Eyi tonal keman tikseliskej yolchikaualis
1. ¿Toni uelis tikseliskej nejin xiuit itech ueyi nechikol tein uejkaua eyi tonal?
1 Jiova kisentoka kinmaka yolchikaualis itekitikauan itech taltikpak kampa taixyekana Satanás (Isa. 58:11). ¿Keniuj kichiua? Se taman, ika ueyi nechikol tein uejkaua eyi tonal tein mochiua xijxiujtika. Ijkon kemej ajsitiyas nejon ueyi nechikol nejin xiuit, ¿toni uelis tikchiuaskej uan ijkon uelis tikseliskej uan tiktemakaskej nepaleuil? (Pro. 21:5.)
2. ¿Toni moneki tikchiuaskejya?
2 Komo ayamo tikonchiua, axkanya moneki tikonxelos nejon tonalmej uan ijkon uelis tionyetos eyi tonal itech ueyi nechikol. No moneki tikonitas kani mochiuati uan tikonixejekos toni hora monekis tionkisas uan ijkon tikonajsis kani tionmoseuis achto ke peuas tanojnotsmej. Yekmelauj amo tiknekij tikpoloskej nion tepitsin nejon takual tein Jiova techmakas porin semi techpaleuis (Isa. 65:13, 14). No moneki tikitaskejya kani timokauaskej oso keniuj tiyaskej.
3. ¿Keniuj uelis tejuan uan tochankauan senkis tikseliskej nepaleuil tein motemakas itech ueyi nechikol?
3 ¿Toni techpaleuis maj kuali tikakikan tein ompa moijtos? Komo ueli, maj kuali timoseuikan nejon tonalmej. Maj tikixitakan akin kitemakatos tanojnots. Maj tiktemokan textos itech toBiblia. Maj tikijkuilokan ome eyi tanemililmej. Semi kuali maj kalyetouanij mosentalikan uan ijkon tetatmej uelis kinpaleuiskej konemej maj takakikan (Pro. 29:15). Uan kemej kalyetouanij, xa uelis ika nantajtoskej tiotak tein nankiuelitakej nejon tonal. Uan no uelis nankisentokaskej nankiseliskej nepaleuil satepan ke panos ueyi nechikol komo nankixelouaj tepitsin tiempo keman nantaueyichiuaj kemej kalyetouanij, uan ika nantajtouaj ome eyi taman tein nankiitaj ke namechpaleuis.
4. ¿Keniuj uelis tikinpaleuiskej oksekin tein moajsij itech tonechikol maj kiselikan yolchikaualis nejon tonalmej?
4 Keniuj tikinpaleuiskej oksekin. No tiknekij maj oksekin kiselikan yolchikaualis. ¿Moajsij itech tonechikol tanojnotsanij tein xiuejkejya oso oksekin tein moneki maj tikinpaleuikan maj yetokan nejon tonalmej? ¿Uelis tikinpaleuiskej? (1 Juan 3:17, 18.) Tayekananij, uan okachiok akin kiixyekanaj grupos, moneki kiitaskej maj nejon tanojnotsanij kiselikan nepaleuil tein monekis.
5. ¿Keniuj tikmoyauaskej tayoleualis? (Xikonita recuadro.)
5 Kemej ipa tikchiuanij, eyi semana achto ke tikpiaskej ueyi nechikol peuas tikinyoleuaskej oksekin maj no yetokan ompa. Nechikolmej moneki kiixtaliskej maj motamimoyaua tayoleualis itech nochi xolalmej tein uelis. Sayoj ke komo mokauakok amat tein tejuatsin uan mochankauan namechmakakej xikxelokan, moneki nankiuikaskej itech ueyi nechikol. Ta nejon no uelis nankikauiliskej akin nankitapouiskej iTajtol Dios keman nanyetoskej itech xolal kampa mochiuas ueyi nechikol. Viernes moijtos keniuj tikchiuaskej. Tein nankiixejekoskej ke amo uelisok nankimoyauaskej, uelis nankimakaskej semej tayektalianij keman nankalakiskej kampa mochiuas ueyi nechikol. Ximokauilikan se tayoleualis, porin ika motajtos itech tanojnots tein ika tamis domingo.
