¿Uelis tionpanos Macedonia?

1. ¿Toni kiolinij Pablo uan tein iuan yayaj maj yakan Macedonia?

¹ Kemej itech xiuit 49, tatitanil Pablo kisak Antioquía tein pouia Siria, uan ika ojpa yaya kitetapouiti kuali tanauatilmej itech altepemej. Kiixtalijka takalpanotiuj Éfeso uan itech okseki altepemej tein pouiaj Asia Menor. Ika yektikatsin espíritu kiselij tayoleualis maj ‘nalpanouani Macedoniajkopaka’. Yejua uan tein iuan yayaj ika miak pakilis kiselijkej tayoleualis uan kipiakej tatiochiualis kipeualtiskej yekinika nechikol itech nejon talmej (Hech. 16:9, 10; 17:1, 2, 4). Axkan itech seki altepemej no ijkon motelnektokej okachi tanojnotsanij (Mat. 9:37, 38). ¿Uelis tiontapaleuis tejuatsin?

2. ¿Keyej sekin kinemiliaj ke amo uelis yaskej itech okse ueyi altepet?

² Xa tikonuelitaskia tiontekitis kemej tatitanil Pablo, sayoj ke amo tikonitani ox uelis tionyas itech okse ueyi altepet. Xa axkan amo ueli tikonseliti nemachtil tein kitemakaj Galaad, porin xa amo tikonpia xiujmej tein motajtani, se titokniuj siuat tein moselti oso tikoniskaltijtok mokoneuan. Uan no, xa amo tikonnemilia tionyas itech okse ueyi altepet porin tikonnemilia ke amo tionuelis tionmomachtis okse tajtol. Oso xa axkan tionyetok itech se ueyi altepet porin itech moaltepeuj semi tatasojti uan axkan tikonnemilia ke amo uelis tionmokalpatas oksepa. Sayoj ke satepan ke tikonixejekos ika netataujtil, tikonitas ke tein tikonpanotos axkan amo mitsontsakuilia xionyoui itech okse ueyi altepet kampa motelnektokej tanojnotsanij.

3. ¿Uelis kuali tikchiuaskej tekit itech okse ueyi altepet maski amo tikseliskej nemachtil tein kinmakaj misioneros? Xikonmelaua.

³ ¿Motelneki tikseliskej nemachtil tein kinmakaj misioneros? ¿Toni kipaleuij Pablo uan tein iuan yayaj maj kuali kisani tekit tein kichiujkej? Yejuan takuaujtamatkej iuan Jiova uan iespíritu (2 Cor. 3:1-5). Yejua ika, maski tein axkan tikonpanotos kichiua maj amo ueli xikonseli nemachtil tein kinmakaj misioneros, uelis kuali tikonchiuas tekit itech okse ueyi altepet. Uan no, xikonelnamiki ke kisentokas mitsonpaleuis Escuela tein Techmachtia iTekiyo Dios uan Nechikol tein Techmachtia iTekiyo Dios. Komo tikonixtalijtok tikonselitiuj nemachtil tein kitemakaj Galaad oso okse nemachtil kemej nejon, uelis tionyas itech okse altepet uan tikonchiuatiuj tekit kemej misionero tein mitsonpaleuis xionueli seki taman tein uelis tikonkuis satepan komo mitsonyoleuaj xikonseliti nejon nemachtil.

4. ¿Keyej tein xiuejkejya moneki maj amo kinemilikan ke amo uelis tapaleuiskej itech okse ueyi altepet?

⁴ Tokniuan tein xiuejkejya. Tokniuan tein xiuejkejya akin kipiaj kuali taixejekolis uan amo mokokouaj, uelis tel kuali tapaleuiskej itech altepemej kampa monektokej okachi tanojnotsanij. ¿Tejuatsin amo tiontekitiok? Sekin maski amo kinpaleuijtokej ika miak tomin kampa tekitiaj, ueli kiixtauaj tein moneki uan ueli mopajtiaj keman tapaleuijtokej itech okse altepet kampa amo semi tapatiyoj kemej kampa nemij.

5. Xikonijto tein kipanok se tokniuj akin amo tekitiok uan yajki itech okse ueyi altepet.

⁵ Se tokniuj tayekankej uan precursor akin amo tekitiaok uan nemia itech se altepet kampa tajtouaj inglés, yajki itech se altepet tein poui Asia kampa miakej tein seseko kayomej takalpanouayaj ompa. Nejon kichiuak porin kinekia tapaleuitiuj kampa moajsiaj chiknaui tanojnotsanij itech tajtol inglés tein ayamo katka se nechikol. Yejuan kinnojnotskej 30,000 taltikpakneminij tein seseko kayomej akin ompa nemiaj. Itech sayoj ome xiuit mosentiliayajya 50 taltikpakneminij. Tokniuj kijtoj: “Axkan ke nikan nitekititok nechualkuilijtok okachi kualtsitsin tatiochiualismej. ¡Amo keman ueliskia niktamitetapouiskia!”.

