Esdras tamachtia iTanauatil Dios

Panokajya kemej 70 xiujmej keman miakej israelitas mokepkaj Jerusalén, maski sekin nemiajok itech miak xolalmej itech tekiuajyot Persia. Semej katka Esdras, se tiopixkat akin tamachtiaya iTanauatil Jiova. Esdras kimatik ke akin nemiaj Jerusalén amo kitakamattoyaj iTanauatil Dios, yejua ika kinekia yas kinpaleuitiuj. Artajerjes, akin tekiuajtia Persia, kiluij: “Dios mitsmakak tamatilis tein mitspaleuia xitamachti iTanauatil. Yejua ika xiyouj uan xikuika akin yeski akin kinekis yas mouan”. Esdras mosentilij iniuan nochin akin kinekiaj mokepaskej Jerusalén. Kitajtanijkej Jiova maj kinyekpiani itech ojti uan peuak ojtokaj.

Naui metsti satepan, ajsikej Jerusalén. Taixyekananij kiluijkej Esdras: “Israelitas amo kitakamatinij Jiova uan monamiktianij iniuan siuamej akin kinueyichiuaj tiotsitsin”. ¿Toni kichiuak Esdras? Motankuaketsak iixpan nochi xolal uan motataujtij: “Jiova, tejua titechmakani miak taman tein kuali, sayoj ke tejuan titajtakojtokej”. Israelitas moyolnonotskej, sayoj ke monekiaok maj kinpaleuikan maj kichiuakan tein kuali. Yejua ika Esdras kinixpejpenak taixyekananij uan tamelauanij maj kiitanij tein panotoya. Itech eyi metsti kinkixtijkej nochin akin amo kinekkej kiueyichiuaskej Jiova.

Panokej 12 xiujmej. Itech nejon xiujmej, oksepa kitamichijchiujkej tepamit tein kiyoualouaya Jerusalén. Esdras kinsentilij israelitas kampa kinixtajtoltiliskia iTanauatil Dios. Keman kitapoj amatajkuilol tein kipiaya Tanauatil, nochin moketskej. Esdras kiueyitalij Jiova, uan israelitas momaajokkej uan ijkon kinextijkej ke kuali yetoya tein moijtouaya. Satepan, Esdras kiixtajtoltij Tanauatil uan kimelauak. Nochin kikakkej ika miak nejmachkayot. Kiajsikamatkej ke oksepa mouejkatilijkaj iuan Jiova uan peuak chokaj. Mostika, Esdras kisentokak kinixtajtoltilij Tanauatil. Israelitas kiitakej ke amo uejkaua monekia kichiuaskej Iluit itech Sakakaltsitsin. Uan niman peuak kichiuaj tein monekia tein ika kichiuaskiaj iluit.

Israelitas semi yolpakkej chikome tonalmej tein uejkauak iluit. Kitasojkamatilijkej Jiova porin motemakaka nochi inintatok. Kichiujkaj se Iluit itech Sakakaltsitsin kemej nejon keman Josué yoltoyaok. Keman tamik iluit, mosentilijkej uan kichiujkej nejin netataujtil: “Jiova, tejua titechkixtij kampa techtajyouiltiayaj. Titechtamakak itech taluakyan uan titechmakak nejin kualtsin tal. Sayoj ke tejuan miakpa amo timitstakamatinij. Uan maski titechtitanilij miakej tanauatianij maj technejmachtikij, amo tikinkakkej. Maski ijkon, amo tiyolijsiuik. Amo keman tikelkauak tein timotenkauak iuan Abrahán. Axkan, timotenkauaj ke timitstakamatiskej”. Moijkuiloj tein nochin motenkaujkej, uan taixyekananij, levitas uan tiopixkamej kitalilijkej sello.