6. ¿Keniuj moneki timonejnemiltiskej itech ueyi nechikol?
6 Semi techyolchikaua maj timonejnemiltikan kemej moneki. Itech nejin tonalmej keman taltikpakneminij ‘motasojtatinemij yejuan san’ uan amo kiitaj tein kimachiliaj oksekin, semi techyolchikaua maj timoajsikan imiuan tokniuan akin mochikauaj monejnemiltiskej kemej moneki (2 Tim. 3:2). ¿Keniuj uelis tiknextiskej nejon? Se taman, komo tikalakij yolik keman tatapouaj chikueyi hora kualkan, tikinxelouiliaj kampa motaliskej sayoj akin nemij kalijtik, akin touan youij itech tepos oso akin tikmachtijtokej ika Biblia. Okse taman, komo niman timotaliaj ijkon kemej techiluis tokniuj akin techtapeualtilis uan tikakij tatsotson tein ika peuas ueyi nechikol. No moneki tikchiuaskej maj tocelular uan okseki teposmej amo kinpojpolo oksekin keman motemakatos tanojnotsmej. Uan no, komo amo moneki, maj amo titajtokan, maj amo tiktitanikan mensajes, maj amo titakuakan niono maj tinentinemikan keman mochiujtos ueyi nechikol.
7. ¿Keniuj uelis tikseliskej uan tiktemakaskej yolchikaualis keman timosentiliskej imiuan tokniuan?
7 Semi techyolchikaua maj timonojnotsakan imiuan oksekin. Ueyi nechikol techpaleuia maj tiuelikan timosentilikan imiuan tokniuan tein touan taueyichiuaj. Nejon semi techyolchikaua (Sal. 133:1-3). ¿Keyej amo tiktemouaj tejuan tikintajpaloskej tokniuan tein ualeuaj itech okseki nechikolmej? (2 Cor. 6:13.) Uelis tikixtaliskej tikixmatiskej maski sayoj se taltikpaknenkej oso se kalyetouanij itech se tonal. Itech tajko tonal keman timoseuiaj uelis tikchiuaskej nejon. Yejika maj amo tikouatij tein tikmajseuaskej niono maj titakuatij ompakauin kampa tanamakaj, ta maj tikuikakan tepitsin takual, maj ompa tikmajseuakan uan maj titajtokan imiuan oksekin. Nejon uelis techpaleuis maj nochipaya timouikakan imiuan tokniuan tein yekin tikinixmatkej.
8. ¿Keyej moneki titapaleuiskej itech tekit tein onkak itech ueyi nechikol uan keniuj uelis tikchiuaskej?
8 Semi techyolchikaua titapaleuiskej itech tekit tein no ika tikueyichiuaj Dios imiuan oksekin tokniuan. ¿Uelis titekitiskej itech se departamento oso titapaleuiskej itech tachipaualis tein kimakaskej tonechikol? (Sal. 110:3.) Komo ayamo tikpiaj se tekit, uelis tiyaskej Kampa Moijkuilouaj Tapaleuianij. Komo tinochin titapaleuiaj, ijsiujka mochiua tekit uan tikchiuaj ika yolpakilis.
9. ¿Keyej moneki tikitaskej keniuj timonejnemiltiaj uan keniuj timotakentiaj keman tiyouij itech ueyi nechikol?
9 Totachiualis kinyolpaktia akin techitaj. Itech nochi eyi tonal timoteixmatiltiaj ke tiyetokej itech ueyi nechikol uan amo sayoj keman motemakatok tanojnotsmej. Akin techitaj keman tiyetokej itech xolal kampa mochiua ueyi nechikol, moneki kiitaskej ke amo ijkon timonejnemiltiaj kemej tein amo momachtiaj (1 Ped. 2:12). Totaken uan toneketsalis tein tikuikaskej itech xolal kampa mochiua ueyi nechikol, kampa timokauaskej uan kampa titakuaskej, moneki kiueyitalis Jiova (1 Tim. 2:9, 10). Komo timotaliliaj tarjeta tein ompa tikuij, akin techitaj kimatiskej ke tiitaixpantijkauan Jiova, uan uelis techpaleuis maj tiuelikan tikinnojnotsakan ika ueyi nechikol uan maj tikinmatiltikan iTajtol Dios.