6. ¿Toni kipanok se tokniuj siuat akin iselti, tein yajki itech okse altepet kampa okachi monektokej tanojnotsanij?

⁶ Tokniuan siuamej tein imin selti. Semi se kimoujkaita keniuj Jiova kintelkui siuamej maj kimoyauakan kuali tanauatilmej itech altepemej kampa motelnektokej tanojnotsanij (Sal. 68:11). Se tokniuj ichpoch akin iselti, kiixtalijtoya okachi tapaleuis itech okse altepet, sayoj ke, kemej nochin tetatmej kinpanoskia, itatuan moteltekipachouayaj maj teisa kipano. Yejua ika, kiixpejpenak se ueyi altepet kampa amo kipiayaj kuejmolmej tekiuanij uan amo semi ouij moixpanoltiskia. Ompa, tajkuiloj itech sucursal uan tein tekitij ompa kimatiltijkej seki taman tein kipaleuiskia. Itech chikuasen xiuit tein moajsik itech nejon ueyi altepet kiselij miak tatiochiualismej. Yejua kijtoj: “Kampa achto nitanojnotsaya amo semi ueliskia nikpeualtiskia nemachtilmej ika Biblia. Sayoj ke nitekitis kampa okachi monektokej tanojnotsanij, uelik miakej nikinmachtij ika Biblia uan nechtelpaleuij maj okachi kuali nikchiuani”.

7. Xikonijto tein kipanokej seki tokniuan akin yajkej itech okse ueyi altepet kemej kalyetouanij.

⁷ Kalyetouanij. Komo tikonpia konemej ¿tikonnemilia ke amo uelis tionyas itech okse altepet tikontematiltitiuj kuali tanauatilmej? Se takat uan se siuat namikuanij tein kipiayaj ome konemej, se tein kipiaya chikueyi xiuit uan okse majtakti, kinemilijkej yaskej okseko. Temomaj kijkuiloj tein kipanokej: “Tiktasojkamatij maj nikan moskaltianij tokoneuan, porin uelik mouikakej imiuan precursores especiales uan misioneros. Titekitiskej kampa motelnektokej tanojnotsanij, techualkuilia ueyi yolpakilis”.

8. ¿Uelis se yas itech okse altepet maski amo se momachtis okse tajtol? Xikonmelaua.

⁸ ¿Tikonouijmati tionuelis okse tajtol? ¿Tikonnemilia ke amo uelis tionyas itech okse altepet porin amo uelis tionmomachtis okse tajtol? Amo xionmotekipacho. Xa tionueli se tajtol tein no mokui itech okseki uejueyi altepemej kampa monektokej tanojnotsanij. Se takat uan se siuat namikuanij tein tajtouaj inglés, yajkej itech se ueyi altepet kampa tajtouaj español, sayoj ke ompa nemiaj miakej tein imin tajtol katka inglés. Sucursal kinmatiltijka itech katiyejua nechikolmej itech tajtol inglés monektoyaj tanojnotsanij. Yejuan kiixpejpenkej se uan ojpa takalpanotoj ompa. Keman mokepkej imin chan, itech se xiuit kichiujkej tein kinpaleuiskia maj uelikan kieuakan tomin. Ijkuak mokalpataskiajya, tokniuan tein ompa nemiaj kinpaleuijkej maj kiajsinij kani mokauaskej kampa amo semi patiyoj.

9, 10. ¿Toni uelis kiixejekoskej tein nemij itech okse ueyi altepet uan keyej?

⁹ ¿Tionmoajsi itech okse ueyi altepet? Xa achto ke tikonixmatiskia iTajtol Dios, tionyajki itech okse ueyi altepet uan axkan ompa tionnemi. Xa itech moaltepeuj motelnektokej tanojnotsanij. ¿Tikonixejekouani ox uelis tionmokepas uan ompa tiontapaleuis? Xa okachi amo ouij tikonajsis tekit uan tein monekis, ke se akin okseko kayot, uan no tionueli tajtol tein ompa mokui. Uan no, taltikpakneminij xa okachi kiseliskej kuali tanauatilmej komo kinmatiltia se tein ompa kayot ke se tein okseko ualeua.

