¿Tikonijtoua tikonchiuas satepan?
¿Toni ika titajtouaj? Tikonijkuilos tein motajtani itech tarjeta Directriz anticipada y carta poder para antención médica (DACP) tein tikpiaj tiitaixpantijkauan Jiova tein timoauijkejya. Kemej “amo [tik]matij toni mochiuas mosta”, semi kuali xikonijto axkanya toni taman tapajtilis uan pajti tikonseliskia komo moneki ijsiujka tionyas iuan tapajtijkej, uan tikonijkuilos tein tikonixpejpenak tikonselis (Sant. 4:14; Hech. 15:28, 29). Mochijchiuak se video tein techpaleuis maj titaixpejpenakan, motokaytia Asistencia médica sin transfusiones. Necesidades y derechos del paciente. Achto xikonita uan satepan ke tikonchiuas netataujtil, xikonijto ika ome eyi tajtolmej tein tikonajsikamatik ika inepaleuil netajtanilmej tein nikan moajsij. (Kemej nejin video kansaika moita keniuj kitekij se kokoxkej, tetatmej moneki kiixejekoskej ox kiitaskej imiuan konemej oso amo.)
1) ¿Keyej sekin uejueyi tekitinij itech tapajtiloyan oksepa kiixejekojtokej ox kisentokaskej kikuiskej esti itech tapajtilis? 2) Xikonijto eyi neskayomej tein kinextia ke uelij kintekij kokoyanij maski ouij uan amo moneki kikuiskej esti. 3) ¿Kanachi tapajtianij uan akin tetekij, kijtouaj ke kemaj kinpajtiskej kokoyanij maski amo kitekitiltiskej esti? ¿Keyej motemakaj kichiuaskej nejon? 4) Itech tataman tapajtiloyan yankuixtok kichiujkej seki estudios ika esti tein motekitiltia itech tapajtilis, ¿toni kinextij nejon? 5) ¿Toni uelis panos tein tamouilil ijkuak kokoxkej kipanoltiliaj esti itech inakayo? 6) Kemej kijtouaj axkan miakej tapajtianij uan akin tetekij, ¿toni tein kuali kiualkui ijkuak motekitiltia tapajtilis uan pajti tein mokui kemej iixpatka esti? 7) ¿Toni kichiua maj aksa esyojtami? ¿Hasta kani uelis kixikos taltikpaknenkej nejon? ¿Toni uelis kitaliliskej tein kipaleuis maj mochikaua iesyo? 8) ¿Keniuj uelis kichiuaskej maj miakia eritrocitos (glóbulos rojos) itech inakayo kokoxkej? 9) ¿Keniuj kichiuaj oso toni kikuij tein tapaleuia maj amo semi poliui esti keman kitekij se kokoxkej? 10) ¿Uelis kitekitiltiskej se taman tapajtilis oso pajti tein mokui kemej iixpatka esti iuan se kokoxkej tein konet oso iuan se tein motelkokoua? 11) ¿Toni tanauatil tein motelneki kinmakatokej tapajtianij, tein tapaleuia maj kuali kinpajtikan akin mokokouaj? 12) Tein tikchiuaj kemej Cristo, ¿keyej motelneki maj axkanya tikixpejpenakan toni taman tapajtilis oso pajti tikseliskej tein amo kipia esti? ¿Keniuj uelis tiktematiltiskej tein tikixpejpenaj?
Tosejselti tikijtoskej ox tikseliskej oso amo seki taman tapajtilis tein moita itech video, uan sejse moneki kiixpejpenas ijkon kemej kiiluis itanemilil tein kimachtijtok ika Biblia. ¿Tikonixpejpenakya toni taman tapajtilis uan pajti nankiseliskej tejuatsin uan mokoneuan, uan tikonijkuilojya itech DACP? Timitsonyoleuaj xikonita ika nejmachkayot amaix “Inetasojtalis Dios” itech capítulo 7, uan referencias tein ompa kiualkui, ta ompa okachi techmelauilia nejon. No xikonita tamachtilis “¿Qué opino de las fracciones sanguíneas y de los procedimientos médicos que impliquen el uso de mi sangre?”, itech suplemento tein kiualkui Nuestro Ministerio del Reino noviembre de 2006. Uan ompa, xikonpanolti itech amat DACP tein tikonixpejpenak. Akin mitsonpaleuiskej uan oksekin mochankauan tein amo itaixpantijkauan Jiova, moneki tikonmatiltis tein tikonixpejpenak.
[Tajtolmej itech página 3]
• ¿Tikonixpejpenakya toni taman tapajtilis uan pajti nankiseliskej tejuatsin uan mokoneuan?
• Kemej amo tikmatij toni uelis techpanos, ¿nochipa tikonuika tarjeta DACP kampa tikontematiltia tein tikonselis?