Uelis tionyolpakis axkan
XIONMONEMILI ke satepan amo akin kokolispeuaok, amo akin ueuentsintiaok nion momikiliaok. Tejuatsin uelis tikonitas nejon. Sayoj ke, axkan tikpanouaj miak ouijkayomej. Maski ijkon, ¿keniuj uelis tionyolpakis axkan? Tein Biblia tayolmajxitia uelis mitsonpaleuis xionyolpaki. Maj tikitakan seki taman tein kemansa ouij techkisa tikchiuaskej uan maj no tikitakan keniuj techpaleuia Biblia.
MAJ TIYOLPAKIKAN IKA TEIN TIKPIAJ
Biblia tayolmajxitia: “Amo ximotekauilikan de xiktasojtatinemikan kachi ok intomin. Ta, ximoyolpaktijtinemikan sayo ika ten nankipiaj ya” (Hebreos 13:5).
Axkan, noyampa motematiltia miak taman tein uelis tikouaskej. Sayoj ke, Biblia kijtoua ke uelis tiyolpakiskej sayoj ika tein tikpiaj. ¿Keniuj uelis tikchiuaskej?
Maj amo tiktelnejnekikan timotomintiskej. Akin kitelnejneki “moaxkatilis miak ricojyot” uelis kichiuas miak taman maski nejon uelis kiuikas maj kokolispeua, maj amo semi yeto iniuan ichankauan oso akin iniuan mouika, maj amo kuali monejnemiltiok uan hasta uelis kinextis ke amo mopatiuitaok (1 Timoteo 6:10). ¡Tel amo kuali nejon! Uan no, akin kitelnejneki motomintis nochipa kinekis okachi tomin (Eclesiastés 5:10).
Maj tikelnamikikan ke tejuan okachi tikpiaj topatiuj ke okseki taman. Maski onkak miak taman tein semi techpaleuiaj, amo ueli technextiliaj ke techtasojtaj nion ke techpatiuitaj kemej aksa kichiuaskia. Sayoj ke, komo timouikaj iuan aksa akin yekmelauj techpaleuia, okachi tiyolpakiskej (Proverbios 17:17).
KOMO TIKCHIUAJ TEIN BIBLIA TAYOLMAJXITIA, TIYOLPAKISKEJ
MAJ TITAXIKOKAN MASKI TIKPIASKEJ SE KOKOLIS
Biblia tayolmajxitia: “Se yolo tein paki se kuali pajti” (Proverbios 17:22).
Keman tiyolpakij techpaleuia maj tikxikokan se kokolis. Sayoj ke ¿keniuj uelis tiyolpakiskej maski timokokouaj?
Maj timotasojkamatikan. Komo sayoj itech titanemiliaj tein tikpanouaj, mojmostaj amo kuali timomachiliskej (Proverbios 15:15). Sayoj ke, Biblia techiluia: “Xiktasojkamachilijtiyakan Totajtsin Dios” (Colosenses 3:15). Yejua ika, xikontasojkamati nochi tein kuali tein tikonpia, maski nesis ke amo semi kipia ipatiuj. Itech xiontanemili keman pankalaki Tonaltsin, keman kualtsin taejeka oso keman mitsonixuetskilia aksa akin tikontasojta. Nejon uelis kichiuas okachi xionyolpaki.
Maj tikinpaleuikan oksekin. Maski tikpiaskej se kokolis, semi techpaleuis nejin tajtolmej: “Kachi yolpaktok in tagat ten tapaleuijtinemi ika ten niaxka uan ke ne tagat ten sayo kiselia tapaleuilis” (Hechos 20:35). Keman tikinpaleuiaj oksekin uan techtasojkamatiliaj, semi tiyolpakij uan tikelkauaj tein tikpanotokej. Yejua ika, komo tikchiuaj maj oksekin kuali momachilikan, tejuan no kuali timomachiliskej.
MAJ KUALI TIMOUIKAKAN IUAN TONAMIK
Biblia tayolmajxitia: Maj tikchiuakan tein “okachi tayekantok” (Filipenses 1:10, TNM).
Keman namikuanij amo semi senyetokej, xa peuas amo kuali mouikaskejok. Yejua ika, namikuanij moneki kitayekanaltiskej kuali mouikaskej.
Xiksenchiuakan seki taman. Biblia kijtoua ke “okachi kuali omen uan amo se” (Eclesiastés 4:9). ¿Uelis nankisenchiuaskej seki taman? Xa uelis nankisenchiuaskej tapalol, nansenyaskej kansaika, nansentakuaskej oso nankisenchiuaskej okseki taman.
Xikonnextili monamik ke tikontasojta. Biblia kijtoua ke takat uan siuat akin namikuanij moneki motasojtaskej uan mopoujkaitaskej (Efesios 5:28, 33). Komo tikonixuetskilia monamik, tikonnaua oso tikontayokolia se taman maski amo ueyi, mitsonpaleuis okachi kuali iuan xionmouika. Uan no, moneki tikelnamikiskej ke akin kipia inamik sayoj yejua uelis iuan motekas (Hebreos 13:4).