Uejueyi nechikolmej tein uejkauaj eyi tonal kiueyinextiaj tamachtilis tein melauak
1. ¿Itech toni tamachtilis tein melauak ueliaj tanemiliayaj israelitas keman iluitiaj?
1 Israelitas ne uejkauj mosentiliayaj expa xiuit uan ijkon iluichiuaskiaj. Uan maski sayoj takamej monekia yaskej, miakpa nochin kalyetouanij yayaj Jerusalén iluititij ika pakilis (Deu. 16:15, 16). Ijkuak ueliaj tanemiliayaj itech seki tamachtilis tein melauak tein semi motelneki. ¿Kemej katiyejuan? Se, ke Jiova se Dios tetasojtakej uan kinmaka itekitikauan nochi tein kinpoloua (Deu. 15:4, 5). Okse, ke sayoj iuan yejuatsin ueli se takuaujtamati porin teixyekana uan tematampauia (Deu. 32:9, 10). Uan kemej Israel katka se xolal tein Dios kiixpejpenak, ueliaj tanemiliayaj ke monekia kinextiskej imelaujkayo itech ininnemilis (Deu. 7:6, 11). Axkan itech uejueyi nechikolmej tein uejkauaj eyi tonal no ijkon techpaleuiaj.
2. ¿Keniuj techpaleuis tein moijtos itech ueyi nechikol maj tikajsikamatikan tamachtilis tein melauak?
2 Tamachtilis tein motemaka techpaleuia maj tikajsikamatikan tein melauak. Itech uejueyi nechikolmej tein uejkauaj eyi tonal motemaka tanojnotsmej, dramas, ixneskayomej uan kinchiuiliaj netajtanilmej tokniuan sentaixpan. Nochi nejin techpaleuia maj okachi tikajsikamatikan tein tamachtia Biblia (Juan 17:17). Axkan mochiujtok miak tekit, ta itech inechikol Jiova moixtalijtokya tamachtilismej tein kinpaleuis nochin taltikpakneminij semanauak taltikpak (Mat. 24:45-47). ¿Melauj ke tel kuali nochi tein ijkuak tionmomachtis?
3. ¿Toni techpaleuis maj kuali tikselikan tamachtilis tein motemakas?
3 Okachi kuali techpaleuis tamachtilis sayoj komo tiyouij nochi eyi tonal uan kuali titakakij. Xikonelnamiki tiontajtos iuan moteko maj mitsonkaua amo xiontekiti nejon tonalmej. Moneki kuali tionmoseuis sejse youal achto, ta ijkon kuali tiontakakis nochi tonal. Miakej kiitaj ke tel tapaleuia komo kiitstokej akin kitemakatok tanojnots uan kijkuilouaj sayoj tanemilil tein moneki. Amo xikonkaua maj teléfono oso okseki teposmej mitsontapololti oso kintapololti oksekin. Keman mochiujtos ueyi nechikol amo xiontajtojto, xiontajkuilojto ika teléfono nion xiontakuajto oso xiontatayito.
4. ¿Keniuj tetatmej uelis kinpaleuiskej ininkoneuan maj kuali kiselikan tamachtilis itech ueyi nechikol?
4 Chijchikometika xiuit, israelitas mosentiliayaj uan ijkon kikakiskiaj keman kiixtajtoltiayaj Tanauatil keman iluichiuayaj itech sakakaltsitsin. Nochi kalyetouanij, iniuan “konetsitsin”, mosentiliayaj uan ijkon takakiaj uan momachtiayaj (Deu. 31:12). Axkan temaka miak pakilis se kinitas kalyetouanij sentokotsyetokej keman mochiujtok ueyi nechikol uan konemej ijsatokej uan kuali takaktokej. Sejse youak uelis nankiitaskej tein nankijkuilojkej uan nankijtoskej seki taman tein nankiuelitakej. Kemej konemej amo kinextiaj tamatilis, tetatmej moneki maj amo kinkauakan maj kichiuakan tein kinekiskej. Monekis maj nochipa kinitakan, no akin okachi telpochmej, itech nepantajyot uan keman yetoskej kampa youalpanoskej (Pro. 22:15; 29:15).