10. ¿Keniuj uelis tikchiuaskej maj kuali ika tajtokan ueyi nechikol tein tekitij itech hotel oso restaurante?
10 ¿Keniuj totachiualis uelis kinpaleuis akin tekitij itech hotel oso restaurante? Maj amo tikxelokan cuartos tein amo tikuiskej, porin tikchiuaskiaj maj amo ijsiujka kiajsikan cuartos oksekin tein no yetoskej itech ueyi nechikol, uan itech hotel uelis amo kiajsiskej akonimej kikuiskej cuartos tein tikxelojkaj. Komo tel miakej yetokej itech hotel keman tiajsij oso tikisaj, moneki maj amo tiyolijsiuikan uan maj tikuikan yemanik tajtolmej (Col. 4:6). No moneki maj tikinkauilikan propina akin tekitij itech restaurante uan itech hotel akin tasakaj uan akin tachipauaj itech cuarto oso kichiuaj okseki taman.
11. ¿Toni kinextia ke tokuali tachiualis tapaleuia maj kuali tajtokan?
11 ¿Keniuj kiitaj oksekin tokuali tachiualis keman tiyetokej itech toueyi nechikol? Itech se periódico kijkuilojkej tein kijtoj se takat akin taixyekana kampa mochiuak se ueyi nechikol: “Nochin kuali monejnemiltiaj. Tikteluelitaj maj nikan yetokan xijxiujtika”. Xiuit tein tiualpanokej, se akin amo itaixpantijkauj Jiova kipoloj itomineualoni itech hotel kampa mokaujkaj tein yajkaj ueyi nechikol. Keman kiuikilijkej akin taixyekana itech hotel tomineualoni ika nochi tein kipiaya, taixyekankej kiiluij akin iaxka: “Semi kuali maj itaixpantijkauan Jiova kipianij nikauin imin ueyi nechikol, uan maj yejuan mokauanij itech nejin hotel. Komo amo, xa amo tikonajsiskiaok tomineualoni”.
12. Ijkon kemej motokijtiyas ueyi nechikol, ¿toni moneki tikixtaliskej tikchiuaskej uan keyej?
12 Ueyi nechikol tein mochiuas nejin xiuit ijsiujka motokijtok. Ueyi chikaujkayot uan miak tiempo mokuitok porin mochiujtok maj semi teyolchikaua tanojnotsmej uan ueyi nechikol. Yejika maj tikixtalikan tiyetoskej nochi eyi tonal uan ijkon uelis tikseliskej tein Jiova uan inechikol techpialiaj. Uan maj kuali timonejnemiltikan, maj timonojnotsakan imiuan oksekin uan maj tikpiakan kuali totachiualis, porin ijkon uelis tikinyolchikauaskej oksekin. Komo ijkon tikchiuaj, tejuan uan oksekin no timomachiliskej kemej se siuat tein yajka ueyi nechikol itech xiuit tein tiualpanokej akin kijkuiloj: “Amo keman nikpanotoya nejon”.
[Tajtolmej itech página 4]
Kemej ipa tikchiuanij, eyi semana achto ke tikpiaskej ueyi nechikol peuas tikinyoleuaskej oksekin maj no yetokan ompa
[Tajtolmej itech página 6]
Totaken uan toneketsalis tein tikuikaskej itech xolal kampa mochiua ueyi nechikol, kampa timokauaskej uan kampa titakuaskej, moneki kiueyitalis Jiova
[Tajtolmej itech página 7]
Maj kuali timonejnemiltikan, maj timonojnotsakan imiuan oksekin uan maj tikpiakan kuali totachiualis, porin ijkon uelis tikinpaleuiskej oksekin
[Tajtolmej itech página 4]
Tein techelnamiktiaj keman tiyaskej ueyi nechikol tein uejkaua eyi tonal xiuit 2011
◼ Hora keman peuas uan tamis. Nochi eyi tonal ueyi nechikol peuas 9:20 kualkan. Tataposkej a las 8:00. Keman moijtos maj tikakikan tatsotson tein kinextia ke peuatiya ueyi nechikol, tinochin moneki timotaliskej, ijkon nechikol peuas ika poujkaitalis. Viernes uan sábado tatamis 4:55 tiotak uan domingo 3:40.
