Itaixpantijkauan Jiova kisenteixmatiltiaj kuali tanauatilmej
Panouaya 100 xiujmej itaixpantijkauan Jiova kisenteixmatiltijtokej kuali tanauatilmej. Se tekit kemej nejin amo keman ijkon mochiujtoya, ta motetapouia iTajtol Dios itech miak tajtolmej uan itech panoua 230 uejueyi altepemej uan xolalmej (Mat. 24:14). ¿Keyej motelneki nejin tekit? ¿Keniuj ueli mochiua itech nochi taltikpak? Itech video Los testigos de Jehová: organizados para predicar las buenas nuevas monankilia nejon netajtanilmej keman kimelaua tataman tekit tein mouika iuan tanojnotsalis tein mochiujtok itech nochi taltikpak. Satepan ke tikitaskej video, maj tiknankilikan nejin netajtanilmej.
¿Keniuj nejin video mitsonpaleuij xikonajsikamati uan xikontasojkamati 1) chikaujkayot tein kichiua inechikol Jiova tein tapaleuia maj moteixmatilti kuali tanauatilmej? (2 Tim. 4:2.) 2) tekit tein mochiua itech kalmej tein moixmatij kemej Betel tein moajsij itech nochi taltikpak? 3) nemachtil tein kiseliaj misioneros uan tokniuan takalpanouanij? (2 Tim. 2:2.) 4) tikonmatis ke motelneki se kiitas texto mojmostaj keman peua tonal uan maj se momachti tein moitas itech nechikolmej? (Hech. 17:11.) 5) nepaleuil tein tikseliaj keman tiyouij nechikolmej? (Heb. 10:24, 25.) 6) tatiochiualismej tein tikseliskej keman nikan taltikpak mochiuas se xochital? (Isa. 11:9.) 7) tatiochiualis tein tikonpia tiontapaleuis itech tanojnotsalis tein axkan mochiujtok? (Juan 4:35.)
Ika nejin video ueli tel kuali tikinpaleuiaj akin kiseliaj iTajtol Dios maj okachi kuali kiixmatikan tekit tein kichiuaj itaixpantijkauan Jiova itech nochi taltikpak. 8) ¿Kemanian semi kuali eskia maj tikinnextilikan akin tikinmachtijtokej ika Biblia, tochankauan uan oksekin tein tikinixmatij? 9) ¿Keniuj tanankilianij akin tikonnextiliani?
Keman tiknemiliaj nochi tein Jiova kichiujtok axkan, techolinia maj no ijkon tikijtokan kemej akin kijkuiloj nejin nekuikatil: “Miak taman tikchiujtok tejua Jiova noDios, uan no motachiualisuan tein kualtsitsin uan motanemililuan tein tikpia touan; amo akin ueli kichiua ijkon kemej tejua” (Sal. 40:5). Maj tikinpaleuikan oksekin ika nejin video maj kitasojkamatikan tein Jiova ika inechikol kichiujtok.