Tanojnots 50

Ome siuamej yolchikaujkej

KEMAN israelitas mokalakijkej itech kuejmolmej, kitsajtsilijkej Jiova maj kinpaleuiani. Yej kininankilij uan kinimakak tayekananij yolchikaujkej maj kinpaleuianij. Biblia kintokaytia tamelauanij. Josué katka yekinika tamelaujkej, uan oksekin tamelauanij motokaytijkej: Otniel, Ehúd uan Samgar. Sayoj ika ome taltikpakneminij tein kinpaleuijkej israelitas katkaj siuamej, uan motokaytijkej Débora uan Jael.

Débora katka tanauatijkej. Jiova kimatiltiaya tein mochiuaskia satepan, uan yej kinimatiltiaya taltikpakneminij tein Jiova kijtouaya. Débora no katka tamelaujkej. Motaliaya kuoujxiujtampa kampa tepeyoj, uan israelitas ompa kionitayaj maj kinpaleuiani kimelauakan imin kuejmoluan.

Itech nejon xiujmej, tein tekiuajtia Canaán katka Jabín. Kipiaya 900 carros tein ika tateuiaya. Kemej tel miakej katkaj itateuijkauan Jabín, yejika miakej israelitas kinchiujkej itekitikauan tekiuaj. Tein kinixyekanaya itateuijkauan Jabín motokaytij Sísara.

Se tonal Débora kinotsak tamelaujkej Barac, uan kiiluij: ‘Jiova kijtoua: “Xikinsentili 10,000 takamej uan xikiniuika itech tepet Tabor. Ompa nikchiuas maj mitsajsiti Sísara, uan nej nimitspaleuis xikintani Sísara uan itateuijkauan”’.

Barac kinankilij Débora: ‘Niyas komo tiouj nouan’. Débora kiuikak, sayoj ika kiiluij: ‘Amo mitsueyiitaskej keman motatanis, porin Jiova kichiuas maj se siuat kimikti Sísara’. Uan yejua nejon mochiuak.

Barac yetoya itech tepet Tabor uan temok kininamikito itateuijkauan Sísara. Ompa Jiova kichiuak maj sepasaj taapexoni, uan miakej taixnamikinij moaeltsimijkej. Sísara temok itech icarro uan choloj.

Satepan Sísara ajsik Jael ichan tachijchiuj ika taken. Yej kikalakij uan kimakak tepitsin leche. Keman tayik kikochtij. Ompa Jael kikuik se kuoujtok uan kikuatokilij. ¡Satepan keman ajsik Barac, Jael kinextilij miket! Mochiuak ijkon kemej kijtojka Débora.

Ika tamik kimiktijkej tekiuaj Jabín; uan seki xiujmej israelitas kipiakej yekyetolis.

Jueces 2:14-22; 4:1-24; 5:1-31.