Tein techelnamiktiaj keman tiyaskej ueyi nechikol tein uejkaua eyi tonal
Hora keman peuas uan tamis. Tataposkej 8:00 kualkan. Tatsotson peuas 9:20 nochi eyi tonal. Ijkuak, tinochin moneki timotaliskej, ijkon nechikol peuas ika poujkaitalis uan kemej moneki. Viernes uan sábado, ueyi nechikol tamis kemej 5:00 tiotak, uan domingo kemej 4:00.
Maj tikueyichiuakan Jiova ika nekuikatilmej. Ne uejkauj, ixolal Dios kiueyichiuaya Jiova ika nekuikatilmej. Itech totonaluan, nekuikatilmej semi monekij itech taueyichiualis tein melauak (Sal. 28:7). Itech Uejueyi nechikolmej, achto ke peuas tamachtilismej kualkan uan tiotak, kitaliaj maj kakisti tatsotson. Nejin amo sayoj kitaliaj maj kakistito, ta mochijchiuak maj ika tikueyichiuakan Jiova uan maj ika timomachtikan ikualneskayouan. Yejua ika, keman akin kiixyekana ueyi nechikol kijtos ke peuati tatsotson, moneki maj timotalikan uan maj tikakikan ika nejmachkayot uan maj amo titajtojtokan iniuan oksekin. Ijkon tiknextiskej ke tiktasojkamatij chikaujkayot tein kichiuaj tokniuan akin pouij itech oloch tatsotsonanij tein kipia Wachtower. Ojpa xiuit, youij Patterson (Nueva York) uan yejuan kiixtauaj tepos tein kikuij keman ompa youij uan ijkon kichiuaskej grabación ika kualtsitsin nekuikatilmej tein tinochin techyolpaktia. Satepan ke tikakiskej tatsotson, tikueyichiuaskej Jiova ika nekuikatilmej ika iTekiuajyo Dios.
Kampa tiketsaj teposmej. Komo techtakauiliaj, amo techtaxtaualtiskej kampa tiketsaskej totepos, uan tiktekpantiyaskej ijkon kemej tiajsitiyaskej. Kemej amo nochipa taueyika kampa tiketsaskej teposmej, yejua ika, komo ueli maj tiyakan itech itepos okse tokniuj, ijkon amo semi miakiaskej. Kampa kinxelouiliaj akin amo ueli nejnemij, sayoj kikauaskej akin itepos kipias letrero oso placa.
Ikpalmej. Keman tataposkej, amo ijsiujka xionmotalo porin tikonneki tionmotalis kampa okachi tikonuelita, kemej yeskia tionmotatantok. Xikontemo maj kuali moajsikan oksekin, maski monekis tionmotalis kampa amo semi tikonuelitas. Tiknekiskej ika miak pakilis tikinpaleuiskej oksekin kinextia ke yekmelauj tikchiuaj kemej Cristo uan kinolinis akin techitaj maj kiueyichiuakan Dios (Juan 13:34, 35; 1 Cor. 13:5; 1 Ped. 2:12). Uelis tikinxelouiliskej kani motaliskej sayoj tochankauan, akin touan youij itech tepos oso akin tikinmachtijtokej ika Biblia. Amo xikontali nion teyi itech ikpalmej komo amo tikonkuis. Ijkon okachi amo ouij kiitaskej katiyejua ikpalmej tein takaujtokej. Moajsiskej ikpalmej kampa motaliskej akin xiuejkejya uan akin mokokouaj. Kemej amo miakej ikpalmej ixyetokej, amo nochipa uelis motaliskej iniuan nochin ininchankauan. Ika kualtakayot, xikonkaua nejon ikpalmej maj ompa motalikan akin xiuejkejya uan akin mokokouaj uan akin kinpaleuijtoskej.
