“Xiksentili xolal”
1. ¿Keniuj tamatij tataman uejueyi nechikolmej uan nechikol tein kipiakej israelitas satepan ke kiskej Egipto?
1 Tepitsin satepan keman israelitas kiskej Egipto, Jiova kinauatij Moisés maj kisentiliani xolal itech tepet Sinaí kampa kikakiskiaj itajtoluan, uan ijkon kimatiskiaj keniuj kimoujkatokaskej uan kinmachtiskej ininkoneuan itanauatiluan Dios (Deut. 4:10-13). Tikyekmatij ke katka se tonal tein semi kielnamikiaj uan kichikauak inintakuaujtamatilis. Itech metsti tein uitsejok, itekitikauan Jiova no mosentiliskej itech uejueyi nechikolmej tein uejkauaj eyi tonal uan kampa mosentiliaj akin kayomej itech okseki uejueyi altepemej kampa Jiova kinmachtis. ¿Toni uelis tikchiuaskej uan ijkon okachi tikseliskej nepaleuil?
2. ¿Toni moneki tikchiuaskej uan ijkon uelis tiyetoskej itech ueyi nechikol tein uejkaua eyi tonal?
2 Maj achto tikixtalikan. Jiova kinnauatij israelitas maj achto kichiuanij tein monekiskia uan ijkon yetoskiaj itech nechikol itech tepet Sinaí (Éx. 19:10, 11). No ijkon, nochin akin yaskej ueyi nechikol tein uejkaua eyi tonal moneki achto kuali kiixtaliskej tein monekis kichiuaskej, amo sayoj akin panoskej taixpan. Kemej neskayot, miakej moneki tajtoskej iuan ininteko maj kinkaua nejon tonalmej. Xa tikonpanotok se taman kemej Nehemías. Yejua kinekia yas Jerusalén kiyekchijchiuatiuj tepamit, sayoj ke kimatia ke xa tekiuaj amo kikauaskia. Yejua ika, Nehemías kichiuak se netataujtil, kuali kinemilij tein kijtoskia uan ika yolchikaualis tajtanik maj kikaua. Tekiuaj kikauak maj youi uan hasta kimakak tein ika ueliskia kiyekchijchiuas tepamit (Neh. 2:1-9). Amo sayoj moneki tiontajtos iuan moteko, ta no tikonitas keniuj nanyaskej uan kani nanmokauaskej. Tayekananij ika miak pakilis kinpaleuiskej akin tajtaniskej nepaleuil. Xikonchiua tein monekis uan ijkon uelis tionajsis kualkan sejse tonal, uan xikonixtali maj amo teyi mitsontapololti keman motemakatos tamachtilismej (Heb. 2:1).
3. ¿Toni techpaleuis maj tikyektalikan toyolo keman tiyaskej ueyi nechikol?
3 Moneki tikyektaliskej toyolo porin nejon techpaleuis maj kuali titakakikan uan maj timomachtikan (Esd. 7:10). Tamachtilis tein motemakas itech ueyi nechikol motalis miak tonalmej achto itech Internet jw.org, uan moajsis nochi inintokay tanojnotsmej uan se oso ome textos kampa mokixtia sejse tanojnots. Semi tapaleuis maj timomachtikan seki semanas achto ke tiyaskej ueyi nechikol itech Youak keman tiTaueyichiuaj kemej Kalyetouanij. Seki tanojnotsanij kikixtiaj programa itech amat uan ompa kijkuilouaj tanemililmej tein okachi kinpaleuis.
4. ¿Keniuj uelis ueyi nechikol kinpaleuis tetatmej maj kinmachtikan ininkoneuan?
4 Xikinmachtikan nanmokoneuan. Ueyi nechikol tein mochiuak itech tepet Sinaí no kinpaleuij israelitas maj kinmachtikan ininkoneuan itajtoluan Jiova (Deut. 4:10). Ueyi nechikol tein uejkaua eyi tonal no kinpaleuis tetatmej maj ijkon kichiuakan. Tetatmej moneki motaliskej iniuan ininkoneuan keman mochiujtos ueyi nechikol uan kinpaleuiskej maj kuali takakikan. Satepan ke tamis sejse nechikol, kalyetouanij uelis tajtoskej ika tein okachi kinpaleuij, oso keman kipiaskej Taueyichiualis kemej Kalyetouanij.
5. ¿Keniuj uelis techpaleuis tiyetoskej itech ueyi nechikol tein tikpiaskej?
5 Ueyi nechikol tein mochiuak itech tepet Sinaí kinpaleuij israelitas maj kiitakan ke se ueyi tatiochiualis pouiskej itech ixolal Dios (Deut. 4:7, 8). Ueyi nechikol tein tikpiaskej mochijchiuak maj no ijkon techpaleui. Eyi tonal amo timoajsiskej iniuan akin pouij itech nejin taltikpak kampa taixyekantok Satanás, tein tamati kemej taluakyan, uan techpaleuis maj timoyolchikauakan uan maj tiyolpakikan tiyetoskej iniuan tokniuan itech kemej yeskia se xochital (Is. 35:7-9). Kemej itonal Jiova amo uejkaua ejkos, maj amo timopolouilikan nejin uejueyi nechikolmej tein tikpiaj xijxiujtika kampa timosentiliaj uan timoyolchikauaj se iuan okse (Heb. 10:24, 25).