¿Tikonchiua tein Dios tajtani?

“Komo tikneki maj nimitspaleui ika teisa, sayoj xinechilui uan nimitspaleuis.” Tein melauj amo tikoniluiskia nejon se akin nion tepitsin tikonixmati oso aksa akin yekin tikonixmatik. Sayoj ke, nion tepitsin mitsonouijmakaskia tikoniluis akin kuali iuan tionmouika, uan taixejekol nejon, porin tinochin tiknekij tikinpaleuiskej akin iuan kuali timouikaj uan tikchiuaskej tein techtajtaniaj.

Biblia kinextia ke Jiova nochipa kichiua miak taman tein tapaleuia maj itekitikauan okachi yolpakikan. Kemej neskayot, tekiuaj David akin kuali mouikaya iuan Dios, kiyekijtoj: “Miak taman tejuatsin tikchijchiuani, Jiova noDios, uan tein kualtsin tein tikchijchiuani uan tein tiknemilia toka [...;] mochiuani tel miak okachi ke tein nejua uelis niktetapouis” (Salmo 40:5). Sayoj ke Jiova kichiua okachi miak taman, kichiua tein kuali hasta iniuan akin amo kiixmatij. Kinmaka ‘uel miak in takualis para ixuitoske uan para moyolpaktijtoske’ (Hechos 14:17).

Kemej Jiova kiuelita techmakas tein techyolpaktia, semi taixejekol maj tejuan timochikauakan tikyolpaktiskej (Proverbios 27:11). Axkan, netajtanil: ¿Toni moneki tikchiuaskej uan ijkon tikyolpaktiskej Dios? Tanankilil tikajsij itech Biblia: “Amo ximoelkaualtikan de nankichiutinemiske ten kuali uan [...] ximopaleuijtiyakan se uan okse ika ten namoaxka. Porin nochi nijin namotapaleuilis mochiua keme se tetayokolil ten nankimaktiliaj Dios uan tenika nankiyolpaktiaj Dios” (Hebreos 13:16). ¿Kijtosneki nejon ke uelis tikyolpaktiskej Jiova komo sayoj tikchiuaj tein kuali uan tikinpaleuiaj oksekin?

Amo sayoj moneki nejon. Biblia kiyekijtoua ke “komo se aksa amo takuautamatinemis iuan Dios, ijkuakon amo uelis kiyolpaktijtinemis” (Hebreos 11:6). No kinextia ke Abrahán moixmatik kemej “itasojikniuj Jiova”, sayoj satepan keman iuan takuaujtamatik (Santiago 2:23, TNM). Uan no, Jesucristo kijtoj ke komo tiknekij tikseliskej itatiochiualis Dios motelneki titakuaujtamatiskej iuan yejuatsin (Juan 14:1). Komo ijkon, ¿keniuj uelis tikonpias takuaujtamatilis tein Dios kineki maj kipiakan akin kuali iuan mouikaj? Se taman tein mitsonpaleuis yejua komo nochipa tionmomachtia Biblia. Ijkon tikonmatis tein mitsontajtania uan uelis tikonyolpaktis itech nochi tein tikonchiuas. Komo tionmochikaua kuali tikonixmatis uan tikontakamatis, okachi tiontakuaujtamatis iuan Jiova uan yejuatsin okachi motokis mouan (Colosenses 1:9, 10).