Maj timotakentikan kemej moneki. Tilmaj tein timotaliliskej keman tiyaskej ueyi nechikol moneki kuali nesis, uan amo kemej akin amo kiueyichiuaj Jiova (1 Tim. 2:9). No ijkon, moneki nochipa kuali timotakentiskej hasta ijkuak timoijkuilotiuij oso keman tikauaskej hotel uan no keman amo tiyetoskej itech ueyi nechikol. Ijkon ika miak pakilis tikuikaskej tarjeta tein kinextia ke tiyetokej itech ueyi nechikol uan amo timopinaujmastiskej tikteixmatiltiskej Jiova keman uelis. Kuali taken tein timotaliliskej uan kemej timonejnemiltiskej keman mochiujtos ueyi nechikol tein uejkaua eyi tonal amo sayoj kinpaleuis akin kipiaj se kuali ininyolo maj kinekikan momachtiskej Biblia, ta no kiyolpaktis Jiova (Sof. 3:17).
Komo tikuiskej celular oso okseki teposmej. Komo tikonixtalijtok tikonuikas se celular oso okseki teposmej, ika kualtakayot xikontali kemej amo kintapololtis oksekin. Komo tikonkuis se cámara, se videocámara, tableta oso okse taman tepos, xikonkui kemej amo kinkuejmolos takakinij uan kemej amo kintsakuilis maj kiitakan plataforma. Keman motemakatoskej tamachtilismej itech ueyi nechikol amo xikontitani mensaje ika celular oso correo komo amo moneki, ijkon tikonnextis ke tikonpoujkaita oksekin.
Takualis. Xikonuika motakual ijkon amo monekis tikonkouatiuj tajkotonal. Tein ika tikuikaskej totakual moneki maj amo ueyi, ta se tein akis tatampa kampa timotaliskej. Uan no, maj amo tikuikakan tapalkamej tachijchiuj ika teskat.
Totapaleuil ika tomin. Uelis tiknextiskej ke tiktasojkamatij ueyi nechikol komo ika totomin tikpaleuiaj itekiyo Dios tein mochiua itech nochi taltikpak. Nejin uelis tiktemakaskej keman tiyetoskej itech ueyi nechikol. Tapaleuil ika cheque moneki motalis itokaykopa “La Torre del Vigía, A.R.”. Itech seki xolalmej kampa mochiuas uejueyi nechikolmej, no uelis titemakaskej totapaleuil ika tarjeta de débito uan crédito.
Pajti. Komo timopajtijtokej, moneki tikuikaskej pajti tein techajsis nejon tonalmej, porin itech ueyi nechikol amo kipiaskej. Komo tikonpia diabetes uan moneki tikonkuis aguja uan jeringa, xikonelnamiki ke moneki amo tikontamotas kampa yeski, porin uelis aksa ika motsoponis. Amo xikontamota kampa motalia tajsol itech ueyi nechikol nion itech hotel.
Maj kuali timotachilikan. Semi moneki maj timotachilikan ijkon amo timoxolauaskej oso timometsteloskej. Nochi xiujmej miakej moxokoliaj porin amo kuali kiixpejpenaj inintekak, okachiok porin uejuejkapantikej. Okachi kuali maj tikuikakan tein kinamikis nejon tonalmej, tein amo techtsakuilis uan tein amo ika tiuetsiskej keman tipanoskej itech escalera uan kampa yeski.
Akin amo uelij yektakakij. Itech seki uejueyi nechikolmej, tanojnotsmej kipanoltiskej itech frecuencia modulada (FM) ompa taijtik. Sayoj monekis tikuikaskej se radio tsikitsin tein tekiti ika baterías uan tein timonakastaliliskej uan ika tikakiskej.
Coches tein ika kinuikaj konemej uan ikpalmej. Itech ueyi nechikol maj amo tikuikakan coches tein ika se kinuika konemej nion ikpalmej. Uelis se kiuikilis konet se ikpal, sayoj komo aki ininnakastan tetatmej.
