Keniuj celular uelis kijtakos motanemilil

Tinochin nochipa timomachtijtokej: tamachtiloyan, kampa titekitij uan keman tikchiuaj okseki taman. Uan celular semi techpaleuia. Axkan okachi amo ouij se kiajsis miak taman uan amo moneki tikisaskej kampa tietokej.

Sayoj ke akin semi kikuij celular uelis kinpanos nejin:

Kinouijmaka taleroskej kemej amo teyi kinkuejmolos.
Kinouijmaka kichiuaskej sayoj se taman.
Niman tasematij keman yetokej ininselti.

TEIN MONEKI TIKONMATIS

Se ichpoch sepasaj kichiua miak taman: tajkuiloua itech icelular, tajtoua ika videoconferencia uan momachtia itech icomputadora uan ika se amatajkuilol.

SE TALEROS

Sekin ijsiujka talerouaj uan amo tanemiliaj itech tein kilerojtokej.

Keman ijsiujka se taleroua niman se kiajsi tein se kineki se kimatis. Sayoj ke amo tapaleuia keman moneki tikajsikamatiskej teisa tein ouij.

XIKONNEMILI NEJIN: ¿Ouij mitsonkisa tikonleros teisa tein miak? ¿Keyej komo tionmochikaua mitsonpaleuis kuali xionmomachti? (PROVERBIOS 18:15).

MAJ AMO TEYI MITSONTAPOLOLTI

Miakej kinemilia ke uelis kichiuaskej ome taman: momachtijtoskej uan kintajkuilouiliskej akin kuali iniuan mouikaj itech inincelular. Sayoj ke amo kuali techkisas tein tikchiujtoskej komo amo titanemiliaj itech sayoj se taman.

Maski semi ouij maj amo teyi mitsontapololti uan xikonchiua sayoj se taman, amo nenkaj komo tionmochikaua. Se ichpoch akin monotsa Grace kijtoua: “Amo semi tionmopoloua nion tionmosioujtia. Nikitani ke semi kuali maj se kichiua sayoj se taman uan amo sepasaj miak taman”.

XIKONNEMILI NEJIN: Keman tikonchiujtok miak taman, ¿ouij mitsonkisa tikonelnamikis tein tionmomachtijtok? (PROVERBIOS 17:24).

KEMAN MOSELTI TIONYETOS

Sekin amo kiuelitaj ininselti yetoskej uan amo teyi kichiujtoskej. Yejua ika kikuij inincelular para kuali momachiliskej. Se siuat akin monotsa Olivia kijtoua: “Amo ueli nietok 15 minutos komo amo nikita nocelular, notablet oso nikxotaltia televisión. Porin nitasemati”.

Sayoj ke tinochin, tiyeski titelpochmej oso tiuejueykej, kemansa moneki tiyetoskej toselti para titanemiliskej itech tein timomachtijtokej. Nejin semi moneki para kuali timomachtiskej.

XIKONNEMILI NEJIN: ¿Tiontanemilia itech tein tionmomachtij keman tionyetok moselti? (1 TIMOTEO 4:15).

TEIN UELIS TIKONCHIUAS

XIKONNEMILI KENIUJ TIKONKUI MOCELULAR

¿Keniuj mocelular uelis mitsonpaleuis kuali xionmomachti? ¿Keniuj mocelular uelis mitsontapololtis keman tionmomachtijtok?

TEIN BIBLIA KIJTOUA: “Xikyekpia motamatilis uan motanemilil” (PROVERBIOS 3:21).

XIONMOTAJTANI:

¿Nechouijmaka nikajsikamatis teisa keman nikleroua itech nocelular? ¿Toni kichiua maj amo sayoj nitanemili itech tein nimomachtijtok?
¿Toni uelis nikchiuas para maj amo nechtapololti teisa?

Tein uelis tikonchiuas: Xionpeua ika tepitsin uan yolik xikonmiakilti tein tikonleroua. Xiontalero kemej uelis mokakis tepitsin para uelis itech tiontanemilis.

¿Keniuj uelis nikxelos tiempo para itech nitanemilis tein nikleroua?

Tein uelis tikonchiuas: Keman tionmomachtijtos, xikonxelo 10 minutos uan oksepa xikonita tein tionmomachtij.

¿Kemanian nikneki sepasaj nikchiuas miak taman?
¿Toni moneki nikpatas para uelis nikchiuas sayoj se taman?

Tein uelis tikonchiuas: Para amo tikonchiuas miak taman keman tionmomachtis, xikonajchiua nochi tein uelis mitsonkuejmolos.

TEIN BIBLIA KIJTOUA: “Xiktemo tamatilis, xiktemo taajsikamatilis” (PROVERBIOS 4:5).