TAXELOL 5

Keniuj kuali timouikaskej iniuan tochankauan

“Ximoyankuikatalilikan ne teiknelilis uan [...] amo no ximoueyinektinemikan. Ta, xikpixtiyakan ne yolyemanilis uan no xikijyouikan nochi tataman ouijkayot.” (Colosenses 3:12)

Keman aksa monamiktia, peua se yankuik nemilis kemej kalyetouanij. Maski tikonsentokas tikontasojtas uan tikonpoujkaitas motatuan, axkan akin okachi moneki itech monemilis yejua monamik. Xa seki mochankauan amo niman kiajsikamatiskej ke tejuatsin tionmonamiktijya. Sayoj ke tein tayolmajxitia Biblia uelis mitsonpaleuis kuali xionmouika iniuan uan xikonchikaua mokuali uikalis iuan monamik.

1 XIKONITA OKSEKI MOCHANKAUAN IKA TAIXEJEKOLIS

Se takat uan se siuat akin namikuanij moajsij iuan inintatuan

TEIN BIBLIA KIJTOUA: “Xikpoujkaita mopopaj uan momomaj” (Efesios 6:2, TNM). Tein yeski xiuit tein tikonpias, nochipa monekis tikonpoujkaitas motatuan. Sayoj ke amo xikonelkaua ke monamik no moneki kinitas itatuan. “Ne naken tetasojtatinemi, yejua ne kipia teiknelilis uan amo no kiyolmachilia [nexikolot]”, yejua ika, amo xikonnemili ke monamik amo mitsontasojta porin kinitati ichankauan (1 Corintios 13:4; Gálatas 5:26).

TEIN UELIS TIKONCHIUAS:

Amo xikonijto tajtolmej kemej: “Mochankauan nochipa nechijijtouaj” oso “Momomaj amo keman kipaktia tein nikchiua”
Xionmochikaua tikonajsikamatis monamik

2 KOMO MONEKI, AMO XIKONPATA TEIN TIKONIXTALIS

TEIN BIBLIA KIJTOUA: “Takat kikauas ipopaj uan imomaj, uan mosentilis iuan inamik, uan omen mochiuaskej sayoj se” (Génesis 2:24). Satepan keman tionmonamiktis, xa motatuan kinekiskejok mitsonmakaskej tein mitsonpoloua uan kinekiskej mitsoniluiskej tein moneki tikonchiuas iuan monamik okachi ke tein kinnamiki.

Nanomen nankiixtaliskej hasta kani nankinkauaskej nanmotatuan maj namechiluikan tein moneki nankichiuaskej uan nankiniluiskej ika netasojtalis. Uelis se kiyekijtos tein se kinemilia ika tajtolmej tein amo teyolxokoliaj (Proverbios 15:1). Tikonnextis yolyemanilis, yolseuilis uan amo tionyolijsiuis mitsonpaleuis kuali xionmouika iniuan mochankauan uan xikonsentoka xikonxiko ika netasojtalis tein yejuan kichiuaskej (Efesios 4:2).

Se takat uan se siuat akin namikuanij monojnotsaj; se takat uan se siuat akin namikuanij kimakaj inintatuan se netetayokolil

TEIN UELIS TIKONCHIUAS:

Komo mitsontekipachoua tikonitas ke mochankauan semi mokalakiaj itech monemilis, xiontajto iuan monamik keman nanyolseujtoskej
Xikixtalikan toni nankichiuaskej ika nejon