Keman Dios taixyekanaya, nochin kualtsin nemiaj

¿Keyej moneki maj techixyekana iTekiuajyo Dios?

Akin techchijchiuak motokaytia Jiova. Keman yejuatsin kinchijchiuak yekinika takat uan yekinika siuat sayoj yejua taixyekanaya, uan kinnextiliaya ke kintasojtaya. Yejua ika, kualtsin tachijchiuak kampa nemiskiaj ompa Edén, uan kipiayaj miak taman tein ueliskia kikuaskej. No kinmakak se tekit tein kinyolpaktiskia (Génesis 1:28, 29; 2:8, 15). Komo mokauaskiaj maj Dios kisentokani kinixyekantoni, kualtsin tinemiskiaj axkan.

Adán maktok takilot tein Eva kimakak — Yekinika takat uan yekinika siuat amo kinekkej maj Dios kinixyekananiok

Biblia kijtoua ke se ángel akin amo yolkuali, oso Amokuali Satanás, taixnamikik uan kijtoj ke Dios amo kinamiki taixyekanas. Adán uan Eva no kichiujkej kemej Satanás uan kiixnamikkej Dios (Génesis 3:1-6; Apocalipsis 12:9).

Adán uan Eva kiixnamikkej Jiova uan amo mokaujkejok maj kinixyekanani. Yejua ika, amo ueliaok nemiskej ompa Edén uan amo uelikok nenkej nochipaya uan kokolispeujkej (Génesis 3:17-19). Tein kichiujkej no kinijtakoj ininkoneuan. Biblia kijtoua ke kemej Adán tajtakoj, “in tajtakol momauak ya tech nochi senmanauak. Uan no tikmatij ke ongak mikilis nochi senmanauak ika por ne tajtakol” (Romanos 5:12). Nejon tajtakol no kiualkuik okse kuejmol. Biblia kijtoua: “Taltikpaknenkej kiixyekana taltikpaknenkej uan kitajyouiltia” (Eclesiastés 8:9). Nejon kijtosneki ke onkak miak kuejmolmej porin toselti timoixyekanaj.

KEMAN SEKIN PEUAK TAIXYEKANAJ

Nemrod moueyineki. Taikampa sekin kichijchiuaj se uejkapan kali — Nemrod kiixnamikik Jiova

Biblia kijtoua ke akin yekinika peuak taixyekana motokaytiaya Nemrod. Sayoj ke, yejua kiixnamikik Dios uan amo mokauak maj kiixyekanani. Hasta axkan, miakej akin taixyekanaj kisentokaj kintajyouiltiaj oksekin. Yejua ika, kemej tres mil xiujmejya, se tekiuaj akin motokaytiaya Salomón kijkuiloj: “Nikitak ke chokaj akin tajyouiaj, uan amo akin kinyolseuia. Taixyekananij kintajyouiltiaj” (Eclesiastés 4:1).

Axkan, no ijkon mochiua. Itech se nechikol tein moixmati kemej Naciones Unidas, moijtoj itech xiuit 2009 ke okachi miakej kinemiliaj ke onkak miak kuejmolmej porin tekiuanij amo kuali taixyekanaj.

¡MONEKI MOCHIUAS TEISA!

Moneki tikpiaskej akin kuali techixyekanaskej. Akin techchijchiuak yejua nejon kijtoj ke kichiuas.

Taixkopimej kampa nesi ke keman taltikpaknenkej taixyekana mochiua tein amo kuali: 1) se siuat akin nemi Asia kinapaloua ikonetsin uan tokotsyetok ojtenoj kampa amo tachipaujyan; 2) se takat akin xiuejya uetstok tapajtiloyan; 3) seki soldados tatojtoponiaj; 4) miakej tajtouaj chikauak porin kualantokej uan maktokej uejueyi amamej; 5) se siuat uan isiuapil kiitaj ke kalakkej ininchan keman amo yetoyaj; 6) itech uejueyi kalmej kisa pokti uan onkak miak cables itech se ueyi xolal — Maski seki taixyekananij kitemouanij kiyektaliskej kuejmolmej tein tikpiaj, amo uelinij kichiuaj

Dios kiixtalijya se taixyekanalis, oso se Tekiuajyot, tein kinixpatas nochin akin taixyekanaj nikan taltikpak, “uan sayoj yejua yetos nochipaya” (Daniel 2:44). Yejua nejon Tekiuajyot tein miakej tajtaninij itech padrenuestro (Mateo 6:9, 10, TNM). Sayoj ke, Dios amo kiixyekanas nejon Tekiuajyot. Yejuatsin kiixtalij maj taixyekana se akin nemik nikan taltikpak. ¿Akoni?