Biblia uan kemej tinemiskej satepan

XIKONNEMILI ke tionojtokatok kampa tayouayan. Maski yeuaya tapoyauik, amo tikonmachilia ke senkis tikonpolojtok ojti porin tionmaktiuj se tauil tein tel kuali. Keman tiontauia talpan, kuali tiontachia. Uan keman tiontauia taixpan, chikauak tanex tauia uejka itech ojti kampa tionyajtok.

Biblia kemej yeskia nejon tanex tein techpaleuia itech miak taman. Ijkon kemej tikitakej itech okseki tamachtilismej, iTajtol Dios techpaleuia maj tikixnamikikan ouijkayomej tein tikpanouaj mojmostaj itech nejin taltikpak kampa amo tikmatij toni panos satepan. Sayoj ke, no techmatiltia ke satepan mochiuas tein kuali, porin technextilia ojti tein teuika itech yolpakilis tein amo keman tamis uan techpaleuia maj ompa tiojtokakan (Salmo 119:105). ¿Keniuj kichiua?

Maj tikitakan ome taman keniuj Biblia techpaleuia maj tikpiakan se kuali nemilis satepan: 1 Techmatiltia keyej tinemij uan 2 techmachtia keniuj nochipaya kuali timouikaskej iuan toTachijchiujkauj.

1 TIKMATISKEJ KEYEJ TINEMIJ

Biblia techmaka kuali tayolmajxitilismej tein techpaleuiaj maj tikixnamikikan ouijkayomej, sayoj ke okachi kuali ke se amatajkuilol tein ika timopaleuiskej. Techmachtia maj amo titanemilikan sayoj itech tonetekipacholuan, ta no tein kipanouaj oksekin. Komo tikchiuaj, tiyolpakiskej itech tonemilis.

Xiontanemili itech nejin tayolmajxitilis: “Kachi yolpaktok in tagat ten tapaleuijtinemi ika ten niaxka uan ke ne tagat ten sayo kiselia tapaleuilis” (Hechos 20:35). ¿Tikonpaleuiani aksa akin amo kipiaya tomin? ¿Oso tikonkakik ika nejmachkayot se akin kuali iuan tionmouika keman mitsontapouij tein kimachiliaya? ¿Melauj ke tionyolpakik tikonpaleuis aksa maj kuali momachili nejon tonal?

Keman titemakaj uan amo tikchiaj maj techkepilikan, okachi tiyolpakij. Se tajkuilojkej kijtoj: “Keman tikinpaleuiaj oksekin, nochipa tikseliskej okachi ke tein titemakaj, sayoj komo amo tikchiaj maj techkepilikan”. Sayoj ke, ijkuak tiktemouaj tikinpaleuiskej oksekin, uan okachiok akin amo kipiaj tein ika techtaxtauiskej, kemaj tikseliaj teisa. Tikpiaj tatiochiualis titekitiskej iuan toTachijchiujkauj, akin kiita kemej yeskia motauikaltia touan keman tikinpaleuiaj oksekin (Proverbios 19:17). Dios semi motasojkamati keman tikinpaleuiaj oksekin uan motenkaua ke techtaxtauis ika nemilis nochipaya keman kichiuas se xochital nikan taltikpak. ¡Tel kualtsin tein tikchiaj! (Salmo 37:29; Lucas 14:12-14).a

Sayoj ke, Biblia kijtoua ke moneki tikueyichiuaskej Dios akin melauak, sayoj ijkon yekmelauj tiyolpakiskej. ITajtol techyoleua maj tikueyichiuakan, maj tikueyitalikan uan maj tiktakamatikan kemej kinamiki (Eclesiastés 12:13; Apocalipsis 4:11). Keman tikchiuaj, tikyolpaktiaj toTachijchiujkauj. Tein melauj yejuatsin techiluia: “Xitamatkej, nokonetsin, uan xinechyolpakti” (Proverbios 27:11). ¿Tiontanemiliani itech nejin? Keman kuali titaixpejpenaj porin timoyekanaj ika tein Biblia tayolmajxitia, tikyolpaktiaj toTajtsin Dios. ¿Keyej? Porin yejuatsin toka motekipachoua uan kineki maj tikchiuakan tein techyolmajxitia porin ijkon kuali tinemiskej (Isaías 48:17, 18). ¿Uelis moajsis okse taman tein okachi techyolpaktis ke tikueyichiuaskej akin okachi Ueyichiujkej itech nochi semanauak uan tikyolpaktiskej?

2 TOKUALI UIKALIS IUAN TOTACHIJCHIUJKAUJ

Biblia no techmachtia keniuj uelis kuali timouikaskej iuan toTachijchiujkauj. Kijtoua: “Ximotokikan iuan Dios uan Yejuatsin no motokis namouan” (Santiago 4:8). Xa techouijmakas tikneltokaskej ke uelis kuali timouikaskej iuan toTachijchiujkauj akin kipia miak chikaualis. Sayoj ke Biblia senkis techiluia ke komo tiktemouaj Dios, tikajsiskej porin “Yejuatsin amo uejka yetika de cada senme de tejuan” (Hechos 17:27). Kuali timouikaskej iuan Dios ijkon kemej Biblia techyolmajxitia, semi techpaleuis maj satepan tikpiakan tein kuali. ¿Keyej?

Xiontanemili itech nejin: maski senkis tiktemoskej amo timomikiliskej amo teyi ueli tikchiuaj (1 Corintios 15:26). Sayoj ke, Dios amo keman momikilis. Nochipa nemis uan kineki maj akin iniuan kuali mouika no nemikan nochipaya. Jiova kinextia ika nejin kualtsitsin tajtolmej tein kineki maj kipia akin kitemoua: “Xinemi nochipaya ika yolpakilis” (Salmo 22:26).

¿Uan keniuj uelis nochipaya kuali tionmouikas iuan Dios? Xikonsentoka xikonixmati yejuatsin itech iTajtol, Biblia (Juan 17:3; 2 Timoteo 3:16). Xikonilui maj mitsonpaleui xikonajsikamati. Ompa senkis techiluia ke komo ika nochi toyolo tiksentokaj tiktajtaniaj tamatilis, yejuatsin techmakasb (Santiago 1:5). Uan no, xionmochikaua tikonchiuas tein tionmomachtia; ijkon iTajtol Dios yeski “se tauil” tein mitsontauilis axkan uan nochipaya kampa tionnejnemis (Salmo 119:105).