Xionteajsikamati
Keyej moneki
Komo sayoj tikitaj ke titatamamej uelis tikitaskej kemej nepololmej. Hasta uelis tiknemiliskej ke akin amo kemej tejuan amo teyi chiuanimej. Komo peua ijkon titanemiliaj, ouij techkisas tikinajsikamatiskej oksekin. Nejin ueliskia kichiuas maj titechikoitakan.
Tein Biblia tamachtia
“Ximopaktijtiyakan iuan nekes ten moyolpaktijtinemij. Uan ma ximochoktijtiyakan iuan nekes ten moyolkokoaj” (ROMANOS 12:15).
¿Toni kijtosneki? Nejin texto uelis momelauas ika ome tajtolmej: maj titeajsikamatikan. Uelis tikchiuaskej komo tikmachiliaj tein oksekin kimachiliaj.
Keniuj tapaleuia titeajsikamatiskej
Keman tikinajsikamatij oksekin tikitaj ke no tanemiliaj kemej tejuan, tikitaj ke no kimachiliaj tein tejuan tikmachiliaj. Keman titeajsikamatij tikitaj ke tinochin kemej yeskia sayoj se kalyetouanij. Keman tikitaskej ke tinochin tiijkuitikej techpaleuis maj amo tikitakan ininnepololuan oksekin.
Komo titeajsikamatij techpaleuis maj no tikinpoujkaitakan oksekin. Itech altepet Senegal miakej kinitayaj ke amo teyi chiuanimej katkaj, uan se siuat akin itokay Anne-Marie akin ompa kayot no ijkon kinitaya. Techiluia keniuj kipaleuij maj teajsikamati, yejua kijtoua: “Keman nikitak keniuj semi tajyouiayaj niknemilij keniuj nimomachiliskia komo no ijkon nikpanotoskia. Peuak nikita ke nejua amo okachi niueyichiujkej ke yejuan uan amo onkaya keyej nimoueyinekis”. Komo tikitaj tein kipanouaj oksekin, okachi tikinajsikamatiskej uan amo tikinijijtoskej.
Tein uelis tikonchiuas
Komo amo semi kuali tionmouika iniuan oksekin, xikonita toni ika nanijkuitikej uan amo tein kichiua xitatamamej. Xikonnemili keniuj momachiliaj oksekin keman:
Keman titeajsikamatij, tikitaj ke tinochin kemej yeskia sayoj se kalyetouanij.
Sentakuaj iniuan ininchankauan.
Tekitikej nochin tonal.
Moajsij iniuan akin kuali mouikaj.
Kikakij tatsotson tein kiuelitaj.
Xikonnemili ke tejuatsin tikonchiua nejin uan xionmotajtani:
¿Toni nikchiuaskia komo kichiuaskiaj maj nimomachili ke amo teyi nichiujkej?
¿Keniuj nimomachiliskia komo oksekin nechijijtouaj maski amo nechixmatij?
Komo iniuan niyetoskia, ¿keniuj nikuelitaskia maj mouikakan nouan?