◼ Kampa tiketsaj teposmej. Komo techtakauiliaj, amo techtaxtaualtiskej kampa tiketsaskej totepos, uan tiktekpantiyaskej ijkon kemej tiajsitiyaskej. Kampa kinxelouiliaj akin amo ueli nejnemij, sayoj kikauaskej akin itepos kipias letrero oso placa tein tekiuanij kimakaj. Kemej amo nochipa taueyika kampa tiketsaskej teposmej, yejika, komo ueli maj tiyakan itech itepos okse tokniuj, ijkon amo semi miakiaskej.
◼ Ikpalmej. Uelis tikinxelouiliskej sayoj tochankauan, akin touan youij itech tepos, oso akin tikinmachtijtokej ika Biblia (1 Cor. 13:5).
◼ Takualis. Maj tikuikakan totakual, ijkon amo monekis tikouatiuij tajkotonal. Tein ika tikuikaskej totakual moneki maj amo ueyi, ta se tein akis tatampa kampa timoseuiaj. Uan maj amo tikuikakan tapalkamej tachijchiuj ika teskat.
◼ Totapaleuil ika tomin. Uelis tiknextiskej ke tiktasojkamatij ueyi nechikol, komo ika totomin tikpaleuiaj itekiyo Dios tein mochiua itech nochi taltikpak. Nejin uelis tiktemakaskej keman tiyetoskej itech ueyi nechikol. Tapaleuil ika cheque moneki motalis itokaykopa “La Torre del Vígia, A.R.”.
◼ Accidentes uan ijsiujkayot tein mochiua. Komo mochiua teisa itech ueyi nechikol tein moneki kiitas ijsiujka se tapajtijkej, maj tikiluikan se tayektalijkej tein amo uejka yetos uan yejua niman kitematiltis Kampa kiitaj se Ijsiujkayot. Ijkon yejuan kiitaskej ox yekmelauj moneki mochiuas ijsiujka uan kiitaskej nejon ouijkayot.
◼ Pajti. Komo timopajtijtokej, moneki tikuikaskej pajti tein techajsis nejon tonalmej, porin itech ueyi nechikol amo kipiaskej.
◼ Tekakmej. Nochi xiujmej miakej moxokoliaj porin imin tekak amo kuali kiixpejpenaj. Okachi kuali maj tikuikakan tein kinamikis nejon tonalmej, tein amo techtsakuilis uan tein amo ika tiuetsiskej keman tipanoskej itech escalera uan kampa yeski.
◼ Akin amo uelij yektakakij. Itech seki ueyi nechikolmej, tanojnotsmej kipanoltiskej itech frecuencia modulada (FM) ompa taijtik. Sayoj monekis tikuikaskej se radio tsikitsin tein tekiti ika baterías uan seki audífonos.
◼ Coches uan sillas tein ika kinuikaj konemej. Itech ueyi nechikol maj amo tikuikakan coches uan sillas tein ika se kinuika konemej. Uelis se kiuikas konet ika se silla, sayoj komo aki itech ikpal tein yetos imin nakastan tetatmej.
◼ Perfumes. Itech miak kalmej kampa mochiua ueyi nechikolmej, nochi tatsaktok uan moneki taejekauiltiskej ika teposmej. Yejika moneki titeajsikamatiskej uan amo tiktelkuiskej perfumes uan okseki taman tein tel chikauak ajuiyak, ta nejon uelis kinijtakos oksekin (1 Cor. 10:24).
◼ Amat tein itokay Sírvase visitar (S-43-S). Moneki tikuikaskej se oso ome amat Sírvase visitar kampa uelis tikijkuiloskej itokay akin tiknojnotsaskej uan kinekis kimatis okachi. Uelis tiktemakaskej amat Kampa Kitemakaj Amaixmej, oso tikmakaskej tajkuilojkej itech tonechikol keman timokepaskej (xikonita Nuestro Ministerio del Reino noviembre de 2009, página 4).
