3 Techpaleuia maj tikxikokan ouijkayomej

Onkak kuejmolmej tein axkan amo uelis tikyektaliskej nion timoijkuaniliskej. Xa momikiliani se akin tikontasojta oso tikonpia se kokolis tein amo kipia pajti, komo ijkon xa sayoj monekis tikontemos keniuj tikonxikos nejon. ¿Uelis techpaleuis Biblia itech nejon taman?

KOKOLISMEJ TEIN AMO KIPIAJ PAJTI

Rosa kijtoua: “Nikpia se kokolis tein nochankauan no kipianij tein semi nechtajyouiltia. Nejon kichiua maj amo kualtsin ninemi”. Se taman tein semi kitekipachouaya yejua ke kiouijmakaya senkis tanemilis itech tein momachtijtoya itech Biblia. Semi kiyolseuij tein kijtoj Jesús itech Mateo 19:26: “Sayo Dios uelis nochi kichiuas”. Rosa kiitak ke onkak miak taman kemej uelis se momachtis. Kemansa amo semi uelia taixtajtoltiaya porin motelkokouaya, yejua ika peuak kikaki ika grabación Biblia uan amaixmej tein ika tajtouaj Biblia.a Yejua kijtoua: “Komo amo moajsiskia nejin taman, amo ueliskia nikchikauas notakuaujtamatilis itech Dios”.

Keman Rosa motayokoltia porin amo ueli kichiua tein achto kichiuaya, kiyolseuia tein kijtoua 2 Corintios 8:12: “Komo se tokniu kiyolnejneki tapaleuijtinemis, [...] Dios kiueyipouas itapaleuilis [...] ijkon keme ne tokniu ueli tapaleuia. Porin Totajtsin amo kitajtania tapaleuilis komo se tokniu amo kipia tenika tapaleuis”. Nejin kielnamiktia ke Dios yolpaki porin kichiua nochi tein ueli maski mokokoua.

KEMAN MOMIKILIA SE AKIN TIKTASOJTAJ

Diana, akin ika titajtojkejya, kielnamiki: “Semi nechyolkokoj keman momikilij nosiuapil, akin sayoj kipiaya 18 xiujmej, yejua ika niknemilij ke amo ueliskiaok ninemis. Mopatak nonemilis”. Diana semi kiyolchikauak Salmo 94:19, kampa akin kijkuiloj Salmo mokuikatij iixpan Dios: “Keman nonetekipacholuan motelmiakilijkej, tinechyolchikauak uan tinechyolseuij”. No kijtoua: “Niktajtanij Jiova maj nechpaleui maj nikajsi se tekit tein nechyolseuiskia”.

Diana tel tekitik itech se taman tein kichiuaya maj semi yolpaki. Satepan, yejua moitak ke tamatia kemej colores tein konemej ika kintapaluiaj taixkopimej: kinkuij hasta tein postektokej. No ijkon, maski yejua kimachiliaya ke postektoya kemej nejon colores, ueliskiaok kinpaleuis oksekin. Yejua kijtoua: “Nikitak ke, ijkuak nikuia tein Biblia tayolmajxitia uan tanemililmej tein kipia uan ika nikinyolseuiaya akin nikinmachtiaya ika Biblia, Jiova no nechyolseuijtoya nejua”. Kijkuiloj inintokay akin Biblia kijtoua ke kipanokej tekokojkayot. ¿Toni momachtij? “Nochin yejuan semi motataujtiayaj”. No momachtij ke “komo amo se kiixtajtoltia Biblia, amo se kiajsis nepaleuil”.