5. ¿Keniuj tokuali tachiualis kikualtsintilia tamachtilis tein melauak?
5 Kuali tachiualis kikualtsintilia tamachtilis tein melauak. Tokuali tachiualis keman timoajsij itech xolal kampa mochiua ueyi nechikol kikualtsintilia tamachtilis tein melauak (Tito 2:10). Akin tekitij itech hotel kiuelitaj kinseliskej akin tatakamatij, amo yolijsiuij uan motasojkamatij (Col. 4:6). Itech xiuit tein tiualpanokej, keman seki tokniuan tein sucursal kinixtalij motenkauayaj iniuan taixyekananij itech se hotel semej kijtoj: “Techyolpaktia maj itaixpantijkauan Jiova nikan mokauakan porin semi tapoujkaitaj uan kualtakamej. Uan no, nochipa kinpoujkaitaj totekitikauan uan kiyekpiaj nejin kali”.
6. Kemej timotakentiskej itech xolal kampa mochiuas ueyi nechikol, ¿keniuj uelis kikualtsintilis tamachtilis tein melauak?
6 Keman timotaliliaj totarjeta tein ika timoteixmatiltiaj, amo sayoj ika tiktenextiliaj ke mochiujtok ueyi nechikol uan maj okseki tokniuan kimatikan tiakonimej, ta no maj kuali ika motajto. Taltikpakneminij tein nemij kampa mochiuas ueyi nechikol kiitaskej ke akin motaliliaj tarjeta kuali motakentiaj uan moyekchijchiuaj, amo kemej okseki taltikpakneminij tein semi amo kuali motakentiaj (1 Tim. 2:9, 10). Yejua ika, moneki tikitaskej maj kuali timotakentikan uan maj tichipaujkej keman tiajsiskej kampa mochiua ueyi nechikol uan no itech hotel. Komo tiajsij ika taken tein se kikui keman se moixpetania amo kuali moitaskia. Uan maski ueyi nechikol mochiuas kampa amo nochi tatsaktok, moneki kuali titakentiyaskej. Komo tiknekij timotapatiliskej satepan ijkuak tatamis uan tiknekij tiyaskej kampa takualnamakaj, moneki tikelnamikiskej ke tiyetokejok itech ueyi nechikol uan amo taman timotakentiskej.
7. ¿Katiyejua se taman tein tapaleuis maj kuali timouikakan iniuan tokniuan itech ueyi nechikol?
7 Itech iluit tein kichiuayaj, israelitas ueliaj iniuan mosentiliayaj oksekin akin kayomej okse xolal oso okse altepet, uan nejin tapaleuiaya maj kuali mouikakan (Hech. 2:1, 5). Itech uejueyi nechikolmej tein uejkauaj eyi tonal no motelita ke kualtsin timouikaj iniuan nochi tokniuan. Miakej kimoujkaitaj kuali nemilis tein kipiaj itekitikauan Dios (Sal. 133:1). Okachi kuali maj amo tikisakan tikouatij takual, ta maj tikuikakan sayoj tein tikuaskej, nejon tapaleuis maj tikinixmatikan uan maj tikintajpalokan okseki tokniuan tein ompa yetoskej.
8. Komo tiuelij, ¿keyej moneki titapaleuiskej itech ueyi nechikol?
8 Taltikpakneminij kimoujkaitaj keman tokniuan kualtsin sentekitij itech uejueyi nechikolmej, uan okachiok keman kimatij ke akin tapaleuiaj amo kintaxtauiaj. ¿Uelis tionmotemakas ika miak pakilis tiontapaleuis itech ueyi nechikol? (Sal. 110:3.) Miakej tetatmej motemakaj tapaleuiskej iniuan ininkoneuan, ijkon kinmachtiaj maj kinpaleuikan oksekin. Komo tejuatsin tionpinaua tiontajtos, uelis tiontapaleuis itech se tekit uan ijkon tikonixmatis oksekin. Se tokniuj siuat kijtoj: “Sayoj nikinixmatia nochankauan uan seki notasojikniuan, uan amo akinok nikixmatia. Sayoj ke keman nimotemakak nitapaleuis itech tachipaualis, nikinixmatik miak tokniuan takamej uan siuamej. ¡Nikteluelitak!”. Keman tikinpiaj oksekin totasojikniuan porin titapaleuiaj itech ueyi nechikol techualkuilia miak yolpakilis (2 Cor. 6:12, 13). Komo ayamo keman tiontapaleuiani, xikontajtani tayekananij toni moneki tikonchiuas.
