¿Keniuj uelis tikajsis akoni iuan timonamiktis?

1, 2. 1) Komo se tokniuj kineki monamiktis, ¿toni achto moneki kuali kinemilis? 2) ¿Toni kijtosneki maj se takat uan se siuat mochiuakan novios? (Xikita “Tein okachi momelaua”).

¿TIKUELITASKIA timonamiktis? Maski amo moneki timonamiktiskej para tiyolpakiskej, miakej tokniuan takamej uan siuamej akin kipiaj tataman xiujmej kinekij monamiktiskej. Sayoj ke achto ke timonamiktis, moneki kuali iuan timouikas Jehová, tikmatis keniuj timoixpanoltis uan amo xitelpiliok para kuali titaixejekos (1 Cor. 7:36).a Nejon mitspaleuis xiyolpaki keman timonamiktis.

² Kemansa amo niman ueli se kiajsi se kuali tokniuj akin uelis iuan se monamiktis (Prov. 31:10). Uan keman tikitas aksa akin tikuelitaskia okachi tikixmatis, xa amo tikmatis keniuj tikiluis.b Itech nejin tamachtilis tikitaskej toni kipaleuis aksa maj kiixmati se kuali tokniuj uan maj mochiuakan novios, no ika titajtoskej tein uelis kichiuaskej tokniuan itech nechikol para kinpaleuiskej akin kinekij monamiktiskej.

¿KENIUJ UELIS TIKIXMATIS SE KUALI TOKNIUJ AKIN IUAN TIMONAMIKTIS?

3. ¿Itech toni moneki tanemilis se tokniuj achto ke kitemos akoni iuan monamiktis?

³ Achto ke peuas tikixmatis aksa, moneki kuali tikmatis keniuj tikneki maj tamati akin iuan timonamiktis. Komo amo ijkon tikchiua xa uelis peuas tikixmatis aksa akin amo kuali iuan timouikas uan xa tikixtopeuas se kuali tokniuj akin ueliskia iuan timonamiktis. Sayoj ke xikelnamiki ke moneki yeski se tokniuj akin moauijya (1 Cor. 7:39). Sayoj ke nejon amo kijtosneki ke uelis iuan timonamiktis akin yeski akin moauijya. Kuali yetok komo timotajtania nejin: “¿Toni nikneki nikchiuas? ¿Keniuj nikneki maj tamati akin iuan nimonamiktis? ¿Taixejekol tein nikneki?”.

4. ¿Toni no kitajtanianij Jehová seki tokniuan?

⁴ Komo tikneki timonamiktis xa tikiluianiya Jehová tein tikneki (Filip. 4:6). Yejuatsin amo akin iuan motenkauani kitemolis akoni iuan monamiktis, sayoj ke kitekipachoua tein tikmachilia uan tein tikneki uan uelis mitspaleuis xikajsi aksa. Yejua ika nochipa xikilui tein tikmachilia (Sal. 62:8). Xiktajtani maj mitspaleui amo xiyolijsiui uan xitamatkej (Sant. 1:5). Se tokniuj takat de Estados Unidos akin monotsa Johnc kijtoua toni no kitajtania Jehová keman kitataujtia: “Nikiluia keniuj nikneki maj tamati akin nikneki iuan nimonamiktis, no nikiluia maj nechpaleui maj nikixmati aksa uan maj nimochiua se kuali tetakauj”. Se tokniuj siuat de Sri Lanka akin monotsa Tanya kijtoua: “Niktajtania Jehová maj nechpaleui maj amo nikaua uan maj niksentoka niyolpaki maski ayamo nikajsi se kuali tokniuj akin iuan nimonamiktis”. Uan, ¿toni panos komo ayamo tikajsi aksa? Jehová motenkaua mitsmakas tein mitspolos uan mitspaleuis xiyolpaki (Sal. 55:22).

5. ¿Toni kinpaleuis akin ayamo monamiktiaj maj kinixmatikan oksekin akin no kitasojtaj Jehová? (1 Corintios 15:58; no xikonita taixkopin).

