Kampa monankilia netajtanilmej
◼ ¿Akonimej moneki tajtaniskej maj aksa kinkalpano oso maj tajtanikan amaixmej ika cupón oso itech Internet?
Miak amaixmej tein tiktekitiltiaj, taikampa kipia kampa uelis se aksa tajtanis se amaix oso maj kikalpano se itaixpantijkauj Jiova. Uan no, itech Internet www.watchtower.org tein tejuan tikpiaj, uelis se tajtanis se nemachtil ika Biblia. Ika nejin, miakej taltikpakneminij momachtianij iTajtol Dios. Sayoj ke keman se tanojnotskej tajtani amaixmej oso se nemachtil imin tokaykopa itasojikniuan oso ichankauan, uelis mochiuas se kuejmol.
Kemej neskayot, ijkuak kiseliaj amaixmej tein amo tajtankej itech sucursal, sekin amo kiuelitaj porin kimachiliaj ke itech nechikol kampa tipouij kinkuejmolojtinemij, uan kipiaj imin tokayuan uan kampa nemij porin kinekij kintitanilijtoskej amaixmej. Uan no, sekin tanojnotsanij tein kiniluiaj maj kinkalpanotij akin amo tajtankej, kipanouaj ouijkayomej keman taltikpaknenkej kualani. Yejua ika, nion se tanojnotskej moneki kipexontis tein kiualkui taikampa itech se amaix oso tajtanis se nemachtil itech Internet itokaykopa okse taltikpaknenkej; sayoj moneki kichiuaskej akin kinekij momachtiskej. Ijkuak itech sucursal kiitaj ke motajtanik teisa itokaykopa okse taltikpaknenkej, amo tanankiliskej.
Komo ijkon, ¿keniuj uelis tikonpaleuis maj kiixmati Dios se mochankauj oso akin tikonixmati? Komo tikonneki maj kiseli se amaix, tejuatsin uelis tikontitanilis kemej se netetayokolil. Komo yejua kinextia ke kineki kimatis okachi uan kiuelitaskia maj kikalpano se itaixpantijkauj Jiova, xikontemo tayekananij itech nechikol tein tanojnotsaj kampa nemi nejon taltikpaknenkej. Komo amo ueli, xikonijkuilo amat Sírvase visitar (S-43-S) uan xikonmaka tajkuilojkej itech monechikol; yejua kiitas maj ijkuiliujto nochi tein moneki uan kititanis itech sucursal. Sayoj no xikonelnamiki ke amo moneki tiontajkuilos itech sucursal itokaykopa aksa tein tsaktos oso moajsis itech se kaltapajtiloyan, ta okachi kuali xikonyoleua maj kintemo tokniuan tein takalpanouaj kampa moajsi oso maj yejua tajkuilo itech sucursal.