Se yankuik taixyekankej uan ome siuamej yolchikaujkej

Josué tel miak xiujmej kiixyekanak ixolal Jiova uan momikilij keman kipiaya 110 xiujmej. Israelitas kiueyichiujkej Jiova keman Josué yoltoya. Sayoj ke keman momikilij, peuak kinueyichiuaj tiotsitsin ijkon kemej kichiuayaj akin nemiaj Canaán. Kemej israelitas amo kisentokakej kitakamatkej Jiova, yejuatsin kikauak maj tekiuaj cananeo Jabín kintajyouiltiani. Israelitas kitataujtijkej Jiova maj kinpaleui. Yejua ika Jiova kiixtalij se yankuik taixyekankej akin motokaytiaya Barac. Yejua kinpaleuiskia maj oksepa kiueyichiuanij Jiova.

Débora, se siuat tanauatijkej, kitatitauij Barac porin kinekia kimatiltis nejin tein Jiova kijtouaya: “Xiyouj itech atauit Cisón iniuan 10,000 takamej ximoteuiti iniuan itateuijkauan Jabín. Ompa tiktanis Sísara, akin kinixyekana nejon tateuianij”. Barac kinankilij Débora: “Niyas sayoj komo tiyouj nouan”. Débora kiluij: “Niyas mouan, sayoj ke moneki tikmatis ke amo tejua tikmiktis Sísara. Jiova kijtoj ke se siuat kimiktis”.

Débora pankisak itech tepet Tabor iuan Barac uan itateuijkauan porin yaya tateuitij. Keman Sísara kimatik, kinsentilij icarros tein ika tateuiaya uan itateuijkauan itech atauit. Débora kiluij Barac: “Axkan Jiova kichiuas xitatani”. Ompa Barac uan 10,000 itateuijkauan temokej itech tepet kinteuitoj itateuijkauan Sísara, akin kipiayaj miak taman tein ika tateuiskej.

Satepan, Jiova kichiuak maj atauat Cisón moskaltiani, uan icarros Sísara motokkej itech sokit. Sísara kikaujteuak icarro uan tsikuinteuak. Barac uan itateuijkauan kintankej itateuijkauan Sísara, sayoj ke Sísara choloj uan motatij itech ikaltaken se siuat akin motokaytiaya Jael. Yejua kimakak tepitsin leche uan kipantakentij. Sísara kochik porin tel sioujtoya. Ompa Jael yolik motokij, ichtaka, uan kikuatokilij se kouit tein ika kiketsayaj takenkal, uan Sísara mikik.

Satepan, ajsik Barac kitemojtiyaya Sísara. Jael kisak itech itakenkal uan kiluij: “Xikalaki, nimitsnextilis takat akin tiktemojtok”. Barac kalakik uan kiitak Sísara ompa uetstok, miket. Ompa, Barac uan Débora kiueyichiujkej Jiova ika se nekuikatil porin kinpaleuijka maj kintanikan akin kintauelitayaj. Israelitas oksepa yolseujkanenkej 40 xiujmej tein kisentokakej.