojmostaj xikxelokan 15 minutos para nantajtoskej kemej amo namechtsakuilis celular.
Xikixtalikan se hora para nankiseuiskej Internet.