9. ¿Keniuj tikinyoleuaskej oksekin maj yakan ueyi nechikol?
9 Maj tikinyoleuakan oksekin maj kikakikan tamachtilis tein melauak. Kemej itech xiujmej tein tiualpanouanij, eyi semana achtopa ijkuak tikpiaskej ueyi nechikol, tikinyoleuaskej taltikpakneminij maj no yakan. Nochin tokniuan itech nechikolmej mochikauaskej kimoyauaskej tayoleualis itech nochi xolalmej kampa tanojnotsaj (xikonita recuadro “¿Keniuj tiktemakaskej tayoleualis?”). Tayoleualismej tein amo tiktamimoyauaskej moneki tikuikaskej itech ueyi nechikol, uan ijkon uelis kikuiskej okseki tokniuan keman tanojnotsaskej itech xolal kampa mochiuas ueyi nechikol.
10. Xikonijto seki neskayomej tein kinextiaj ke tayoleualis tein tiktemakaj xijxiujtika kuali tapaleuia.
10 ¿Kuali tanankilianij taltikpakneminij keman tikinyoleuaj? Itech se ueyi nechikol, se tayektalijkej kintemolij kani motaliskej se takat uan se siuat akin namikuanij. Yejuan kiiluijkej ke kiselijkaj se tayoleualis uan kinekkej kimatiskej toni mochiuaya. Yejuan tanejnemiltijkej ika tepos panoua 300 kilómetros. Okse neskayot, se tokniuj siuat akin yaya kajkalpan kimakak se tayoleualis se takat tein moitaya ke kinekia kimatis okachi. Yejua ika tokniuj peuak kiiluia toni kijtouaya tayoleualis. Seki tonalmej satepan, keman mochiujtoya ueyi nechikol, tokniuj kiitak nejon takat iuan se itasojikniuj, maktiyayaj semej yankuik amaixmej.
11. ¿Keyej motelneki maj tiyakan xijxiujtika ueyi nechikol tein uejkaua eyi tonal?
11 Jiova kinmakaka israelitas iluimej kemej se netetayokolil tein kinpaleuiaya maj kitekitilikan “ika chipaujkayot uan melaujkayot” (Jos. 24:14). No ijkon, ijkuak tiyouij ueyi nechikol tein uejkaua eyi tonal techpaleuia maj tiksentokakan “tinemikan itech melaujkayot”, uan yejua se taman tein ika tikueyichiuaj Jiova uan motelneki (3 Juan 3). Maj Jiova namechtatiochiui akin nankitasojtaj tamachtilis tein melauak, uan ika chikaujkayot nanyouij xijxiujtika uan kuali nankiseliaj tamachtilis tein ijkuak motemaka.
[Tanemilil itech página 4]
Tokuali tachiualis keman timoajsij itech xolal kampa mochiua ueyi nechikol kikualtsintilia tamachtilis tein melauak
[Tanemilil itech página 5]
Eyi semana achtopa ijkuak tikpiaskej ueyi nechikol tikinyoleuaskej taltikpakneminij maj no yakan
[Tanemilil itech página 3-6]
Tein Techelnamiktiaj Keman Tiyaskej Ueyi Nechikol Tein Uejkaua Eyi Tonal Xiuit 2012
◼ Hora keman peuas uan tamis. Nochi eyi tonal ueyi nechikol peuas 9:20 kualkan. Tataposkej 8:00. Keman moijtos maj tikakikan tatsotson tein kinextia ke peuatiya ueyi nechikol, tinochin moneki timotaliskej, ijkon nechikol peuas ika poujkaitalis uan kemej moneki. Viernes uan sábado tatamis 4:55 tiotak uan domingo 3:40.
