Maj moueyitali itokay Dios
1. ¿Keniuj motokaytis ueyi nechikol tein uejkaua ome tonal itech xiujtekit 2012 uan kani mokixtij?
1 ¡Se ueyi tatiochiualis maj tikteixmatiltikan itokay Jiova, akin okachi Ueyichiujkej itech iluikak uan taltikpak! Yejua Jiova akin techmaka nejon tatiochiualis, uan okachiok itech xiuit 1931 keman peuak timoixmatij kemej itaixpantijkauan Jiova (Isa. 43:10). Jesús, iKonetsin Dios, no kiueyitalij itokay Jiova, yejua ika kitayekanaltij itech netataujtil tein kinmachtij itatojtokakauan (Mat. 6:9). Uan itech nejin tajtolmej motaksaltia itokay ueyi nechikol tein uejkaua ome tonal itech xiujtekit 2012, motokaytis: “Maj moueyitali itokay Dios”.
2. ¿Toni ika motajtos itech ueyi nechikol?
2 Toni ika motajtos. Itech tanojnots tein tikakiskej sábado “Maj tikteixmatiltikan itokay Dios kemej precursores oso okse tekit kemej nejon”, moijtos keyej techualkuilia yolpakilis keman tikchiuaj nejon tekit. Okse tanojnots tein xejxeliujtos uan motokaytis “Maj amo tikmouispolokan itokay Jiova”, techpaleuis maj amo tiuetsikan itech naui uejueyi tamekauilis. Uan itech tanojnots “Keyej moneki moueyitalis itokay Dios”, tikitaskej toni uelis techpaleuis maj kuali tikchiuakan itekiyo Dios uan maj tiktelnekikan titanojnotsaskej maski taltikpakneminij amo kiyeknekiskej techkakiskej. Domingo tikakiskej se tanojnots tein naujkan xeliujtos kampa moijtos keniuj uelis tikueyitaliskej itokay Dios ika totanemilil, totajtol, totaixpejpenalis uan totachiualis. Uan no, tein yankuikej kinpaktis tanojnots tein motaksaltia itech Biblia, uan motokaytia “Jiova kiueyitalis itokay itech Armagedón”.
3. ¿Toni tatiochiualis tikpiaj uan keniuj techpaleuis ueyi nechikol?
3 Amo uejkaua Jiova kiueyitalis itokay (Eze. 36:23). Sayoj ke axkan tikpiaj se ueyi tatiochiualis: tikpaleuiskej nochi tein kiixnextia itokay tein chipauak. Senkis tikneltokaj ke nejin ueyi nechikol techpaleuis maj okachi kuali tikteixmatiltikan itokay Dios.