¿Akonimej itasojikniuan Dios?

Ipili Jiova yejua Jesucristo, iteltasojikniuj uan kiteltasojta. Jesús nemik ne iluikak kemej se ángel tein kipia uelilis uan satepan nemiko kemej takat nikan Taltikpak (Juan 17:5). Kinimachtiko taltikpakneminij maj kixmatikan Dios (Juan 18:37). No kitemakak italtikpaknemilis, ika kinimakixtia itech tajtakol uan mikilis taltikpakneminij tein tatakamatij (Romanos 6:23). Yekintsin Jesús se Ueyi Tekiuaj itech iTekiuajyo Dios, nejin yetok iluikak uan kichiuati semanauak Taltikpak se xochital (Apocalipsis 19:16).

Ángeles no itasojikniuan Dios. Imin nemilis ángeles amo peuak nikan Taltikpak kemej taltikpakneminij. Dios achto kinchijchiuj ángeles ne iluikak uan satepan kichijchiuj Taltikpak (Job 38:4-7). Tel miakej ángeles nemij (Apocalipsis 5:11). Nejin itasojikniuan Dios tein nemij ne iluikak, kinekij maj nochin taltikpakneminij kixmatikan Jiova (Apocalipsis 14:6, 7).

Dios no kinpia itasojikniuan nikan Taltikpak; kintokaytia itaixpantijkauan. Se aksa tein ixpanti teisa uan yetok iixpa tein kimelaua nekuejmololmej, kijtoua tein kimatililijtok aksa oso teisa. Itaixpantijkauan Jiova ika tajtouaj Jiova uan kintapouiaj oksekin tein Yej kinemilijtok kichiuas (Isaías 43:10). Ijkon kemej ángeles, itaixpantijkauan Jiova kinekij mitspaleuiskej xikixmati Jiova. Kinekij no ximochiua xiitasojikniuj Dios.