Tein tamachtia iTajtol Dios
¿Keniuj yeski tekiuajyot itech nochi taltikpak tein Dios motenkaua kiualkuis?
Nejin tamachtilis mitsonpaleuis xikonajsi itech moBiblia itanankilil seki netajtanilmej tein xa tionmochiuiliani. Komo tikonneki, itaixpantijkauan Jiova uelis kiitaskej mouan nejin netajtanilmej.
1. ¿Keyej taltikpakneminij moneki kipiaskej sayoj se tekiuajyot itech nochi taltikpak?
Axkan, kuejmolmej tein kipiaj taltikpakneminij moita itech nochi taltikpak. Itech seki altepemej, taltikpakneminij semi ouij moixpanoltiaj uan kintajyouiltiaj, sayoj ke itech okseki altepemej kipiaj okachi ke tein moneki. Komo sayoj se tekiuajyot taixyekanaskia itech nochi taltikpak ueliskia kixejxelos ika melaujkayot tein ika se moixpanoltia. (Xikonixtajtolti Eclesiastés 4:1 uan 8:9.)
2. ¿Akoni uelis kiselis tekiuajyot itech nochi taltikpak?
Miakej amo kinekij maj moajsi sayoj se tekiuaj itech nochi taltikpak, porin kinemiliaj ke amo akin uelis yektekitis. Semi ouij maj aksa nochin kiselikan kemej inintekiuaj. Uan no, porin moita ke akin kipia tanauatil kiuejueloua. Semi kimouiliaj keman tanemiliaj maj se tekiuaj akin teikamauiltia taixyekana itech nochi taltikpak. (Xikonixtajtolti Proverbios 29:2 uan Jeremías 10:23.)
Jiova Dios kiixpejpenak iKonetsin Jesús maj kinixyekana taltikpakneminij nochipaya (Lucas 1:32, 33). Jesús kimatiya keniuj tinemij nikan taltikpak. Keman yetoya nikan, kinpajtij akin mokokouayaj, kinmachtij akin kipiayaj kuali ininyolo uan no mosentiliaya iniuan konemej (Marcos 1:40-42; 6:34; 10:13-16). Yejua ika, Jesús yeski se tel kuali taixyekankej. (Xikonixtajtolti Juan 1:14.)
3. ¿Yekmelauj uelis onkas sayoj se tekiuajyot itech nochi taltikpak?
Ompa iluikak, Dios kiixtalij iKonetsin maj taixyekana nikan taltikpak (Daniel 7:13, 14). Ijkon kemej se tekiuaj tein moajsi itech se altepet amo moneki yetos itech nochi xolalmej kampa taixyekana, Jesús amo no moneki yetos nikan taltikpak uan ijkon kiixyekanas. (Xikonixtajtolti Mateo 8:5-9, 13.)
¿Nochin kiseliskej Jesús kemej inintekiuaj? Sayoj kichiuaskej akin kitasojtaj tein kuali. Sayoj ke akin kiixnamikiskej tekiuaj tetasojtakej uan yolmelauak akin Dios kiixpejpenak, ixpoliuiskej. (Xikonixtajtolti Mateo 25:31-33, 46.)
4. ¿Toni kichiuas Jesús kemej tekiuaj itech nochi taltikpak?
Ijkon kemej se tajpixkej kinsentilia iichkauan, Jesús kinsentilijtok taltikpakneminij yolyemankej akin moajsij itech nochi altepemej, uan kinmachtijtok maj tetasojtakan kemej Dios kichiua (Juan 10:16; 13:34). Yejuan, ika miak pakilis mokauaj maj kinixyekana Jesús uan itekiuajyo (Salmo 72:8; Mateo 4:19, 20). Nejin akin amo keman kikauaj itaixyekanalis Jesús, kiteixmatiltijtokej noyampa taltikpak ke Jesús yejua Tekiuaj. (Xikonixtajtolti Mateo 24:14.)
Amo uejkaua, Jesús kinixpolos tekiuanij akin amo melaujkanemij uan ijkon tamis tajyouilis tein yejuan kiualkuij. Yejua kinixpejpenak seki itatojtokakauan akin amo kikauaj, maj iuan tekiuajtikan ne iluikak (Daniel 2:44; 7:27). Nejin Tekiuajyot kichiuas maj itech nochi taltikpak moajsi taixmatilis tein Jiova kitemaka, uan oksepa kichiuas se xochital kemej tein yekinika kichiujka. (Xikonixtajtolti Isaías 11:3, 9 uan Mateo 19:28.)