1 Maj tikixtalikan nochipa tisenyetoskej

¿TONI KIJTOSNEKI?

Namikuanij akin yekmelauj motasojtaj kiitak ke ininnenamiktilis yeski nochipaya uan nejon kinpaleuia maj kuali yetokan. Kimatij ke nochipa senyetoskej maski tein yeski panos.

Seki namikuanij kisentokaj sennemij porin ininchankauan oso akin kuali iniuan mouikaj, kiniluiaj maj amo mokauakan. Sayoj ke okachi kuali maj senyetokan porin motasojtaj uan mopoujkaitaj.

BIBLIA KIJTOUA: “Takatsin maj amo kikaua isiuatsin” (1 Corintios 7:11).

“Keman tikixtaliaj nochipa tietoskej iuan tonamik, kichiua maj amo niman se kualani, maj se tajtani maj techtapojpoluikan uan maj se tetapojpolui. No kichiua maj tikitakan ke kuejmolmej uelis moyektaliskej uan maj amo tiknemilikan timoxeloskej” (Micah).

¿KEYEJ SEMI MONEKI?

Komo namikuanij amo kiixtaliaj nochipa senyetoskej, uelis kinemiliskej ke amo keman moyekuikaskej uan kitemoskej keniuj mokauaskej.

“Miakej akin monamiktiaj kinemiliaj ke komo amo moyekuikaj uelis mokauaskej. Komo tionmonamiktia uan tikonnemilia ke satepan uelis namokauaskej, nejon kijtosneki ke amo yekmelauj nankiixtalijkej nochipa nansenyetoskej” (Jean).

¿TONI UELIS TIKONCHIUAS?

XIKONITA TEIN TIKONCHIUA

¿Keniuj tiontanankilia keman timokualantia iuan monamik?

• ¿Tikonnemilia ke okachi kuali amo xionmonamiktiani?

• ¿Tikonnemilia ke okachi kuali tionnemiskia komo tietoskia iuan okse?

• ¿Tikoniluia monamik “nimitskauati” oso “niktemos akin yekmelauj nechtasojtas”?

Komo itech seki taman tikonijtoj ke kemaj, moneki tikonnemilis keniuj tikonchikauas tein tikonixtalij para amo namokauaskej.

TEIN IKA UELIS NANTAJTOSKEJ

• ¿Amo kuali timouikajok kemej achto? Komo ijkon, ¿keyej?

• ¿Toni techpaleuis maj oksepa kuali timouikakan?

TEIN UELIS TIKONCHIUAS

• Kemansa xikonijkuilouili monamik se taman kampa tikoniluia ke tikontasojta.

• Xikonpia ifoto monamik kampa tiontekiti.

• Mojmostaj keman amo nansenyetoskej xiknojnotsa ika teléfono.

BIBLIA KIJTOUA: “Maj amo akin kixelo tein Dios kisentilij” (Mateo 19:6).