Tamachtilis 13
Keniuj uelis tikajsis taneltokalis tein melauak
¿Kiyolpaktia Dios nochin taneltokalismej, oso sayoj se? (1)
¿Keyej onkak miak taneltokalismej tein kijtouaj kineltokaj Cristo? (2)
¿Keniuj uelis tikinixmatis tein yekmelauj kichiuaj kemej Cristo? (3-7)
1. Jesús kipeualtij sayoj se taneltokalis tein melauak. Yejika, axkan tonalmej moneki yetos sayoj se oloch tein yekmelauj kiueyichiuaj Jiova Dios (Juan 4:23, 24; Efesios 4:4, 5). Biblia tamachtia ika amo miakej yajtokej itech nejon ojti pitsauak tein teojtokaltia itech nemilis (Mateo 7:13, 14).
2. Biblia ipa kijtojkaya ika keman nochin tatitanilmej momikiliskiaj, ajachichi kikalakiskiaj tamachtilismej uan tachiualismej tein Cristo amo tamachtij kampa monechikouaj oloch tokniuan. Onkaskiaj taltikpakneminij tein kinekiskiaj kinixeloskej itech itajtol Dios uan maj amo kitojtokaskiajok Cristo (Mateo 7:15, 21-23; Hechos 20:29, 30). Yejika tikitaj miak tataman taneltokalismej tein kijtouaj kineltokaj Cristo. ¿Keniuj uelis tikinixmatiskej tein yekmelauj kichiuaj kemej Cristo?
3. Yekmelauj netasojtalis tein mopialiaj se iuan okse, yejua tein okachi motelita kampa yekmelauj kichiuaj kemej Cristo (Juan 13:34, 35). Amo kinimachtiaj maj moueyinekikan sayoj porin seko kayomej oso chijchipaujkej uan sekin amo. Niono kinimachtiaj maj kintauelitakan taltikpakneminij tein kayomej itech okse ueyi altepet (Hechos 10:34, 35). Yejika amo teuantij itech niose neteuilis. Tein yekmelauj kichiuaj kemej Cristo mouikaj kemej iknimej (1 Juan 4:20, 21).
4. Ueyi poujkaitalis tein kipialiaj Biblia tein teuantij itech nejon taneltokalis, okse neskayot ika yejua tein melauak. Kiseliaj kemej iTajtol Dios uan kineltokaj tein kijtoua (Juan 17:17; 2 Timoteo 3:16, 17). Yejuan kiitaj ika iTajtol Dios yejua tein okachi motelneki uan amo taltikpakneminij imin tanemililis oso imin uejkaujtalnamikilis (Mateo 15:1-3, 7-9). Kikauaj maj kinojtokalti itech imin nemilis. Yejika amo kijtouaj se taman uan kichiuaj okse taman (Tito 1:15, 16).
5. Tein kichiuaj tachiualismej itech taneltokalis tein melauak no moneki kipoujkaitaskej itokay Dios (Mateo 6:9). Jesús kiteixmatiltij itokay Dios, Jiova, uan tein yekmelauj kichiuaj kemej Cristo no ijkon moneki kichiuaskej (Juan 17:6, 26; Romanos 10:13, 14). ¿Akonimej kitetapouiaj itokay Dios kampa tinemi?
6. Tein yekmelauj kichiuaj kemej Cristo moneki maj kitetapouikan iTekiuajyo Dios. Jesús ijkon kichiuj. Yej nochipa ika tajtouaya Tekiuajyot (Lucas 8:1). No kininauatij imomachtijkauan maj kitetapouikan nejon tanauatil semanauak Taltikpak (Marcos 13:10; Mateo 28:19, 20). Tein yekmelauj kichiuaj kemej Cristo kineltokaj ika sayoj iTekiuajyo Dios kiualkuis yekyetolis uan maj amo onkaok moujkayot semanauak Taltikpak (Salmo 146:3-5).
7. Imomachtijkauan Jesús amo teuantij itech tachiualismej tein mochiuaj nikan taltikpak (Juan 17:16). Amo teuantij itech tachiualismej kemej tekiuajixtalilis niono itech nekuejmololmej tein mochiuaj itech altepemej. Amo moojtokaltiaj kemej taltikpakneminij, kitalkauiaj tachiualismej uan tanemililmej tein mochiuaj nikan taltikpak uan teijtakouaj (Santiago 1:27; 4:4). Kampa tinemi, ¿tikixmati se taneltokalis tein kipia nejin neskayomej maj kinexti ika yejuaya taneltokalis tein melauak?
[Tajtolmej itech página 27]
Tein yekmelauj kichiuaj kemej Cristo motasojtaj se ika okse, kipoujkaitaj Biblia uan kitetapouiaj iTekiuajyo Dios