¿Keyej moneki tikonsentokas tikonixmatis Jiova?

1. ¿Keniuj mitsonpaleuis tikonsentokas tionmomachtis Biblia?

Yekmelauj, nochi nejin tamachtilismej tein mokixtiaj itech Biblia kichiuak okachi xikontasojta Jiova. Sayoj ke moneki tikonsentokas tikonchikauas nejon netasojtalis (1 Pedro 2:2). Komo tikonsentoka tionmotokia iuan Jiova ika nemachtil ika Biblia, uelis tikonselis nemilis nochipaya. Xikonixtajtolti Juan 17:3 uan Judas 21.

Kemej okachi tikonixmatis Dios, motakuaujtamatilis mochikauas, uan ijkon uelis tikonyolpaktis (Hebreos 11:1, 6). Takuaujtamatilis techpaleuia maj timoyolnonotsakan uan maj kuali timonejnemiltikan itech tonemilis. Xikonixtajtolti Hechos 3:19.

2. ¿Keniuj uelis tikonpaleuis oksekin?

Xa tikonnekis tikontapouis oksekin tein tionmomachtijtok, ta tinochin techyolpaktia titeiluiskej kuali tanauatilmej. Ijkon kemej tikonsentokas tionmomachtis Biblia, uelis okachi tikontekitiltis iTajtol Dios uan ijkon tikonteixmatiltis Jiova uan kuali tanauatilmej tein kitemakatok. Xikonixtajtolti Romanos 10:13-15, TNM.

Miakej taltikpakneminij peuaj kinixmatiltiaj kuali tanauatilmej ininchankauan oso inintasojikniuan. Keman ijkon tikonchiuas, xionkualtakat uan xiontapoujkaita. Amo xikonilui ke tein kineltokaj amo melauak, ta okachi kuali ika xikonnojnotsa tein Dios motenkaujtok kichiuas. Xikonelnamiki ke taltikpakneminij okachi kiitaj keniuj tionmonejnemiltis uan amo tein tikonijtos. Xikonixtajtolti 2 Timoteo 2:24, 25.

3. ¿Toni tatiochiualis uelis tikonpias?

Ika nemachtil ika iTajtol Dios tikoniskaltis motakuaujtamatilis uan ijkon uelis tel kuali tionmouikas iuan Dios. Uelis yekmelauj tionmochiuas kemej semej ikoneuan Dios. Xikonixtajtolti 2 Corintios 6:18.

4. ¿Keniuj uelis tikonsentokas tikoniskaltis motakuaujtamatilis?

Amo xikonkaua nemachtil ika iTajtol Dios, ta ijkon uelis tikonmatis keniuj tikontekitiltis itamachtilis (Hebreos 5:13, 14). Xikonilui semej itaixpantijkauan Jiova maj mitsonmachti Biblia ika amaix ¿Toni yekmelauj tamachtia Biblia? Ijkon kemej okachi tionmomachtis, okachi tionyolpakis itech monemilis. Xikonixtajtolti Salmo 1:1-3 uan 73:27, 28.

Kuali tanauatilmej kitemaka Jiova, Dios akin yolpaki. Tejuatsin uelis tionmotokis iuan komo tionmotokia iniuan itekitikauan (Hebreos 10:24, 25). Uan komo tikonsentoka tionmochikaua tikonyolpaktis Jiova, tikonpias tein yekmelauj nemilis: nemilis nochipaya. Tionmotokis iuan Dios yejua okachi kuali taman tein uelis tikonchiuas. Xikonixtajtolti Tito 1:2.