Tamachtilis 3
¿Akoni Jesucristo?
¿Keyej kitokaytiaj Jesús itayekankaKoneuj Dios? (1)
¿Keyej kitokaytiaj “Tajtoltsin”? (1)
¿Keyej ualajka Jesús kemej takat nikan Taltikpak? (2-4)
¿Keyej kichiuj mouiskatekimej? (5)
¿Toni kichiuati Jesús amo uejkaua? (6)
1. Keman Jesús ayamo ualaya nikan Taltikpak, nemia iluikak kemej espíritu. Dios yekinika kichijchiuj Jesús; yejika kitokaytiaj itayekankaKoneuj Dios (Colosenses 1:15; Apocalipsis 3:14). Dios sayoj Jesús kichijchiuj uan amo akin kipaleuij. Keman Jesús ayamo katka taltikpaknenkej, yetoya iuan Jiova kemej kuali tapaleuijkej keman kichijchiuj nochi tein onkak iluikak uan Taltikpak (Proverbios 8:22-31; Colosenses 1:16). Jesús no kipaleuij Dios kemej yekinika tein kiuikaya tanauatil. Yejika kitokaytiaj “Tajtoltsin” (Juan 1:14; Apocalipsis 19:13).
2. Keman Dios kiualtitanik iKonetsin nikan Taltikpak, kipanoltij inemilis iijtik María. Amo kipiak se ipopaj taltikpaknenkej; yejika amo kiselij tajtakol. Dios kiualtitanik Jesús nikan Taltikpak, ¿keyej? 1) techmachtiko tein melauak uan ijkon uelis tikixmatiskej Dios (Juan 18:37), 2) kinextiko se nemilis melauak uan ijkon techkauilij se kuali neskayot tein uelis tiktojtokaskej (1 Pedro 2:21, NM) uan 3) kitemakako inemilis uan ika techmakixtiko itech tajtakol uan mikilis. ¿Keyej monekia maj motemakaki? (Mateo 20:28.)
3. Keman yekinika takat Adán amo kitakamatikok itanauatil Dios, kichiuj tein Biblia kitokaytia “tajtakol”. Yejika Dios kitelchiuak ika mikilis (Génesis 3:17-19). Kemej amo kitakamatiaok itanauatil Dios mochiuj tajtakojkej. Satepan peuak ueuentsintia uan ika tamik momikilij. Adán kinpanoltilij tajtakol nochin ikoneuan. Yejika tejuan no tiueuentsintiaj, tikokoliskuij uan timomikiliaj. ¿Keniuj ueliskia timomakixtiskiaj? (Romanos 3:23; 5:12.)
4. Jesús katka se taltikpaknenkej chipauak kemej Adán. Sayoj ika Jesús kemaj kitakamatik Dios ika nochi iyolo, maski kipanok se tayejyekolis tein okachi ueyi. Yejika, Jesús ueliskia kitemakaskia italtikpaknemilis chipauak uan ika kixtauaskia itajtakol Adán. Nejin tachiualis Biblia kitokaytia “nemakixtilis”. Ijkon ikoneuan Adán momakixtiskiaj itech mikilis. Nochin tein takuaujtamatij itech Jesús, Dios uelis kintapojpoluis imin tajtakoluan uan kiseliskej se nemilis nochipaya (1 Timoteo 2:5, 6; Juan 3:16; Romanos 5:18, 19).
5. Keman Jesús yetoya nikan Taltikpak, kinpajtij kokoyanij, kintamakak taltikpakneminij tein mayanayaj, uan miakpa kitsakuilij tetsaujkaejekat. Uan no kinajokuik mikemej. ¿Keyej kichiuj mouiskatekimej? 1) Kinikneliaya taltikpakneminij tein tajyouiayaj uan kinekia kinpaleuis. 2) Mouiskatekimej tein kichiuj kinextij ika katka iKonetsin Dios. 3) Kinextij tein kinchiuiliti taltikpakneminij tein tatakamatij keman tayekanas kemej Ueyi Tekiuaj ipan Taltikpak (Mateo 14:14; Marcos 2:10-12; Juan 5:28, 29).
6. Jesús momikilij, Dios kiajokuik kemej espíritu uan oksepa yajki iluikak (1 Pedro 3:18). Satepan Dios kixtalij Ueyi Tekiuaj. Amo uejkaua Jesús kitamiti nochi tachiualis tein amo kuali uan tajyouilis tein onkak nikan Taltikpak (Salmo 37:9-11; Proverbios 2:21, 22).
[Tajtolmej itech página 7]
Keman Jesús yetoya nikan Taltikpak, tamachtij, kichiuj mouiskatekimej uan motemakak toka