⁵ Biblia techiluia ke moneki ‘nochipa tikchiujtoskej itekiuj toTekotsin’ (xikixtajtolti 1 Corintios 15:58). Komo tikchiua nejin uelis tietos iniuan okseki tokniuan takamej uan siuamej. Uan amo sayoj kuali timouikas iniuan, ta no uelis tikinixmatis oksekin akin ayamo monamiktiaj akin no kuali kitekitilijtokej Jehová. Uan kemej timochikaujtos tikyolpaktijtos Jehová, semi tiyolpakis.

6. ¿Toni moneki kielnamikiskej tokniuan akin kitemouaj akoni iuan monamiktiskej?

⁶ Sayoj ke, amo xiknemili ke tiktemojtos akoni iuan timonamiktis yejua tein okachi moneki (Filip. 1:10). Maski timonamiktijkejya oso amo, tinochin uelis tiyolpakiskej komo kuali timouikaj iuan Jehová (Mat. 5:3). Uan no, komo ayamo timonamiktia uelis okachi tiktekitilis Jehová (1 Cor. 7:​32, 33). Yejua ika komo ayamo timonamiktia, xikchiua nochi tein tiuelis para tiktekitilis Jehová. Jessica, akin nemi Estados Unidos monamiktij keman kipiaya kemej 40 xiujmej, yejua kijtoua: “Maski niknekia nimonamiktis, uelia niyolpakia porin nochipa nitanojnotsaya”.

XIKXELO TIEMPO PARA TIKITAS TEIN KICHIUA

7. ¿Keyej moneki achto kuali tikixmatis aksa para tikiluis tein tikmachilia? (Proverbios 13:16).

⁷ ¿Uan komo tikajsikya aksa akin tikita ke uelis iuan timonamiktis? ¿Moneki niman tikiluis tein tikmachilia? Biblia tamachtia ke akin tamattok, achto kitemoua kimatis seki taman uan satepan kichiua (xikixtajtolti Proverbios 13:16). Yejua ika achto ke tikiluis tein tikmachilia, moneki tikitas keniuj mouika iniuan oksekin keman namonechikouaj oso keman namoixpetaniaj. Se tokniuj de Países Bajos akin monotsa Albert, kijtoua: “Tein tikmachiliaj kemansa amo uejkaua. Yejua ika moneki tikxelos tiempo para tikitas keniuj tamati uan amo niman tikiluis tein tikmachilia”. Uan no, komo kuali tikixmati xa tikitas ke amo yejua akin tiknekiskia iuan timonamiktis.

8. ¿Keniuj se tokniuj uelis okachi kuali kiixmatis akin kiuelita? (No xikonita taixkopin).

⁸ Xa timotajtanis: “¿Keniuj uelis nikmatis keniuj tamati achto ke nikiluis tein nikmachilia?”. Itech kali kampa namosentiliaj oso keman namoixpetaniskej uelis tikitas toni kichiua, keniuj mouika iniuan oksekin oso keniuj mouika iuan Jehová. ¿Akonimej itasojikniuan? ¿Toni ika tajtoua? (Luc. 6:45). ¿Kiixtalijtok kichiuas tein tejua tikixtalijtok? Xa uelis titajtos iniuan tayekananij de inechikol oso iniuan okseki tokniuan akin kuali kiixmatij (Prov. 20:18). Xa uelis tikintajtanis keniuj kiitaj oksekin uan toni kualtsitsin taman kinextia (Rut 2:11). Sayoj ke keman tikitas tein kichiua uan keniuj tamati, amo xikchiua maj fiero momachili. Xikpoujkaita tein kimachilia uan amo xiktemo nochipa iuan tietos nion tikmatis nochi tein kichiuani.