◼ Kampa tiketsaj teposmej. Komo techtakauiliaj, amo techtaxtaualtiskej kampa tiketsaskej totepos, uan tiktekpantiyaskej ijkon kemej tiajsitiyaskej. Kampa kinxelouiliaj akin amo ueli nejnemij, sayoj kikauaskej akin itepos kipias letrero oso placa tein tekiuanij kimakaj. Kemej amo nochipa taueyika kampa tiketsaskej teposmej, yejua ika, komo ueli maj tiyakan itech itepos okse tokniuj, ijkon amo semi miakiaskej.
◼ Ikpalmej. Uelis tikinxelouiliskej sayoj tochankauan, akin touan youij itech tepos, oso akin tikinmachtijtokej ika Biblia (1 Cor. 13:5).
◼ Takualis. Maj tikuikakan totakual, ijkon amo monekis tikouatiuij tajkotonal. Tein ika tikuikaskej totakual moneki maj amo ueyi, ta se tein akis tatampa kampa timotaliskej. Uan maj amo tikuikakan tapalkamej tachijchiuj ika teskat.
◼ Totapaleuil ika tomin. Uelis tiknextiskej ke tiktasojkamatij ueyi nechikol komo ika totomin tikpaleuiaj itekiyo Dios tein mochiua itech nochi taltikpak. Nejin uelis tiktemakaskej keman tiyetoskej itech ueyi nechikol. Tapaleuil ika cheque moneki motalis itokaykopa “La Torre del Vigía, A.R.”.
◼ Accidente uan ijsiujkayot tein mochiua. Komo mochiua teisa itech ueyi nechikol tein moneki kiitas ijsiujka se tapajtijkej, maj tikiluikan se tayektalijkej tein amo uejka yetos uan yejua niman kitematiltis Kampa kiitaj se Ijsiujkayot. Ijkon yejuan kiitaskej ox yekmelauj moneki mochiuas ijsiujka uan kiitaskej nejon ouijkayot.
◼ Pajti. Komo timopajtijtokej, moneki tikuikaskej pajti tein techajsis nejon tonalmej, porin itech ueyi nechikol amo kipiaskej. Komo tikonpia diabetes uan moneki tikonkuis aguja uan jeringa, xikonelnamiki ke moneki amo tikontamotas kampa yeski, porin uelis aksa ika motsoponis. Amo xikontamota kampa motalia tajsol itech ueyi nechikol nion itech hotel.
◼ Tekakmej. Nochi xiujmej miakej moxokoliaj porin amo kuali kiixpejpenaj inintekak. Okachi kuali maj tikuikakan tein kinamikis nejon tonalmej, tein amo techtsakuilis uan tein amo ika tiuetsiskej keman tipanoskej itech escalera uan kampa yeski.
◼ Akin amo uelij yektakakij. Itech seki ueyi nechikolmej, tanojnotsmej kipanoltiskej itech frecuencia modulada (FM) ompa taijtik. Sayoj monekis tikuikaskej se radio tsikitsin tein tekiti ika baterías uan tein ika tikakiskej.
◼ Coches tein ika kinuikaj konemej uan ikpalmej. Itech ueyi nechikol maj amo tikuikakan coches tein ika se kinuika konemej uan ikpalmej. Uelis se kiuikilis konet se ikpal, sayoj komo aki ininnakastan tetatmej.
◼ Perfume. Itech miak kalmej kampa mochiua uejueyi nechikolmej, nochi tatsaktok uan moneki taejekauiltiskej ika teposmej. Yejua ika moneki titanemiliskej itech oksekin uan amo tiktelkuiskej perfume uan okseki taman tein tel chikauak ajuiyak, ta nejon uelis kinijtakos oksekin tein kipiajya se kokolis (1 Cor. 10:24).
◼ Amat tein itokay Sírvase visitar (S-43-S). Moneki tikuikaskej se oso ome amat Sírvase visitar kampa uelis tikijkuiloskej itokay akin tiknojnotsaskej uan kinekis kimatis okachi. Uelis tiktemakaskej amat Kampa Kitemakaj Amaixmej, oso tikmakaskej tajkuilojkej itech tonechikol keman timokepaskej (xikonita ITekiyo Dios tein Tikchiuaj mayo 2011, página 3).
