Kampa monankilia netajtanilmej
◼ ¿Uelis titanojnotsaskej oso tikinmachtiskej ika Biblia akin amo tikinixmatij uan nemij itech okseki altepemej ika Internet?
Seki tanojnotsanij kikuij Internet uan ika kiniluianij akin nemij itech altepemej kampa tekiuanij amo kinkauaj tokniuan maj tanojnotsakan oso kampa amo moajsij miakej tokniuan, ox kinekij kiseliskej se nemachtil ika Biblia. Kemansa, nejin semi tapaleuiani. Sayoj ke, uelis yeski tamouilil se kitemakas se icorreo electrónico oso se tajtos iniuan akin amo tikinixmatij. Maski tein tiktemouaj yejua tikteixmatiltiskej kuali tanauatilmej ika iTekiuajyo Dios akin kipiaj kuali ininyolo, nejon uelis techuikas maj peua timouikakan iniuan akin uelis techijtakoskej hasta iniuan akin kinekepilijkej Jiova (1 Cor. 1:19-25; Col. 2:8). Uan no, itech altepemej kampa senkis amo kinkauaj tokniuan maj tanojnotsakan ika iTekiuajyo Dios oso kampa sayoj tepitsin kinkauaj, tekiuanij uelis kiitaskej nochi correos tein motitanij. Nejon uelis kinijtakos tokniuan akin ompa nemij. Yejua ika, moneki amo tikintemoskej itech Internet akin nemij itech okseki altepemej uan ijkon tikinixmatiltiskej kuali tanauatilmej.
Komo tiknojnotsaj aksa akin okseko kayot keman kikalpanojtok toaltepeuj, moneki amo tiktemoskej tikpaleuiskej maj kineki kimatis okachi keman mokepas ikalijtik, sayoj uelis komo sucursal tein taixyekana itech nejon altepet kiixtaliani okseki taman kemej motanojnotsas. Uan no uelis tiknextiliskej keniuj kiajsis tamachtilis oso sucursal tein kiixyekana tekit itech ialtepeuj ika jw.org. Komo kampa nemi moajsi se Kali kampa tiMosentiliaj uelis tikyoleuaskej maj youi ompa. Uan komo kineki maj itaixpantijkauan Jiova iuan tajtokan, komo ueli maj tiktajtanikan tein tapaleuis maj iuan tajtokan uan maj tikmakakan tokniuj tajkuilojkej itech nechikol, uan yejua kititanis Betel itech jw.org. Sucursal tein kiixyekana tekit itech altepet kampa yejua nemi okachi uelis kipaleuis, porin kimati keniuj nemij ompa (xikonita amaix ITekiyo Dios tein Tikchiuaj metsti junio xiuit 2014, página 6, uan ITekiyo Dios tein Tikchiuaj metsti noviembre xiuit 2011, página 2).
Komo aksa akin tikalpanojtokejya youi mokaltaliti itech okse altepet, oso komo tikmachtijtokej ika Biblia se akin nemi itech okse altepet uan sayoj tikixmatij itech Internet, moneki tikchiuaskej ijkon kemej tikitakej itech párrafo 2. Sayoj ke, uelis tiksentokaskej tikpaleuiskej maj kineki kimatis okachi hasta keman se tokniuj akin nemi ompakauin iuan tajtos. Sayoj ke, komo nemi kampa senkis amo kinkauaj tokniuan maj tanojnotsakan oso kampa sayoj tepitsin kinkauaj, moneki timonejmachpiaskej komo titajtouaj ika Biblia, keman tikijkuiloskej cartas, titajtoskej ika teléfono oso tiktitaniskej mensajes ika Internet (Mat. 10:16).