9. Achto ke tikiluis aksa toni tikmachilia, ¿toni moneki tikelnamikis?

⁹ Yejua ika, ¿kemanian uelis tikiluis tein tikmachilia? Komo niman tikiluia, uelis kinemilis ke amo achto kuali tiknemilia tein tikchiua (Prov. 29:20). Sayoj ke komo kimati ke mitsyolnotsa uan amo niman tikiluia, uelis kinemilis ke semi tiknenemilia para tikixtalis teisa (Ecl. 11:4). Achto ke tikiluis aksa tein tikmachilia, xikelnamiki ke keman nanyeskij novios xa uelisok namokauaskej uan amo namonamiktiskej. Sayoj ke achto ke peuas timoixmatis iuan aksa, moneki kuali tikitas ox yekmelauj uelisya timonamiktis uan ke xa yejua akin uelis iuan timonamiktis.

10. ¿Toni moneki tikchiuas komo tikita ke aksa kineki okachi mitsixmatis uan tejua amo tikneki?

¹⁰ ¿Uan komo tikita ke aksa kineki okachi mitsixmatis? ¿Toni uelis tikchiuas? Komo tejua amo tikneki, moneki tiknextis ika tein tikchiua. Amo kuali yeskia komo tikaua maj kisentoka kinemilijto ke yejua no mitsyolnotsa komo amo melauj (1 Cor. 10:24; Efes. 4:25).

11. ¿Toni moneki kielnamikiskej akin kinpaleuiaj oksekin maj monamiktikan oso maj kipiakan novio oso novia?

¹¹ Itech seki altepemej, momattokej maj tetatmej oso akin xiuejkejya kiixpejpenakan akoni iuan monamiktis aksa. Itech okseki xolalmej, itasojikniuan oso ichankauan akin ayamo monamiktia, kitemoliaj akoni ueliskia yeski inovio oso inovia uan satepan kiixtaliaj maj moixmatikan uan maj kiitakan ox uelis kuali mouikaskej. Komo techtajtaniaj maj tikchiuakan nejin, moneki tikitaskej tein omen kiuelitaj uan tein kinekij. Komo tiknemiliaj ke tikajsikej se kuali tokniuj para se tochankauj oso se totasojikniuj, moneki kuali tikixmatiskej, tikmatiskej keniuj tamati, uan okachiok keniuj kitekitilijtok Jehová. Okachi moneki maj kuali mouika iuan Jehová ke tomin, tamachtilis tein kipia uan ox ueyichiujkej oso amo. Maski ijkon, moneki tikelnamikiskej ke yejuan kimatij ox monamiktiskej (Gál. 6:5).

¿KENIUJ UELIS TIKILUIS KE TIKNEKI MAJ MOCHIUA MONOVIA?

12. ¿Keniuj uelis tikiluis aksa maj mochiua monovio oso monovia?

¹² ¿Keniuj uelis tikiluis ke tikneki tiyeski tiinovio oso tiinovia?d Xa ueliskia iuan timonojnotsas kampa yetokej miakej, ika teléfono oso ika videollamada. Xikyekilui ke mitsyolnotsa uan ke tikuelitaskia okachi tikixmatis (1 Cor. 14:9). Komo mitsiluia ke moneki kinemilis, xikilui ke tikchias uan ke amo moneki niman mitsnankilis (Prov. 15:28). Uan komo mitsiluia ke amo, xikpoujkaita tein kimachilia.

13. ¿Toni uelis tikchiuas komo aksa mitsiluia ke kineki okachi mitsixmatis? (Colosenses 4:6).

¹³ ¿Toni uelis tikchiuas komo aksa mitsiluia ke kineki okachi mitsixmatis? Xikelnamiki ke monekik moyolchikauas para mitsiluis tein kimachilia, yejua ika xikpoujkaita uan kuali xiknojnotsa (xikixtajtolti Colosenses 4:6). Komo moneki tiknemilis, xikilui. Sayoj ke amo semi xiuejkaua (Prov. 13:12). Komo amo tikneki iuan timoixmatis, xikyekilui uan kuali xiknojnotsa. Se tokniuj de Austria akin monotsa Hans kijtoua tein kichiuak keman se tokniuj siuat kiluij ke kinekia okachi kiixmatis: “Kuali niknojnotsak uan nikyekiluij ke amo nechyolnotsaya, niman nikiluij para maj amo kinemiliani ke niknekia maj timoixmatikan. Yejua ika, desde ijkuak amo nikchiuaya nion nikijtouaya teisa tein ika ueliskia kinemilis ke nechyolnotsa”. Komo tikneki iuan timoixmatis, xikilui tein tikmachilia uan tein nankinekij maj mochiua keman nanyeskij novios. Xa tataman nantanemiliskej porin tataman namechiskaltijkej uan nantatamamej.