¹⁰ Se takat tein kisak Albania uan mopaleuito Italia, kiajsik se kuali tekit uan kintitaniliaya tomin ichankauan tein nemiaj Albania. Ompa kiixmatik iTajtol Dios uan satepan peuak kinmachtia albanés seki precursores especiales tein kayomej Italia akin yaya tapaleuitij Albania kampa monektoyaj tanojnotsanij. Tokniuj kijkuiloj: “Yejuan yatij itech altepet tein nejua nikauak. Maski amo uelij tajtol tein ompa mokui, tekititij ika miak pakilis. Nejua nikixmati tajtol uan nemilis ompa Albania. ¿Toni nikchiujtok nikan Italia?”. Tokniuj kinemilij mokepas Albania tapaleuitiuj maj momoyaua kuali tanauatilmej. Uan no kijtoj: “Nion tepitsin nechyolkokoua maj nikauani tekit uan tomin tein nikpiaya Italia. Nikan Albania nikajsik okachi kuali tekit tein uelis onkas. Nikita ke se kitekitilis Jiova ika nochi se iyolo, yejua tein okachi tayekantok uan tein nochipaya kiualkui yolpakilis”.

11, 12. ¿Toni moneki kichiuaskej akin kiixtalijtokej yaskej itech okse ueyi altepet?

¹¹ Keniuj tikchiuaskej. Achto ke Pablo uan tein iuan yayaj panoskiaj Macedonia, kiixtalijkaj yaskej tonalkalakyampa, sayoj ke “Yektikatsin Espíritu amo kinkauak”, yejua ika yajkej okseko (Hech. 16:6). Keman ajsitoyajya Bitinia Jesús kintsakuilij (Hech. 16:7, NM). Axkan, Jiova ika iKonetsin Jesús, kisentoka kiixyekana tanojnotsalis (Mat. 28:20). Yejua ika, komo tikonnemilijtok tionyas itech okse ueyi altepet, xikontajtani Jiova maj mitsonyekana (Luc. 14:28-30; Sant. 1:5; xikonita recuadro “¿Keniuj uelis nikmatis ox monektokej tanojnotsanij itech altepet kampa nikneki niyas?”).

¹² Xikontajtani tayekananij oso oksekin tokniuan tein kipiaj kuali taixejekolis maj mitsoniluikan ox kiixejekouaj ke uelis tiontapaleuitiuj (Pro. 11:14; 15:22). Xikonixtajtolti amaixmej kampa ika tajtoua tanojnotsalis itech okse ueyi altepet uan xikontemo keniuj yetok altepet kampa tikonnemilijtok tionyas. ¿Uelis tiontakalpanotiuj ompa uan tionyetos maski sayoj seki tonalmej? Komo tikonixtalijya tionyas itech nejon ueyi altepet, moneki tiontajtanis itech sucursal tein ompa moajsi maj mitsonmatiltikan tein monekis. Amaix Anuario itech xiuit tein tiyetoskej kinextia kani uelis tikontitanis. Xikonmaka moamauj tayekananij itech monechikol uan yejuan kijkuiloskej okseki taman tein monekis achto ke kititaniskej (xikonita Organizados para hacer la voluntad de Jehová, página 111 uan 112).

13. ¿Toni nepaleuil kitemaka sucursal uan toni moneki tisejsemej tikchiuaskej?

¹³ Sucursal mitsonmatiltis keniuj moajsi ueyi altepet, tein mitsonpaleuis xikonixejeko ox uelis tionyas. Sayoj ke amo uelis mitsonmakaskej amamej tein moneki kipiaskej akin tajtanij tein ika panoskej itech okse ueyi altepet, uan amo no uelis mitsontemoliskej kampa tionchanchiuas. Nochi nejin tisejsemej moneki tiktemoskej uan tikpiaskej achto ke tiyaskej. Uan no, tisejsemej moneki titajtaniskej kampa temakaj nejon amamej toni moneki se kipias, uan ijkon uelis temakaskej amat tein ika se panos itech okse altepet uan uelis se kitemos tekit ompa. Akin yati itech okse ueyi altepet moneki maj ueli motemoli tein ompa kikuis uan amamej tein tajtanij tekiuanij (Gál. 6:5).

14. ¿Toni moneki kichiuaskej akin takalpanotij oso kinemilijtokej nemitiuij itech se altepet kampa amo kinkauaj maj tanojnotsakan?

