Keman kuali timonejnemiltiaj tikueyichiuaj Dios
1. ¿Keyej niman kimatij taltikpakneminij tiakonimej keman tiyouij itech uejueyi nechikolmej?
1 Taltikpakneminij niman kimatij tiakonimej keman tiyouij itech uejueyi nechikolmej. Itech miak altepemej, tanauatiaj ke ompa tiyetokej. Itech hoteles uan kampa kinamakaj takual ajsij miak itaixpantijkauan Jiova, uan itech ojmej moitaj miakej tokniuan ika se tarjeta tein ika timoteixmatiltiaj. Nikan tikajsiskej seki taman tein techpaleuis maj kuali timonejnemiltikan itech xolal kampa mochiuas toueyi nechikol uan ijkon tikueyichiuaskej Dios (1 Ped. 2:12).
2. ¿Keniuj uelis tikueyichiuaskej Jiova itech xolal kampa mochiua ueyi nechikol keman kuali timotakentiaj?
2 Maj kuali timotakentikan. Keman kuali nesi totaken keman tiyetokej itech ueyi nechikol, taltikpakneminij niman kimatij tiakonimej. Maski ijkon, sekin okachi kiitaskej keniuj timotilmajtiaj itech okseki hora, kemej keman tiajsij itech hotel, keman tikisaj titakuatij oso keman titakouatij. Maski nejon hora amo moneki timotilmajtiskej kemej keman tiyetokej itech nechikol, moneki timotaliliskej tein kisentokas kuali nesis uan kemej kinamikis. Akin techitaskej moneki kimatiskej ke tejuan tiitaixpantijkauan Jiova (Rom. 12:2). No ijkon, moneki tikuikaskej tarjeta tein ika timoteixmatiltiaj, ta ijkon titematiltiskej ke mochiujtok ueyi nechikol, uelis titanojnotsaskej uan no uelis techixmatiskej okseki tokniuan.
3. ¿Keniuj uelis tiknextiskej ke amo tiyolijsiuij uan tikualtakamej?
3 Maj amo tiyolijsiuikan uan maj tikualtakamej. Itech nejin tonalmej, taltikpakneminij kitemouaj keniuj sayoj yejuan moyolpaktiskej uan amo kitasojkamatij nion teyi. Yejua ika, komo amo tiyolijsiuij uan tikualtakamej kintelpaleuis akin techitaskej, okachiok akin tekitij itech hotel uan kampa takualnamakaj (2 Tim. 3:1-5). No moneki titanemiliskej itech oksekin keman tikxeloskej kampa timotaliskej oso keman tikuitiuij yankuik amaixmej (1 Cor. 10:23, 24). Se takat keman yekinika yajki itech se ueyi nechikol, kijtoj: “Amo nikelnamiki nion se tanojnots tein motemakak nejon tonal, sayoj ke kemej monejnemiltiayaj itaixpantijkauan Jiova yejua tein okachi nikelnamiki”.
4. ¿Keyej semi kuali maj tiknemilikan titapaleuiskej itech ueyi nechikol?
4 Maj titapaleuikan. Akin yekmelauj kichiuaj kemej Cristo nochipa moixmatij kemej tapaleuianij (Sal. 110:3). ¿Uelis tiontapaleuis? Keman yaya mochiuati se ueyi nechikol, kemej seiscientos tokniuan tapaleuijkej itech tachipaualis. Akin ompa tekitij kijtojkej: “Amo keman teisa ijkon tikitstoyaj. Amo ueli tikneltokaj maj amo akin kiseli taxtauil”. Ika miak pakilis tikchiaj ueyi nechikol tein uejkaua eyi tonal xiuit 2013, kampa amo sayoj titakakiskej uan tikajsikamatiskej tein ompa moijtos, ta no tikueyichiuaskej toTamachtijkauj, Jiova.
[Recuadro itech página 3-6]
Tein techelnamiktiaj keman tiyaskej ueyi nechikol tein uejkaua eyi tonal xiuit 2013
◼ Hora keman peuas uan tamis. Tataposkej 8:00 kualkan. Tatsotson peuas 9:20 nochi eyi tonal. Ijkuak, tinochin moneki timotaliskej, ijkon nechikol peuas ika poujkaitalis uan kemej moneki. Viernes uan sábado, nekuikatil uan netataujtil tein ika tatamis yeski 4:50 tiotak, uan domingo 3:35.