◼ Kampa takualnamakaj. Keman kuali timonejnemiltiaj ijkuak tiyouij kampa takualnamakaj kiueyitalia itokay Jiova. Komo itech toaltepeuj moneki se kikauas tepitsinok tomin, maj ijkon tikchiuakan.
◼ Hotel.
1) Maj tikxelokan kampa timokauaskej sayoj tein yekmelauj tikuiskej, uan tein timokauaskej itech se cuarto moneki yeski sayoj tein ixyetok.
2) Maj amo tikijtokan ke amo tikuiskejok. Kemaj uelis tikchiuaskej sayoj komo yekmelauj mochiuak se ijsiujkayot, uan moneki niman titanauatiskej itech hotel (Mat. 5:37).
3) No moneki tikmatiskej ke komo itech hotel titaxtauatij ika tarjeta de crédito oso débito, yejuan kitsakuiltiaj tepitsin tomin tein tikpiaj ompa, porin ika nejon motamiixtaua ipatiuj kampa timokaujkej, uan no komo teisa tikuejuelojkej keman ompa tiyetoyaj. Amo uelis tikuiskej nejon tomin hasta seki tonalmej satepan ke tikisaskej, keman kiitaskejya kanachi moneki titaxtauaskej.
4) Maj tikuikan carrito tein ika se kiuika teisa, sayoj keman yekmelauj tiktekitiltiskej uan maj niman tikepakan, ijkon uelis kikuiskej oksekin.
5) Maj tikinkauilikan tepitsin tomin tekitinij itech hotel keman techtasakiskej, uan maj mojmostaj no tikinkauilikan tepitsin tomin akin tachipauaj.
6) Kampa timokauaj, maj titakualchiuakan sayoj komo techiluiaj ke uelis.
7) Maj tikuikan almasal, kafen uan okse taman sayoj tein ixyetok kinmakaskej sejse tein mokauaj ompa.
8) Maj nochipa tiknextikan itakilo espíritu keman iniuan titajtoskej akin tekitij itech hotel. Maj tikelnamikikan ke yejuan kinpaleuiaj miakej tein ompa mokauaj, uan yejua ika kitasojkamatij maj tikinajsikamatikan, maj tikualtakamej uan maj amo tiyolijsiuikan.
9) Moneki maj tetatmej nochipa kinyekpiakan ininkoneuan ijkuak yetoskej itech hotel, uan no keman moixpetanijtoskej ompa.
10) Ipatiuj kampa timokauaskej tein ixnesi itech Lista de hoteles recomendados, kijtosneki sayoj se tonal, uan amo kipia impuesto. Komo techtaxtaualtiaj okachi patiyoj, maj amo tikselikan uan maj niman titanauatikan Kampa kiitaj kani se Mokauas ompa itech ueyi nechikol.
11) Komo tikpiaj se kuejmol kampa timokauaj, maj niman titanauatikan Kampa kiitaj kani se Mokauas keman tiyetoskej itech ueyi nechikol.
◼ Tapaleuianij. Nochin akin kinekiskej tapaleuiskej uelis yaskej Kampa Moijkuilouaj Tapaleuianij. Akin ayamo kiajxitiaj 16 xiujmej, no uelis tekitiskej komo moajsi semej itatuan oso aksa akin yejuan takuaujtamatij ke uelis kiitas.
[Tanemilil itech página 6]
¿Keniuj tiktemakaskej tayoleualis?
Kemej tiknekij tikmoyauaskej tayoleualis itech nochi xolalmej kampa titanojnotsaj, xa monekis maj amo tiuejkauakan. Uelis tikijtoskej satepan ke titetajpaloskej: “Tikchiujtokej maj noyampa taltikpak momoyaua nejin tayoleualis. Nimitsonkauilia se. Nikan kijtoua seki taman tein moneki tikonmatis”. Maj moita toyolpakilis. Keman tikxelojtoskej tayoleualis itamiampa semana, no uelis tiktemakaskej revistas komo tikitaj ke ueli.