TAXELOL 3

Keniuj moyektalis kuejmolmej

“Ximosepantasojtakan se uan okse ika nochi namotanejnekilis porin ika ne tetasojtalis namejuan kachi uelis nankintapojpoluiske aksame.” (1 Pedro 4:8)

Keman se takat uan se siuat monamiktiaj, kipanouaj tataman ouijkayomej, xa porin taman tein kinemiliaj uan tein kimachiliaj oso porin taman kemej kiniskaltijkej. Oksekin no uelis kichiuaskej maj kipiakan ouijkayomej oso panos tein amo kichiayaj.

Amo teyi se kichiuas keman onkak se kuejmol yejua tein okachi amo ouij, sayoj ke Biblia techiluia maj tiktemokan keniuj tikyektaliskej (Mateo 5:23, 24). Komo tikonchiua tein tayolmajxitia Biblia tikonajsis keniuj okachi kuali tikonyektalis kuejmol.

1 XIONTAJTO IKA NEJON KUEJMOL

TEIN BIBLIA KIJTOUA: “Ixyetok tonal [...] keman se tajtos” (Eclesiastés 3:1, 7). Xiontajto ika nejon kuejmol nochi tein monekis; xikonyekilui monamik tein tikonmachilia uan tein tikonnemilia ika nejon kuejmol. Nochipa xikonilui tein melauak (Efesios 4:25). Maski tionkualantos, amo iuan xionmotajtolteui. Komo tiontanankilia ika yolseuilis tapaleuis maj amo ximotajtolteuikan sayoj porin amo nankipiaj sayoj se tanemilil ika se taman (Proverbios 15:4; 26:20).

Maski amo tikonuelitas tein kijtoua monamik, nochipa xikonnexti kualtakayot; xikonsentoka xikontasojta uan xikonpoujkaita (Colosenses 4:6). Niman xikontemo tikonyektalis nejon kuejmol, uan amo xionkualanto iuan monamik (Efesios 4:26).

Se takat uan se siuat akin namikuanij ika tajtouaj se kuejmol

TEIN UELIS TIKONCHIUAS:

Xikonixtali kemanian uelis okachi kuali nantajtoskej ika nejon kuejmol
Keman tajtojtos monamik, amo xikontajtolkotona. Satepan tejuatsin uelis tiontajtos

2 XIONTEKAKI UAN XIONTEAJSIKAMATI

TEIN BIBLIA KIJTOUA: “Ximotasojtatiyakan se uan okse ika ueyi yoltetasojtalis [...]. Uan [...] ximomouiskapoutinemikan se uan okse ika ueyi chipaukamouisyot” (Romanos 12:10). Semi moneki xikonkaki tein mitsoniluia monamik uan xikonajsikamati tein kinemilia. Moneki “xikpiakan se tanemilil san”, uan “xiyolyema[n]kanentinemikan” (1 Pedro 3:8; Santiago 1:19). Amo xikonnexti ke kemej yeskia tikonkaktok. Nochipa keman uelis, xikonkaua tein tikonchiujtos uan ika nejmachkayot xikonkaki, oso xikontajtani ox uelis nantajtoskej satepan. Komo tikonita monamik kemej se akin mitsonpaleuia uan amo kemej akin mitsonixnamiki, amo niman tionkualanis (Eclesiastés 7:9).

TEIN UELIS TIKONCHIUAS:

Xikonkaki nochi tein kijtos monamik, maski amo tikonuelitas
Xikonajsikamati toni kijtosneki monamik ika itajtoluan. Xikonita kemej nesi iixko uan keniuj tajtoua

3 XIKONSENTOKA XIONMOCHIKAUA

TEIN BIBLIA KIJTOUA: “Itech nochi taman tekit chikauak onkak tein kuali, sayoj ke akin sayoj tajtoua kipias tatasojtilis” (Proverbios 14:23). Amo sayoj moneki nankiajsiskej keniuj nankiyektaliskej kuejmol. No moneki nankichiuaskej ijkon kemej nankiixtalijkej. Xa monekis se ueyi chikaujkayot, sayoj ke amo nenkaj yeski (Proverbios 10:4). Komo nansentekitij, nankiseliskej se “kuali taxtauil” (Eclesiastés 4:9).

TEIN UELIS TIKONCHIUAS:

Xikonnemili toni uelis nankichiuaskej nansejsemej tein tapaleuis maj moyektali kuejmol
Xikixtalikan kejkemanian nankiitaskej tein kuali nankichiuanijya