◼ Kampa tiketsaj teposmej. Komo techtakauiliaj, amo techtaxtaualtiskej kampa tiketsaskej totepos, uan tiktekpantiyaskej ijkon kemej tiajsitiyaskej. Kemej amo nochipa taueyika kampa tiketsaskej teposmej, yejua ika, komo ueli maj tiyakan itech itepos okse tokniuj, ijkon amo semi miakiaskej. Kampa kinxelouiliaj akin amo ueli nejnemij, sayoj kikauaskej akin itepos kipias letrero oso placa.
◼ Ikpalmej. Uelis tikinxelouiliskej sayoj tochankauan, akin touan youij itech tepos, oso akin tikinmachtijtokej ika Biblia. Amo miakej ikpalmej ixyetokej kampa motaliskej akin xiuejkejya uan akin mokokouaj, yejua ika amo nochipa uelis motaliskej iniuan nochin ininchankauan. Ika kualtakayot, xikonkaua nejon ikpalmej maj ompa motalikan akin xiuejkejya uan akin mokokouaj uan akin kinpaleuijtoskej (1 Cor. 13:5).
◼ Takualis. Maj tikuikakan totakual, ijkon amo monekis tikouatiuij tajkotonal. Tein ika tikuikaskej totakual moneki maj amo ueyi, ta se tein akis tatampa kampa timotaliskej. Uan no, maj amo tikuikakan tapalkamej tachijchiuj ika teskat.
◼ Totapaleuil ika tomin. Uelis tiknextiskej ke tiktasojkamatij ueyi nechikol komo ika totomin tikpaleuiaj itekiyo Dios tein mochiua itech nochi taltikpak. Nejin uelis tiktemakaskej keman tiyetoskej itech ueyi nechikol. Tapaleuil ika cheque moneki motalis itokaykopa “La Torre del Vigía, A.R.”. No uelis titemakaskej totapaleuil ika tarjeta de débito uan crédito itech seki xolalmej kampa mochiuas uejueyi nechikolmej.
◼ Pajti. Komo timopajtijtokej, moneki tikuikaskej pajti tein techajsis nejon tonalmej, porin itech ueyi nechikol amo kipiaskej. Komo tikonpia diabetes uan moneki tikonkuis aguja uan jeringa, xikonelnamiki ke moneki amo tikontamotas kampa yeski, porin uelis aksa ika motsoponis. Amo xikontamota kampa motalia tajsol itech ueyi nechikol nion itech hotel.
◼ Tekakmej. Nochi xiujmej miakej moxokoliaj porin amo kuali kiixpejpenaj inintekak, okachiok porin uejuejkapantikej. Okachi kuali maj tikuikakan tein kinamikis nejon tonalmej, tein amo techtsakuilis uan tein amo ika tiuetsiskej keman tipanoskej itech escalera uan kampa yeski.
◼ Akin amo uelij yektakakij. Itech seki uejueyi nechikolmej, tanojnotsmej kipanoltiskej itech frecuencia modulada (FM) ompa taijtik. Sayoj monekis tikuikaskej se radio tsikitsin tein tekiti ika baterías uan tein timonakastaliliskej uan ika tikakiskej.
◼ Coches tein ika kinuikaj konemej uan ikpalmej. Itech ueyi nechikol maj amo tikuikakan coches tein ika se kinuika konemej uan ikpalmej. Uelis se kiuikilis konet se ikpal, sayoj komo aki ininnakastan tetatmej.
◼ Perfume. Itech miak kalmej kampa mochiua uejueyi nechikolmej, nochi tatsaktok uan moneki taejekauiltiskej ika teposmej. Yejua ika moneki titanemiliskej itech oksekin uan amo tiktelkuiskej perfume uan okseki taman tein tel chikauak ajuiyak, ta nejon uelis kinijtakos oksekin akin kipiajya se kokolis (1 Cor. 10:24).