¿KENIUJ UELIS TIKINPALEUISKEJ AKIN AYAMO MONAMIKTIAJ?

14. ¿Toni moneki tikchiuaskej komo tiknekij tikinpaleuiskej akin ayamo monamiktiaj?

¹⁴ ¿Toni uelis tikchiuaskej tinochin para tikinpaleuiskej akin kinekij monamiktiskej? Moneki kuali tiknemiliskej tein tikijtouaj (Efes. 4:29). Maj timotajtanikan: “¿Nikijtoua teisa tein ‘teuetskitia’ sayoj ke yejuan uelis kinyolkokos? Keman nikita se tokniuj takat monojnotstok iuan se tokniuj siuat, ¿niman niknemilia ke moueuelitaj?” (1 Tim. 5:13). Uan no, maj amo tikchiuakan teisa tein kichiuas maj tokniuj kimachili ke teisa kipoloua porin ayamo monamiktia. Hans, akin ika titajtojkej itech okse párrafo, kijtoua: “Seki tokniuan nechiluiaj: ‘¿Keyej amo timonamiktia? Amo titelpiliok’. Nejon kichiua maj akin ininselti kimachilikan ke amo kinpatiuitaj uan maj kinemilikan ke moneki monamiktiskej”. Yejua ika, moneki tikiniluiskej teisa tein kinyolchikauas (1 Tes. 5:11).

15. 1) Kemej kijtoua Romanos 15:​2, ¿toni moneki tikelnamikiskej achto ke tikpaleuiskej aksa maj kiajsi akoni iuan monamiktis? (No xikonita taixkopin). 2) ¿Toni tikonuelitak tein nesik itech video? (Xikonita nota).

¹⁵ ¿Uan komo tikitaj ke se tokniuj takat uan se tokniuj siuat ueliskia monamiktiskej? Biblia techmachtia ke moneki tikpoujkaitaskej tein oksekin kimachiliaj uan tein kinemiliaj (xikonixtajtolti Romanos 15:2). Miakej akin ayamo monamiktiaj amo kiuelitaj maj oksekin kichiuakan maj kiixmatikan aksa, uan moneki tikpoujkaitaskej tein kinekij (2 Tes. 3:11). Sekin xa kinekiskej maj tikinpaleuikan, uan tikchiuaskej sayoj komo techtajtaniaj (Prov. 3:27).e Oksekin kinekij maj ichtaka kinpaleuikan. Se tokniuj siuat de Alemania akin ayamo monamiktia uan itokay Lydia, kijtoua: “Uelis tikinsentilis takat uan siuat kampa miakej yetoskej. Nejon uelis kinpaleuis maj moitakan uan maj moixmatikan”.

16. ¿Toni moneki kielnamikiskej akin ayamo monamiktiaj?

¹⁶ Tinochin uelis tiyolpakiskej maski timonamiktiskej oso amo (Sal. 128:1). Yejua ika komo ayamo tikajsini akoni iuan timonamiktis xiksentoka xiktekitili Jehová. Se tokniuj siuat de Macao akin motsa Sin Yi, kijtoua: “Komo tiknemiliaj kanachi tiempo tinemiskej itech xochital iuan totakatsin oso tosiuatsin tikitaskej ke tein melauj amo miak tiempo tietoskej toselti. Xiyolpaki uan kuali xikui tiempo komo ayamo tikajsi akoni iuan timonamiktis”. Sayoj ke ¿toni uelis tikchiuas komo tikajsikya aksa uan peua namoixmatij? Itech okse tamachtilis tikitaskej toni uelis mitspaleuis xikmati toni tikixtalis keman nanyeskij nannovios.