Nochipa ximotasojtakan

Jiova kineki maj amo titekauakan (Miqueas 6:8). Nejin semi moneki itech nemilis kemej namikuanij, porin komo tikajkayauaj, tonamik amo uelis totech takuaujtamatis. Uan motelneki totech takuaujtamatis porin ijkon okachi mochikaua netasojtalis.

Itech nejin tonalmej, miakej amo kiitaj ke motelneki nochipa nemiskej iuan ininnamik. Yejua ika, moneki tikonixtalis tikonchiuas ome taman tein mitsonpaleuis kuali xionmouika iuan monamik.

1 XIKONTAYEKANALTI MOKUALI UIKALIS IUAN MONAMIK

TEIN BIBLIA KIJTOUA: “[Xikyekitakan] toni okachi tayekantok” Filipenses 1:10, TNM). Nanmonemilis kemej namikuanij yejua se taman tein okachi moneki itech monemilis. Yejua tein okachi moneki tikontayekanaltis.

Jiova kineki sayoj xikontasojta monamik uan xisenyolpakikan (Eclesiastés 9:9). Yejuatsin amo kineki xikonsekokaua monamik, ta xikontemo keniuj tikonyolpaktis (1 Corintios 10:24). Monamik moneki kimachilis ke motelneki itech monemilis uan ke amo onkak okse kemej yejua.

TEIN UELIS TIKONCHIUAS:

• Xikontemo keniuj miakpa tionyetos sayoj iuan monamik

• Amo sayoj motech xiontanemili, ta no itech monamik

2 XIKONYEKPIA MOYOLO

TEIN BIBLIA KIJTOUA: “Takan se tagat kinixuelitstinemi siuame san, ijkuakon ne tagat moteltajtakolmakak ya itech italnamikilis iuan ne siuame” (Mateo 5:28). Komo aksa kisentoka tanemilia itech auilnemilis, uelis moijtos ke kikajkayaujtokya inamik.

Jiova kijtoua ke moneki se kiyekpias se iyolo (Proverbios 4:23; Jeremías 17:9). Yejua ika, kuali xikonixpejpena tein tikonita (Mateo 5:29, 30). Xikonchiua kemej Job, akin kiixtalij amo kinejnekis okse siuat (Job 31:1). Xikonixtali amo tikonitas auilnemilis. Uan amo keman xikonkaua maj moyolo peua kitasojta aksa akin amo monamik.

TEIN UELIS TIKONCHIUAS:

• Senkis xikonnexti ininixpan nochin ke monamik okachi tayekantok itech monemilis

• Xikonpoujkaita tein kimachilia monamik, uan komo kikuejmoloua kemej tionmouika iuan aksa, moneki amo tionmouikasok iuan nejon taltikpaknenkej