NETAJTANILMEJ TEIN KISAJ ITECH BIBLIA
¿Uelis oksepa nemiskej akin momikilijkejya?
Mikemej kemej yeskia kochtokej porin amo teyi kimatij nion uelij kichiuaj teisa. Sayoj ke Dios akin kitemaka nemilis uelis kichiuas maj oksepa nemikan. Nejon tikmatij porin Dios kimakak Jesús chikaualis, uan ijkon oksepa kinmakak nemilis sekin akin momikilijkaj. (Xikonixtajtolti Eclesiastés 9:5 uan Juan 11:11, 43, 44.)
¿Toni kijtosneki maj mikemej moajsikan kemej yeskia kochtokej?
Dios motenkaua ke ijkuak ajsis tonal, akin momikilijkej tein yetokej itech itanemilil, oksepa nemiskej keman tayektalis nikan taltikpak. Dios akin nochi ueli kichiua, kineki ika ichikaualis oksepa kinmakas nemilis akin momikilijkejya. (Xikonixtajtolti Job 14:14, 15.)
¿Keniuj oksepa nemiskej?
Akin oksepa nemiskej kimatiskej akonimej yejuan, uan kinixmatiskej ininchankauan uan akin iniuan kuali mouikayaj. Uan maski ininnakayo uejueliuik keman momikilijkej, kinmakas okse yankuik, sayoj ke tamatiskej kemej achto. (Xikonixtajtolti 1 Corintios 15:35, 38.)
Sekin akin amo semi miakej, oksepa kipiaskej nemilis sayoj ke ne iluikak (Apocalipsis [Revelación] 20:6). Uan tel miakej oksepa nemiskej nikan taltikpak tein mochiuas se xochital. Oksepa peuas nemiskej, uan uelis amo keman momikiliskejok. (Xikonixtajtolti Salmo 37:29 uan Hechos 24:15.)