Tanojnots 81
Takuaujtamatkej itech inepaleuil Dios
AJSITOYAYA 50,000 israelitas tein kiskej Babilonia uan moojketskej Jerusalén. Sayoj ika keman ajsikej, nochi Jerusalén tauejueliujtoya. Uan amo akin nemia ompa. Yejika israelitas monekik tayekachijchiuaskej nochi.
Yekinika tachijchiujkej kampa kimakaskiaj Jiova tapialmej, kemej nemaktilmej oso netetayokolilmej. Se ome eyi metsti satepan, israelitas peuak kichijchiuaj templo. Sayoj ika taixnamikinij tein nemiaj ompakauinisaj itech okseki altepemej, kinimojmoujtiayaj maj kikauanij tekit. Satepan, taixnamikinij uelik kichiualtijkej yankuik tekiuaj persa, se tanauatil kampa kijtouaya maj kikauanij tekit.
Panokaya 17 xiujmej keman israelitas kiskaj Babilonia. Dios kintitanik itanauatijkauan Ageo uan Zacarías, maj kiniluianij israelitas maj oksepa tekitikan. Israelitas takuaujtamatkej itech inepaleuil Dios uan tatakamatkej. Oksepa peuak tekitij, maski se tanauatil kijtouaya ika amo.
Yejika se ueyichiujkej persa tein motokaytij Tatenai, kinitato israelitas uan kintajtanij akoni kininauatij maj kichijchiuanij templo. Yejuan kiiluijkej ika keman moajsiaj Babilonia, tekiuaj Ciro kiniluijka: ‘Xiyakan Jerusalén uan xikchijchiuatij itemplo Jiova namoDios’.
Tatenai kititanik Babilonia se amat uan tajtanik ox Ciro, tein amo nemiaok, yekmelauj kijtojka nejon. Uan niman kiejkok se amat tein kititanilij yankuik tekiuaj persa, kampa kijtouaya ika kemaj ijkon moijtojka. Yejika tekiuaj tajkuiloj: ‘Xikinkauakan israelitas maj kichijchiuakan itemplo imin Dios. Uan namechnauatia xikinpaleuikan’. Uan kemej naui xiuit matankej templo uan israelitas tel yolpakiaj.
Panok tel miak xiujmej. Ajsitoyaya 48 xiujmej keman matankaj templo. Ompa Jerusalén, israelitas kipanotoyaj tatasojtilis, uan altepet uan itemplo Dios amo kualtsin moitayaj. Ompa Babilonia, Esdras tein katka israelita kimatik ika monekia kiyekchiuaskej itemplo Dios. Yejika, ¿tikmati toni kichiuak?
Esdras kiitato Artajerjes, tein tekiuajtia Persia, uan kemej katka se tekiuaj yolkuali, kimakak Esdras miak netetayokolilmej maj kiuikani Jerusalén. Esdras kiniluij israelitas tein moajsiaj Babilonia maj kipaleuianij, uan kemej 6,000 kijtojkej ika yaskiaj. Kiuikakej miak plata, oro uan okseki taman tein tel patiyoj.
Esdras motekipachoj, porin ojti moajsiaj takamej amo yolkualmej. Nejin takamej ueliskia kinkuiliskiaj plata uan oro uan kinimiktiskiaj. Yejika Esdras kinsentilij israelitas, kemej tikita itech taixkopin. Ompa, kichiuak se netataujtil iuan Jiova uan kitajtanij maj kiniyekpiani keman mokepaskiaj Jerusalén.
Jiova kemaj kiniyekpiak. Satepan keman ojtokakej naui metsti, kuali ajsikej Jerusalén. ¿Melauj ika nejin kinextia ika Jiova ueli kiniyekpia tein iuan takuaujtamatij?