Maj mochiua itanejnekilis Dios
1. ¿Keniuj motokaytis ueyi nechikol tein uejkaua se tonal itech xiujtekit 2012, uan keyej semi kuali maj ika motajto nejon?
1 Jiova techchijchiuak porin yejuatsin ijkon kinekik (Apo. 4:11). Moneki tikixmatiskej katiyejua itanejnekilis Dios uan tikchiuaskej, ta nejon techpaleuis maj tinemikan kemej Dios kineki. Uelis moitas ke amo ouij tikchiuaskej nejon, sayoj ke toyolo techuika maj tiknekikan tikchiuaskej “kemej tejuan totanejnekilis [uan] [...] kemej tejuan totamachilisuan san” oso maj tikchiuakan “kemej nekes ten amo kixmatij Dios” (Efe. 2:3; 1 Ped. 4:3; 2 Ped. 2:10). Komo amo tikpiaskiaj inepaleuil Dios, Satanás ijsiujka ‘techkuatapololtiskia para maj tiktakamatiyakan ijkon kemej yejua kineki’ (2 Tim. 2:26). Ueyi nechikol tein uejkaua se tonal itech xiujtekit 2012, techpaleuis maj tikchiuakan ijkon kemej kijtoua expatika taman tein Jesús tajtanik itech netataujtil (Mat. 6:9, 10, NM). Motokaytis: “Maj mochiua itanejnekilis Dios”.
2. ¿Toni netajtanilmej monankiliskej itech ueyi nechikol?
2 Netajtanilmej tein monankiliskej. Keman tikonkaktos tanojnotsmej, xikontemo itanankililuan nejin netajtanilmej: Keman tikakiskej iTajtol Dios, ¿toni okse taman motelneki tikchiuaskej? ¿Keniuj uelis tiksentokaskej tikmatiskej katiyejua itanejnekilis Dios tein moneki tikchiuaskej? ¿Keyej moneki tikinpaleuiskej ika miak pakilis nochin tataman taltikpakneminij? ¿Keniuj uelis tikpiaskej yekmelauj yolpakilis itech tonemilis? Telpochmej uan ichpochmej, ¿toni moneki nankinextiskej iixpan Jiova? ¿Toni tatiochiualismej tikseliaj keman tikchiuaj itanejnekilis Dios? ¿Keyej motelneki maj tikinpaleuikan uan maj tikinyolchikauakan tokniuan?
3. ¿Keniuj uelis senkis tikseliskej nemachtil tein motemakas itech ueyi nechikol?
3 Xikonixtali ompa tionyetos uan kuali tikonkakis tein moijtos. Xa se tokniuj akin tekiti Betel oso se tokniuj takalpanojkej kitemakas seki tanojnotsmej itech ueyi nechikol. Achto oso satepan, uelis tiontajtos iuan tokniuj oso iuan isiuatsin komo namikej. Keman tionmokepas mochan, ‘amo xikonelkauaʼ tein moijtoj, ta ika xiontajto nemachtil imiuan mochankauan (Sant. 1:25). Xiksenitakan keniuj uelis okachi kuali nankichiuaskej itanejnekilis Dios.
4. ¿Keyej motelneki maj tiktayekanaltikan itanejnekilis Dios?
4 Amo uejkaua Jiova kinixpolos akin sayoj kichiuaj imin tanejnekilis uan akin amo kinekij kichiuaskej itanejnekilis Dios (1 Juan 2:17). Yejua ika, ¡tiktasojkamatiliaj Jiova maj techpiali nemachtil tein monektok! Nejin ueyi nechikol techpaleuis maj tiktayekanaltikan itanejnekilis Dios.