◼ Restaurantes. Keman kuali timonejnemiltiaj itech restaurantes kiueyitalia itokay Jiova. Komo itech toaltepeuj moneki se kikauas propina, maj ijkon tikchiuakan.
◼ Hoteles.
1) Maj tikxelokan kampa timokauaskej sayoj tein yekmelauj tikuiskej, uan tein timokauaskej itech se cuarto moneki eski sayoj tein ixyetok.
2) Maj amo tikijtokan ke amo tikuiskejok. Kemaj uelis tikchiuaskej sayoj komo yekmelauj mochiuak se ijsiujkayot, uan moneki niman titanauatiskej itech hotel (Mat. 5:37).
3) Maj tikuikan carrito tein ika se kiuika teisa, sayoj keman niman tiktekitiltiskej uan maj niman tikepakan, ijkon uelis kikuiskej oksekin.
4) Kampa timokauaj, maj titakualchiuakan sayoj komo techiluiaj ke uelis.
5) Maj tikinkauilikan propina tekitinij itech hotel keman techtasakiskej, uan maj mojmostaj tikinkauilikan propina akin tachipauaj.
6) Maj tikuikan almasal, café uan hielo sayoj tein ixyetok kinmakaskej sejse tein mokauaj ompa.
7) Maj nochipa tiknextikan itakilo espíritu keman imiuan titajtoskej akin tekitij itech hotel. Maj tikelnamikikan ke yejuan kinitaj miakej tein ompa mokauaj, uan yejika kitasojkamatij maj tikinajsikamatikan, maj tikuikan yemanik tajtolmej uan maj amo tiyolijsiuikan.
8) Ipatiuj cuarto tein ixnesi itech Lista de hoteles recomendados, kijtosneki sayoj se tonal, uan amo iuantia impuestos. Komo techtaxtaualtiaj okachi patiyoj, oso techmakaj se factura kampa ixnesi ke titauikaj ika tein amo titajtankej oso amo tikuikej, maj amo tikselikan uan maj niman titanauatikan Kampa kiitaj kani se Mokauas ompa itech ueyi nechikol.
9) Komo tikpiaj se kuejmol ika tocuarto kampa timokauaj, maj niman titanauatikan Kampa kiitaj kani se Mokauas keman tiyetoskej itech ueyi nechikol.
10) No moneki tikmatiskej ke komo itech hotel titaxtauatij ika tarjeta de crédito oso débito, yejuan kitsakuiltiaj tepitsin tomin tein tikpiaj itech tocuenta porin ika nejon motamiixtaua ipatiuj cuarto, uan no komo teisa tikuejuelojkej keman ompa tiyetoyaj. Amo uelis tikuiskej nejon tomin hasta seki tonalmej satepan ke tikisaskej keman kiitaskejya kanachi moneki titaxtauaskej.
◼ Tapaleuianij. Okachi tiyolpakiskej keman tiyaskej itech ueyi nechikol, komo titapaleuiaj itech tekit tein ompa onkak (Hech. 20:35). Nochin akin kinekiskej tapaleuiskej uelis yaskej Kampa Moijkuilouaj Tapaleuianij. Tein ayamo kiajxitiaj 16 xiujmej, no uelis tekitiskej komo moajsi semej itatuan oso aksa akin yejuan takuaujtamatij ke uelis kiitas.
[Tajtolmej itech página 5]
¿Keniuj tiktemakaskej tayoleualis?
Kemej tiknekij tikmoyauaskej tayoleualis itech nochi xolalmej kampa titanojnotsaj, moneki maj amo tiuejkauakan. Uelis tikijtoskej satepan ke titetajpaloskej: “Tikchiujtokej maj noyampa taltikpak momoyaua nejin tayoleualis. Nimitsonkauilia se. Nikan kijtoua seki taman tein moneki tikonmatis”. Iixko amat chijchiujtok maj se kineki se kiitas toni kipia, yejika maj tikmaktilikan taltikpaknenkej kemej uelis kiitas. Maj moita toyolpakilis. Keman tikxelojtoskej tayoleualis itamiampa semana, no uelis tiktemakaskej revistas komo tikitaj ke ueli.