Sayoj ke Biblia kimachtiani Diana okse taman: maj okachi tanemili itech tein kipias satepan uan amo itech tein kipanouani. Semi kiyolchikaua Hechos 24:15 kampa kijtoua tein mochiuas satepan: “Dios kinpankixtis yoltokke nochi in ánimajme, [oso mikemej] amo sayo in yolkualime. Ta, no nekes ten amo yolkualime”. ¿Yekmelauj kineltoka ke Jiova oksepa kimakas nemilis isiuapil? Yejua kijtoua: “Senkis nikmati ke oksepa nikitas nosiuapil. NoTajtsin Dios kijkuilojya itech ‘iamatajkuilol’ tonal keman oksepa timoitaskej. Kemej yeskia nikitstokya iuan niijkatok kalixpan, niktasojtatok ijkon kemej niktasojtak ijkuak yolik”.

a Miak nejon grabaciones moajsij itech jw.org, Internet kampa timoteixmatiltiaj.

Biblia ueli techyolseuia hasta keman semi titajyouijtokej

¿Keniuj uelis techpaleuis Dios?

Biblia techyekiluia nejin: “Jiova amo moajsi uejka iniuan nochin akin kinotsaj, nochin akin kinotsaj ika melaujkayot. Yejua kinmaka inintanejnekilis akin kimoujkatokaj; kinkaki keman kitsajtsiliaj maj kinpaleui, uan kinmakixtia” (Salmo 145:18, 19). ¡Tel kualtsitsin nejin tajtolmej! Sayoj ke ¿keniuj technankilia Dios keman tiktataujtiaj maj techpaleui?

TECHCHIKAUA

Ouijkayomej uelis kichiuaskej maj timosenkauakan, maj tisiouikan uan maj amo timomachtikanok iTajtol Dios (Proverbios 24:10). Sayoj ke Jiova “kimakatok chikaualis akin sioujtok uan kitelchikaujtok akin kipoloua chikaualis” (Isaías 40:29). Pablo, se imomachtijkauj Jesús akin kixikoj uejueyi ouijkayomej, kijtoj: “Itech nochi taman nikpia chikaualis itechkopa akin nechmaka chikaualis” (Filipenses 4:13, TNM). Dios kiyolchikauak ika iespíritu uan no ijkon uelis kichiuas mouan komo tikontajtania (Lucas 11:13).

TECHMAKA TAMATILIS

¿Toni uelis tikonchiuas komo tikonneki maj mitsonpaleuikan xikonajsikamati uan xikonchiua tein Biblia tayolmajxitia? Santiago, se itatojtokakauj Cristo kijkuiloj: “Komo aksame tokniuan taneltokani kipoloaj in kuali taixejekolis, ijkuakon ma kitajtanilikan Totajtsin Dios uan Yejuatsin kinmakas ne tamachilis ten kinpoloaj. Porin Yejuatsin nachipa kitetayokolijtika uan amo aken kinixtopeua kuak yejuan motatatautiliaj” (Santiago 1:5). Uelis tikonpias tein tiontajtani itech monetataujtiluan komo tikonixtajtoltia Biblia uan tikonchiua tein tionmomachtia ompa (Santiago 1:23-25). Komo tikonchiua, tikonitas keniuj tein Biblia tayolmajxitia semi tapaleuia.

TECHYOLSEUIA

Hasta komo semi tionmotekipachojtok, Jiova uelis mitsonpaleuis xionyolseujto. ITajtol kijtoua: “Amo teyika ximoyolkuejmolokan. Ta, nachipa ximoteixpantikan iixpantsinko Totajtsin Dios ika namonetatatautilis uan xiktasojkamachilikan Dios. Uan no xiktajtanilikan Dios nochi ten namechpoloa. Uan [...] namechtayokolijtiyas ne yolseuilis ten kachi kuika uelilis [...]. Uan [...] kinyekantinemis namoyolojuan uan namotamachilisuan porin Cristo Jesús yetinemi namouan” (Filipenses 4:6, 7). ¿Keyej amo tikontajtania Jiova maj mitsonyolseui?

¿Uan komo mokuejmoluan amo niman moyektaliaj? Amo xikonnemili ke Dios mitsonelkauani. Keman kuejmolmej kisentokaj, Jiova uelis techmakas chikaualis tein techpaleuis maj titaxikokan (1 Corintios 10:13, TNM). Uan no, Biblia motenkaua ke ejkos tonal keman nochi kuejmolmej tein tikpiaj senkis tamiskej.