Perfume. Itech miak kalmej kampa mochiua uejueyi nechikolmej, nochi tatsaktok uan moneki taejekauiltiskej ika teposmej. Yejua ika moneki titanemiliskej itech oksekin uan amo tiktelkuiskej perfume uan okseki taman tein tel chikauak ajuiyak, ta nejon uelis kinijtakos oksekin akin kipiajya se kokolis (1 Cor. 10:24).
Kampa takualnamakaj. Keman kuali timonejnemiltiaj ijkuak tiyouij kampa takualnamakaj kiueyitalia itokay Jiova. Kuali xiontakentiuj, kemej se itaixpantijkauj Jiova. Komo itech toaltepeuj moneki se kikauas tepitsinok tomin, maj ijkon tikchiuakan.
Hotel:
Maj tikxelokan kampa timokauaskej sayoj tein yekmelauj tikuiskej, uan akin timokauaskej itech se cuarto moneki yeski sayoj kemej ixyetok.
Maj amo tikijtokan ke amo tikuiskejok. Kemaj uelis tikchiuaskej sayoj komo yekmelauj mochiuak se ijsiujkayot, uan moneki niman titanauatiskej itech hotel uan ijkon oksekin uelis ompa mokauaskej (Mat. 5:37). Komo ijkon tikonchiua, xikonijkuilo tapoual tein mitsonmakaskej. Komo tiontanauatia ome tonal achto ke amo ompa tionmokauas, amo uelis mitsonkepiliskej motomin.
No moneki tikmatiskej ke komo itech hotel titaxtauatij ika tarjeta de crédito oso débito, yejuan kitsakuiltiaj tepitsin tomin tein tikpiaj ompa, porin ika nejon motamiixtaua ipatiuj kampa timokaujkej, uan no komo teisa tikuejuelojkej keman ompa tiyetoyaj. Amo uelis tikuiskej nejon tomin hasta seki tonalmej satepan ke tikisaskej, keman kiitaskejya kanachi moneki titaxtauaskej.
Maj tikuikan carrito tein ika se kiuika teisa, sayoj keman yekmelauj tiktekitiltiskej uan maj niman tikepakan, ijkon uelis kikuiskej oksekin.
Komo ipa ijkon mochiua, maj tikinkauilikan tepitsin tomin tekitinij itech hotel keman techtasakiskej, uan maj mojmostaj no tikinkauilikan tepitsin tomin akin tachipauaj.
Uelis titakualchiuaskej, kampa timokauaj, sayoj komo techiluiaj ke ueli.
Maj tikuikan almasal, kafen uan okse taman sayoj tein ixyetok kinmakaskej sejse akin mokauaj ompa, sayoj ke maj amo tikuikakan itech ueyi nechikol.
Maj nochipa tiknextikan itakilo espíritu keman iniuan titajtoskej akin tekitij itech hotel. Maj tikelnamikikan ke yejuan kinpaleuiaj miakej akin ompa mokauaj, uan yejua ika kitasojkamatij maj tikinajsikamatikan, maj tikualtakamej uan maj amo tiyolijsiuikan.
Moneki maj tetatmej nochipa kinyekpiakan ininkoneuan ijkuak yetoskej itech hotel, uan no keman pankisaskej oso temoskej oso moixpetanijtoskej ompa.
Ipatiuj kampa timokauaskej tein ixnesi itech Lista de hoteles recomendados, kijtosneki sayoj se tonal, uan amo kipia impuesto. Komo techtaxtaualtiaj okachi patiyoj, maj amo tikselikan uan maj niman titanauatikan Kampa kiitaj kani se Mokauas ompa itech ueyi nechikol.
Komo tikpiaj se kuejmol kampa timokauaj, maj niman titanauatikan Kampa kiitaj kani se Mokauas keman tiyetoskej itech ueyi nechikol.
Tapaleuianij. Nochin akin kinekiskej tapaleuiskej uelis yaskej Kampa Moijkuilouaj Tapaleuianij. Akin ayamo kiajxitiaj 16 xiujmej, no uelis tekitiskej komo moajsi semej itatuan oso aksa akin yejuan takuaujtamatij ke uelis kiitas.