◼ Amat tein itokay Sírvase visitar (S-43-S). Itech amat Sírvase visitar uelis tikijkuiloskej itokay akin tiknojnotsaskej uan kinekis kimatis okachi. Uelis tiktemakaskej amat Kampa Kitemakaj Amaixmej, oso tikmakaskej tajkuilojkej itech tonechikol keman timokepaskej.
◼ Kampa takualnamakaj. Keman kuali timonejnemiltiaj ijkuak tiyouij kampa takualnamakaj kiueyitalia itokay Jiova. Kuali xiontakentiuj, kemej se itaixpantijkauj Jiova. Komo itech toaltepeuj moneki se kikauas tepitsinok tomin, maj ijkon tikchiuakan.
◼ Hotel
1) Maj tikxelokan kampa timokauaskej sayoj akin yekmelauj tikuiskej, uan akin timokauaskej itech se cuarto moneki yeski sayoj kemej ixyetok.
2) Maj amo tikijtokan ke amo tikuiskejok. Kemaj uelis tikchiuaskej sayoj komo yekmelauj mochiuak se ijsiujkayot, uan moneki niman titanauatiskej itech hotel uan ijkon oksekin uelis ompa mokauaskej (Mat. 5:37). Komo ijkon tikonchiua, xikonijkuilo tapoual tein mitsonmakaskej. Komo tiontanauatia ome tonal achto ke amo ompa tionmokauas, amo uelis mitsonkepiliskej motomin.
3) No moneki tikmatiskej ke komo itech hotel titaxtauatij ika tarjeta de crédito oso débito, yejuan kitsakuiltiaj tepitsin tomin tein tikpiaj ompa, porin ika nejon motamiixtaua ipatiuj kampa timokaujkej, uan no komo teisa tikuejuelojkej keman ompa tiyetoyaj. Amo uelis tikuiskej nejon tomin hasta seki tonalmej satepan ke tikisaskej, keman kiitaskejya kanachi moneki titaxtauaskej.
4) Maj tikuikan carrito tein ika se kiuika teisa, sayoj keman yekmelauj tiktekitiltiskej uan maj niman tikepakan, ijkon uelis kikuiskej oksekin.
5) Komo ipa ijkon mochiua, maj tikinkauilikan tepitsin tomin tekitinij itech hotel keman techtasakiskej, uan maj mojmostaj no tikinkauilikan tepitsin tomin akin tachipauaj.
6) Kampa timokauaj, maj titakualchiuakan sayoj komo techiluiaj ke uelis.
7) Maj tikuikan almasal, kafen uan okse taman sayoj tein ixyetok kinmakaskej sejse akin mokauaj ompa.
8) Maj nochipa tiknextikan itakilo espíritu keman iniuan titajtoskej akin tekitij itech hotel. Maj tikelnamikikan ke yejuan kinpaleuiaj miakej akin ompa mokauaj, uan yejua ika kitasojkamatij maj tikinajsikamatikan, maj tikualtakamej uan maj amo tiyolijsiuikan.
9) Moneki maj tetatmej nochipa kinyekpiakan ininkoneuan ijkuak yetoskej itech hotel, uan no keman pankisaskej oso temoskej oso moixpetanijtoskej ompa.
10) Ipatiuj kampa timokauaskej tein ixnesi itech Lista de hoteles recomendados, kijtosneki sayoj se tonal, uan amo kipia impuesto. Komo techtaxtaualtiaj okachi patiyoj, maj amo tikselikan uan maj niman titanauatikan Kampa kiitaj kani se Mokauas ompa itech ueyi nechikol.
11) Komo tikpiaj se kuejmol kampa timokauaj, maj niman titanauatikan Kampa kiitaj kani se Mokauas keman tiyetoskej itech ueyi nechikol.
◼ Tapaleuianij. Nochin akin kinekiskej tapaleuiskej uelis yaskej Kampa Moijkuilouaj Tapaleuianij. Akin ayamo kiajxitiaj 16 xiujmej, no uelis tekitiskej komo moajsi semej itatuan oso aksa akin yejuan takuaujtamatij ke uelis kiitas.