Maj tikakikan uan ijkon tikajsikamatiskej
1. ¿Keyej okachi ouij techkisa kuali titakakiskej itech uejueyi nechikolmej?
1 Amo uejkaua peuas mochiuas uejueyi nechikolmej tein uejkauaj eyi tonal itech xiuit 2013. Mochiuak se ueyi tekit porin moixtalijkejya tamachtilismej tein kinpaleuis nochin taltikpakneminij semanauak taltikpak. ¿Tikonixtalijya amo tiontapolos nion se tonal? Itech uejueyi nechikolmej onkak miak taman tein uelis techtapololtis, yejua ika okachi ouij techkisas kuali titakakiskej. Kemej tamachtilismej okachi uejkauaj ke tein motemakaj itech nechikolmej, moneki okachi uejkaua kuali titakaktoskej. Uan no, uelis tisioujtoskej porin uejka tiojtokakej oso porin tikchiujkej okseki taman. ¿Toni techpaleuis maj tiijsatokan uan ijkon uelis tikakiskej uan tikajsikamatiskej tein moijtos? (Deut. 31:12.)
2. ¿Keniuj uelis tikyektaliskej toyolo achto ke tiyaskej ueyi nechikol?
2 Achto ke ajsis tonal keman mochiuas ueyi nechikol. Itech Internet kampa timoteixmatiltiaj, www.jw.org/es, itech tajtol español tikonajsis programa kampa ixnesi itokay nochi tamachtilismej tein motemakaskej, uan se oso ome tajkuilol itech Biblia kampa mokixtij. Komo tikonpia Internet uan achto tikonita nejin, mitsonpaleuis xikonyektali moyolo achto ke tionyas ueyi nechikol (Esd. 7:10). Itech youak keman nantaueyichiuaj kemej kalyetouanij xa uelis nankiitaskej tamachtilismej tein motemakaskej, uan ijkon nochin kichixtoskej maj ajsi nejon tonal.
3. ¿Toni mitsonpaleuis kuali xiontakaki?
3 Keman mochiujtos ueyi nechikol. Komo ueli, xionyoui nekalauiloyan achto ke peuas nechikol. Xikonseui moteléfono uan ijkon amo mitsontapololtis komo mitsonnotsaj oso mitsontajkuilouiliaj, uan amo no tikonnekis tikontajkuilouilis oksekin keman mochiujtos nechikol. Komo moneki tikonkauas maj xotato, xikontali kemej amo tikontapololtis oksekin komo mitsonnotsaj. Komo tikontekitiltiti okse taman tepos, xikonita maj amo kintapololti oksekin. Amo xiontakuajto nion xiontatayito keman mochiujtos ueyi nechikol (Ecl. 3:1). Xikonitsto akin kitemakatos tanojnots uan xikonixtajtolti tajkuilolmej itech moBiblia. No uelis tikonijkuilos tein okachi monekis.
4. ¿Keniuj uelis tetatmej kinpaleuiskej ininkoneuan maj takakikan uan maj kiajsikamatikan tein moijtoua?
4 Tiknekij maj tokoneuan takakikan uan maj kiajsikamatikan tein moijtoua. Proverbios 29:15 kijtoua: “Okichpil akin kikauaj maj kichiua tein kineki, kipinaujtis imomaj”. Yejua ika semi kuali maj konemej motalikan iuan inintatuan, ijkon yejuan kiitaskej maj kuali takakikan itech nechikol uan maj amo tajtojtokan, tajkuilojtokan ika teléfono oso nenentokan. Hasta akin okachi nojnelmejok no uelis tikinmachtiskej maj ijsatokan uan maj amo kakistikan, maski amo nochi kiajsikamatiskej tein moijtoua.
5. ¿Keyej semi kuali maj oksepa tikelnamikikan tein tikakkej itech ueyi nechikol, uan keniuj uelis tikchiuaskej?
5 Satepan keman tamis ueyi nechikol. Amo xionmoteka tel youakya uan kuali xionmoseui. Xikonxelo seki minuto itech nejon tonal uan xikonita iniuan mochankauan tein moijtoj, ijkon okachi uejkaua nankielnamiktoskej. Komo tiontakuati iniuan motasojikniuan kampa kinamakaj takual, ¿uelis ika nantajtoskej se oso ome taman tein okachi nankiuelitakej? Uelis nankiuikaskej tein nankijkuilojkej. Satepan, keman nantaueyichiuaskej kemej kalyetouanij, xiksenitakan keniuj uelis namechpaleuis nejon tamachtilis itech nanmonemilis. No uelis nankixeloskej seki minuto itech sejse semana uan nankiitstiyaskej tejtepitsitsin tein kipia yankuik amaixmej.
6. ¿Keyej moneki maj amo sayoj tiyakan itech ueyi nechikol?
6 Keman tiyouij itech se takualis uan amo tikyekouaj nion tikuaj takual amo teyi techpaleuia. No ijkon panoua ika tamachtilismej tein motemakaj itech ueyi nechikol. Maj timochikauakan tiyetoskej nochi tonalmej, maj kuali titakakikan uan maj tikchiuakan ijkon kemej ompa moijtos.