¹⁴ Itech altepemej kampa amo kinkauaj maj tanojnotsakan. Itech seki altepemej tokniuan moneki kipiaskej kuali taixejekolis keman kichiuaj itekiyo Dios (Mat. 10:16). Tanojnotsanij akin takalpanouaj oso ompa nemitij uelis kichiuaskej maj tel miakej kinitakan keman tanojnotsaskej, uan nejon taolinis maj kinkuejmolkalakikan tokniuan tein ompa nemij. Yejua ika, komo tikonnemilijtok tionyas ompa, moneki tikonijkuilos se amat, tikonmakas tayekananij uan yejuan kititaniskej sucursal.

15. Komo axkan amo ueli tionyoui itech okse altepet ¿keniuj uelis okachi tiontekitis kampa tionnemi?

¹⁵ Komo amo ueli tionyoui itech okse altepet. Komo tejuatsin amo uelis tionyas itech okse altepet, amo xionmoyolkoko. Xa okseko ‘monextis miak tekit’ tein uelis tikonchiuas (1 Cor. 16:8, 9). Tokniuj tein namechkalpanoua itech nanmonechikol xa no kimatis kani monektokej tanojnotsanij ompakauin. Xa uelis tiontapaleuitiuj itech se nechikol oso kampa ayamo nechikol tein amo semi uejka uan tanojnotsaj itech okse tajtol. Oso uelis okachi tiontapaleuis itech monechikol. Xikonelnamiki ke tein okachi tayekantok, amo kani ueli titekitij, ta maj tikchiuakan itekiyo Dios ika nochi toyolo (Col. 3:23).

16. ¿Keniuj moneki timomachiliskej komo tikmatij ke se tokniuj kiixtalia tapaleuitiuj itech okse ueyi altepet?

¹⁶ ¿Tikonixmati se tokniuj tein kuali tekititok uan kinemilijtok tapaleuitiuj itech okse ueyi altepet? Komo ijkon, xikonpaleui uan xikonyolchikaua. Keman Pablo kisak Antioquía tein pouia Siria, katka expatika altepet okachi ueyi itech nochi talmej tein kiyekanaya Roma (satepan ke altepet Roma uan Alejandría). Kemej tel ueyika katka, tikneltokaj ke tokniuan tein moajsiaj itech nechikol Antioquía, kiitayaj ke motelnekia maj Pablo kisentokani kinpaleuiani uan komo kinkaujteuaya kiteltemoskiaj. Sayoj ke Biblia amo kinextia ke tokniuan kiiluiayaj Pablo maj mokauani. Moita ke yejuan amo sayoj kiitayaj imin altepeuj, ta kielnamikiaj ke “milajtal tamati kemej in taltikpak” (Mat. 13:38).

17. ¿Keyej motelneki maj tiknemilikan ‘tipanoskej Macedonia’?

¹⁷ Pablo uan tein iuan yayaj kiselijkej miak tatiochiualismej keman yajkej Macedonia ijkon kemej kinyoleujkaj. Itech altepet Filipos kiixmatkej Lidia akin “Yejuatsin kiyolyemanij uan kiyoltapoj para uelis kajsikamatis uan kitakamatis tenika in Pablo kinojnotsaya” (Hech. 16:14). Maj timonemilikan keniuj yolpakkej Pablo uan tein iuan yayaj keman Lidia uan nochin tein nemiaj ichan moauijkej. Itech miak altepemej, moajsij tein yolmelaujkej kemej Lidia akin ayamo kikakinij kuali tanauatilmej. Komo tikonselia tayoleualis uan ‘tionpanoua Macedonia’, uelis tikonpias yolpakilis tikonajsis uan tikonpaleuis taltikpakneminij yolmelaujkej maj kiixmatikan Dios.

[Tajtolmej itech página 5]

“¿Keniuj uelis nikmatis ox monektokej tanojnotsanij itech altepet kampa nikneki niyas?”

• Xikonita Anuario tein yankuik tikpiaskej. Kuali xikonita kanachi tanojnotsanij moajsij uan tein nemij itech ueyi altepet.

• Xikontemo itech Índice kampa ika motajtoua tekit itech nejon altepet uan no tein kipanouaj tokniuan ompa.

• Xiontajto imiuan tanojnotsanij tein yanijya itech nejon ueyi altepet oso ompa nemiaj.

• Komo tikonnemilijtok tionyas itech okse ueyi altepet kampa uelis tiontanojnotsas itech tajtol tein tionueli, xikontemo itech Internet oso okseko uan xikonita kanachi nemij tein uelij motajtol.